Azər Həsrət: “Əslində, Mehmanın bu gün həbsxanada cəza çəkməyə məcbur qalması da məhz həmin adamların çirkin əməllərinin nəticəsidir”
ABŞ-ın “Vaşinqton post” qəzeti Azərbaycanda həbsdə olan və bloger kimi təqdim olunan Mehman Hüseynov barədə geniş məqalə dərc edib. Maraqlıdır ki, kifayət qədər tanınmış olan bu qəzet jurnalistika ilə heç bir əlaqəsi olmayan, yalnız videolar çəkib internetdə paylaşan bir cavan oğlanın konkret cinayət əməlinə görə həbs edilməsi və sonra cəza çəkdiyi müəssisədə yenidən cinayət törədərək məsuliyyətə cəlb olunmasını Azərbaycanda azad sözə qarşı repressiya addımı kimi qələmə verməyə çalışır.
Azərbaycanın rastlaşdığı kifayət qədər ciddi haqsızlıqlara göz yuman məlum nəşr, nədənsə, Mehmana görə “göz yaşı tökmək” qərarına gəlib. Ən maraqlısı isə budur ki, onlar həmin “göz yaşını”da qərəzə yuvarlanaraq tökürlər. Heç bir obyektivliyi gözləmədən, birtərəfli məqalə dərc etməklə, hətta Azərbaycan rəsmilərinə böhtan atıb, onları təhqir etməkdən belə çəkinmirlər. Bəllidir ki, bu mövzu M.Hüseynovun həbsxanada guya aclıq etdiyi xəbəri ətrafında yaradılan süni ajiotajdan sonra aktuallaşıb. Yayılan rəsmi məlumatda bildirilir ki, M.Hüseynov cəza çəkdiyi 14 saylı müəssisədə daxili rejim qaydalarını pozaraq, oranın zabitinə xəsarət yetirib. Bu əməlinə görə ona müvafiq maddələrlə cinayət işi açılıb, hazırda istintaq gedir. İddia olunur ki, guya M.Hüseynov yaranmış vəziyyətə etiraz olaraq aclıq edir. Ancaq Penitensiar Xidmətin sözçüsü Mehman Sadıxov açıqlamasında bildirib ki, M.Hüseynov normal şəkildə qidalanır və heç bir aksiya keçirmir. Bundan sonra tam aydın olur ki, M.Hüseynov ətrafında aparılan kampaniya quramadır. Ancaq maraqlıdır ki, həmin qurama kampaniyada dünyanın nüfuzlu qəzeti kimi tanınan “Vaşinqton post”da yer alır. Artıq mahiyyət tam aydın olur. Eyni mərkəzdən idarə olunan qüvvələr xırda bir hadisəni belə Azərbaycana qarşı təzyiq rıçaqı kimi istifadə etməyə can atırlar. “Vaşinqton post”un M.Hüseynovla bağlı yaradılan qurama kampaniyada rol alması daha nəyin əlaməti sayıla bilər?
Media eksperti Azər Həsrət “Bakı-Xəbər”ə bildirdi ki, adı keçən qəzet konkret siyasi və korporativ maraqlara xidmət etməsilə tanınır: “Bütün dünyada bu qəzeti kampaniyaçı kimi qəbul edirlər. Xidmət etdiyi qüvvələrə lazım olanda bu qəzet və onun yazarları media etikası ilə bərabər ədalət hissini də rahat bir şəkildə arxa plana keçirir. İndi bu Mehman üçün bu qədər "yanmaları" da o qəbildəndir. Belə bir durumda sual olunur: niyə “Vaşinqton post” öz yazarı - bir müddət öncə Türkiyədə Səudiyyə Ərəbistanı konsulluğunda öldürülmüş Camal Kaşıqçı ilə bağlı belə əsəbi və sərt mövqe tutmur? Necə olur ki, bir qəzet öz işçisinin bu qədər qəddarlıqla məhv edilməsinə daha loyal yanaşır, hansısa uzaq bir ölkədə özünə dəxli olmayan bir hadisədən çıxış edərək kampaniya aparır? Bu sual ritorikdir əslində. Dediyim kimi, o qəzet kampaniyaçıdır və konkret mərkəzlərin maraqlarına xidmət edir. Ona görə də Azərbaycana münasibətdə belə qərəzli və qeyri-obyektiv münasibət sərgiləyir”.
Azər Həsrət hesab edir ki, belə hadisələr beynəlxalq media qurumlarının necə vasitəyə çevrildiyini aydın şəkildə ortaya qoyur: “Mehmanla bağlı bu şəkildə ajiotajın yaradılmasına ehtiyac yoxdur. Adam bir gün aclıq edib, sonra dayandırıb. Bunu rəsmi qurum da bəyan edib. Mehmanın özünün saxlanma şəraiti ilə bağlı şikayəti yoxdur. Buna baxmayaraq, “Vaşinqton post” dayanmadan, şərlə, böhtanla üzərimizə gəlir. Buradan aydın olur ki, onlar məsələnin professional şəkildə araşdırılmasında yox, bəhanə axtarmaqla şişirdilməsində maraqlıdırlar. Ölkə daxilindən həmin mərkəzlərlə əməkdaşlıq edənlər isə bu yolla daha çox qrant almağı hədəfləyirlər. Əslində, Mehmanın bu gün həbsxanada cəza çəkməyə məcbur qalması da məhz həmin adamların çirkin əməllərinin nəticəsidir. Hətta həbsxanada belə həmin gəncdən sui-istifadə etməyə çalışırlar”.
Məhəmmədəli QƏRİBLİ
