Əhməd Şahidov: “Vidadi İsgəndərli ilə bağlı petisiyanı dəstəkləyirəm”
Məlum olduğu kimi, bir qrup fəal vətənpərvər gənc saxta yollarla "siyasi qaçqın” adına sahiblənmiş Vidadi İsgəndərli barədə Fransa dövləti və hakimiyyətinə tələb irəli sürüb, eləcə də petisiya hazırlayıb.
Sözügedən petisiyada bir sıra məqamlara toxunulub. Qeyd olunur ki, təxribatçı sosial şəbəkələrdə təhqir xarakterli videolar yerləşdirir və bu videolarda öz vətənini və xalqını alçaldır, Azərbaycan dövlətinin rəmz və atributlarını təhqir edir.
V.İsgəndərli öz videoçarxlarında ictimaiyyəti antikonstitusion hərəkətlər törətməyə, zorakılıq və terrorçuluğa çağırır. Petisiyada həmçinin deyilir: “Biz inanmaq istəmirik ki, Fransa dövləti bu təxribatda maraqlıdır. Biz bu ölkəni V.İsgəndərlinin terrorçuluğa və zorakılığa çağırışlarını diqqətə almağa və müvafiq tədbirlər görməyə çağırırıq”.
Nəzərə almaq lazımdır ki, V.İsgəndərli müstəqillikdən əvvəl və ondan sonra siyasi proseslərdə olmayıb. Bu məxluq yalnız Fransaya qaçandan sonra sosial şəbəkələrdə fəallıq göstərməyə başlayıb. Epizodik olaraq müxalifətin keçirdiyi mitinqlərdə, küncdə-bucaqda, onun-bunun yanında fotoqrafların obyektivinə təsadüfən düşən şəkillərini görmüşük. Belə bir şəxsə Fransada sığınacaq verilməsi, onun fəaliyyətinə hər cür şərait yaradılması Fransa hakimiyyətinin Azərbaycana münasibətdə səmimiliyini şübhə altında qoyur. Özünə hörmət edən dövlət bu cür şəxsə sığınacaq verməz. Ən azından ona görə ki, belə hallar dövlətə hörmət gətirmir. Petisiyada məqsəd Fransa hökumətindən V.İsgəndərli ilə bağlı hüquqi ölçü götürülməsini tələb etməkdir.
O baxımdan inanmaq çətindir ki, Fransa hökuməti bu təxribatda maraqlı olar.
Maraqlıdır, bəs ekspertlər bunu necə dəyərləndirirlər?
Məsələyə münasibət bildirən hüquq müdafiəçisi Əhməd Şahidovun sözlərinə görə, Fransa dövləti özünə hörmət edirsə, o zaman bu cür təxribatlara yol verməməlidir: “Çünki kimliyindən, siyasi, dini statusundan asılı olmayaraq, hər bir kəs ölkənin Konstitusiyasına əməl etməlidir, hörmətlə yanaşmalıdır. Dövlət rəmzlərinə, atributlarına, Prezidentə hörmət etməlidir. Azərbaycan demokratik ölkədir. Bizdə fərqli fikir, tənqid ola bilər, amma təhqir yolverilməzdir. Hansı ki, V.İsgəndərli adlı şəxs Azərbaycan dövlətini açıq təhqir edir. Bu məsələdə sosial şəbəkənin imkanlarından istifadə edir. Fransa kimi dövlət bütün bunları nəzərə almalıdır və bu kimi təxribatlara şərait yaratmamalıdır. Çünki Azərbaycan demokratik və hüquqi dövlətdir. Ölkədə hüququn aliliyi bərpa olunur və bu cür fəaliyyətlər hüquqla tənzimlənir. Düşünürəm ki, Azərbaycanda V.İsgəndərli ilə bağlı cinayət işi açılması və onun hazırda olduğu Fransada tutularaq ekstradisiya olunması, əslində, qanunun tələbidir. Petisiya sosial bir tələbat və ismarıcdır. Cəmiyyətin bu məsələ ilə bağlı mesajıdır. Düşünürəm ki, Fransa bütün bunları nəzərə almalıdır və lazımi addımlar atmalıdır. Bütün bunlarla yanaşı, Azərbaycan dövləti bununla bağlı prosedurları ən sərt şəkildə işə salmalıdır. Ona görə də V.İsgəndərli ilə bağlı petisiyanı dəstəkləyirəm”.
Vidadi ORDAHALLI
