Əkbər Qoşalı: “Belə görüşlər istənilən problemin daha tez həll olunmasına öz töhfəsini verəcək”
Məlum olduğu kimi, Bakının Qaradağ rayonunun Qobustan qəsəbəsində Səhiyyə Nazirliyinin yeni inşa olunan 17 saylı birləşmiş şəhər xəstəxanasının açılışı olub. Prezidenti İlham Əliyev və birinci xanım Mehriban Əliyeva açılışda iştirak edib.
Ölkə başçısı açılışda iştirak edənlər qarşısında çıxış edərək, səhiyyə sahəsində görülən işlər, indiyə qədər bu sahədə əldə olunan nailiyyətlər barədə danışıb. Diqqətçəkən məqamlardan biri odur ki, ölkə başçısı səfərlər zamanı vətəndaşlarla birbaşa canlı ünsiyyətdə olur, onların fikir və istəklərini dinləyir. Vətəndaşlarla işgüzar ünsiyyət quraraq qarşıya qoyulan məsələlərin daha tez həll olunmasını sürətləndirir. Dövlət başçısı ilə yerlərdə vətəndaşların canlı təmasları idarəçiliyin daha effektiv qurulmasına və təmin olunmasına öz töhfəsini verir. Nəzərə almaq lazımdır ki, Prezident İlham Əliyevin bölgələrə mütəmadi səfərləri və vətandaşlarla qurduğu canlı ünsiyyət regionlarda bir sıra sosial-iqtisadi xarakterli problemlərin həllinə gətirib çıxarıb. Belə ki, belə təmaslar zamanı Prezident yerindəcə problemlərlə tanış olur və bunların həlli ilə bağlı konkret göstərişlər verir. O baxımdan bu kimi təmasların müstəsna əhəmiyyəti var. Qaradağ rayonundakı açılış mərasimində bir daha bunu gördük. Təsadüfi deyil ki, Prezident İlham Əliyev də bu kimi görüşlərin, ünsiyyətin faydasına toxundu: “Əgər o vaxt mənim qarşımda bu məsələ qaldırılmasaydı, bəlkə də indi bu xəstəxana da tikilməyəcəkdi”.
Maraqlıdır, bəs ekspertlər bunu necə dəyərləndirirlər? Bu kimi canlı təmaslar nə kimi müsbət nəticələr verib və verəcək?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə Heyətinin üzvü Əkbər Qoşalı buna bir neçə kontekstdən yanaşdı: “Prezidentin zəngin təcrübəsi, alovlu vətənpərvərliyi özünü ölkəmizin, xalqımızın həyatında baş verən hadisələrdə, yaxud dövlət başçısının adı ilə bilavasitə bağlı olan hadisələrdə getdikcə daha çox göstərməkdədir. Bu təcrübə və alovlu vətənpərvərlik “Mən bütün azərbaycanlıların Prezidentiyəm” şəklində formullaşmış mənəvi keyfiyyətdən tutmuş, çoxşaxəli fəaliyyətin spektrlərində təcalla edir, şəkillənir. Qaradağ rayonunun Qobustan qəsəbəsindəki açılışın özü, açılışda dövlət başçısının iştirakı, söylədiyi nitq dediklərimizi bir daha sübut etməkdədir.
Bilirsiniz, 17 saylı birləşmiş şəhər xəstəxanası nə paytaxtın mərkəzində, nə də respublikanın ucqarlarında deyil, özünəməxsus bir coğrafi mövqedə yerləşməklə də, göstəriciləri ilə də, sözügedən qəsəbə və çevrəsində yaşayan əhalimizin sosial durumu etibarı və yəqin bir sıra başqa komponentlərlə də diqqətəlayiq bir durumda, məqamdadır. Vətəndaşlarla canlı təmaslar qurmaq, ümumilikdə, dövlətin zirvəsi ilə canlı təmaslar, əlbəttə, öz müsbət nəticələri ilə seçilən hadisədir. Bu, dünən də belə olub, bu gün də belədir, hər halda, gələcəkdə də belə olacaq.
İlham Əliyevin vətəndaş cəmiyyətinin inkişafı, müvafiq institutlaşmanın aparılması, bəlli konsepsiyanın qəbulu, milli donor institutlarının yaradılması, ASAN brendinin dövlət-vətəndaş münasibətləri sistemində özünəməxsus mövqe qazanması və s. ötəri fəaliyyətlər deyil. Bu, uzunmüddətli perspektivə - xalqın dövlət həyatında daha yaxından iştirakına, töhfələr verməsinə hesablanıb. Ümummilli Liderin “Xalq dövlət üçün deyil, dövlət xalq üçündür!” kəlamı, Prezidentin özünün “məmur xalqın qulluqçusu olmalıdır, xalqın ən birinci qulluqçusu da mənəm” sözləri Qobustandakı açılışda bir daha çiçəklədi. Hesab edirəm ki, bu cür təmaslar müvafiq qurumların məsuliyyətini daha da artıracaq. Bu da, öz növbəsində, istənilən problemin daha tez həll olunmasına öz töhfəsini verəcək”.
Vidadi ORDAHALLI
