Yanvarın 11-də Nazirlər Kabinetinin 2018-ci ilin yekunlarına həsr edilmiş iclasında Prezident İlham Əliyev ciddi struktur islahatlarının anonsunu verib.
Ölkə başçısı bildirib ki, Azərbaycanda idarəetməni təkmilləşdirmək üçün ciddi struktur islahatları başlayacaq: "Bilirsiniz, mən əldə edilmiş uğurlar haqqında həmişə danışmağa hazıram və fəxr ediləsi məsələlər kifayət qədər çoxdur. Ancaq mən həmişə, necə deyərlər, narazı oluram. Çünki mən istəyirəm ki, daha yaxşı olsun. İstəyirəm ki, bu pozuntular olmasın. Harada ki mümkündür, biz maksimum dərəcədə öz imkanlarımızdan istifadə edək ki, işlər daha da yaxşı getsin. Ona görə kadr islahatı da bu məqsədi daşıyır. İndi struktur islahatı gözlənilir. Çünki indi idarəetmədə struktur köhnəlib. Yeni idarəetmə strukturu olmalıdır - daha çevik, daha yığcam, daha məqsədyönlü. Çünki illər boyu yeni qurumlar yaranır. Onlar yarananda o qədər də hiss olunmur. Biri orada, biri burada yarandı, bir agentlik, bir xidmət yarandı. Sonra da baxanda görürük ki, bizim idarəetmə strukturumuz böyük dərəcədə şişirdilib. İndi dünyada əks proses gedir - idarəetmə daha yığcam, çevik, daha da məqsədyönlü və az işçi ilə böyük iş görmək üçün. Amma bizdə idarəetmə sistemi şişir. Buna son qoyulmalıdır. Ona görə struktur islahatı, kadr islahatı aparılmalıdır. Hər bir sahədə o sahəyə rəhbərlik edən şəxslər mütləq maksimum səmərə ilə işləməlidirlər”.
Prezidentin anonsunu verdiyi bu mövzu ətrafında ciddi müzakirələr başlayıb. Cəmiyyətin müxtəlif təbəqələri tərəfindən verilən mesajlardan hiss olunur ki, ölkə başçısının struktur islahatların aparılmasının zəruriliyi ilə bağlı verdiyi mesaj təqdir olunur. Milli Məclisin İnsan hüquqları komitəsinin üzvü Yevda Abramovun sözlərinə görə, Azərbaycanda struktur islahatlarına çoxdan başlanıb: "Cəmiyyət daim inkişaf edir. Bir yerdə durmur. Ona görə də cəmiyyətdən yeni tələblər gəlir. Dövlət də həmin tələblərə uyğun olaraq özünün strukturunu, idarəçiliyini dəyişir. Burada heç nə yoxdur. Cənab Prezident idarəetməni təkmilləşdirmək üçün ciddi struktur islahatlarının aparılmasını çox düzgün buyurur. Bu gün az insan əməyi sərf edib çox işləməklə xeyli nailiyyətlər əldə etmək mümkündür. Çox adamla az iş görüb cəmiyyəti idarə etmək olmur".
Yevda Abramov qeyd edib ki, struktur islahatları çərçivəsində bəzi nazirliklər, agentliklər, komitələr birləşdirilə bilər: "Bu nazirliklərin, komitələrin, agentliklərin hansının olacağını isə cənab Prezident bilə bilər. Bunları qabaqcadan demək olmaz. Cənab Prezidentin hər sahə üzrə müşavirləri var. Onlar müəyyən təkliflərlə çıxış edəcəklər, yoxlayacaqlar, analiz edəcəklər, həmçinin digər ölkələrin təcrübəsini nəzərə alacaqlar. Struktur və kadr islahatları elə-belə olmur ki... Bu islahatların olacağını cənab Prezident cəmiyyətin, hökumət üzvlərinin diqqətinə çatdırıb. Bu gün bütün dünya çevik dövlətçilik aparatı ilə işləyir".
Qeyd edək ki, Prezidentin təklifini struktur islahatların başlanması kimi təqdim etmək doğru olmazdı. Çünki bu prosesə bir neçə il əvvəl start verilib. Xüsusilə də, dünya bazarında neftin qiymətinin kəskin düşməsi və bunun fonunda dünyada maliyyə böhranının yaranmasından sonra bu proseslər bir qədər də sürətlənmiş oldu. Bu baxımdan da, bundan sonra başlayacaq mərhələ həmin islahatların davamı kimi qəbul edilməlidir. Prezident İlham Əliyev Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında belə islahatların aparılmasının zəruriliyindən danışıb. Bu baxımdan da, xüsusi olaraq qeyd olunmalıdır ki, ölkə Prezidentinin idarəetmə fəaliyyətində islahatlar sistemli və ardıcıl xarakter daşıyır. İlham Əliyev ölkə prezidenti seçildikdən sonra həm yeni nazirliklər yaradıb, həm də ayrı-ayrı nazirliklərin təkrarlığını aradan qaldırmaq üçün birləşmə prosesi gedib, bəziləri ləğv edilib. Prezident hər zaman çevik idarəetmə mexanizminə xüsusi diqqət yetirib. İndi yaranmış situasiya elədir ki, bu məsələyə daha ciddi əhəmiyyət verməyi önə çəkən ölkə Prezidenti yəqin ki, yaxın günlərdə atacağı addımlarla söyləmiş olduğu fikirlərin konkret nəticələrini cəmiyyətə təqdim edəcək. Bu da ölkənin idarə olunmasına öz töhvəsini verəcəkdir. Əslində bu istiqamətdə atılan addımlar çox düzgündür. Nəticədə dövlət idarəetmə xərcləri kəskin formada azalmaqla yanaşı, çeviklik və operativlik də təmin ediləcək.
Məhəmmədəli QƏRİBLİ
