Elşən Həsənov: “Artıq bir sıra nüfuzlu ölkələr və təşkilatlar münaqişənin Azərbaycanın ərazi bütövlüyü çərçivəsində həll edilməsinin vacibliyinə dair fikirlər səsləndirirlər ki...”
Ermənistanda fəaliyyət göstərən Avropa Tədqiqatlar Mərkəzi adlı qurum maraqlı açıqlama ilə çıxış edib. Mərkəzin rəhbəri Artur Qazinyan öz “Facebook” səhifəsində Dağlıq Qarabağ konfliktinin nizamlanması prosesindəki perspektivləri şərh edib.
Qazinyanın sözlərinə görə, növbəti ildə problemin həllində ciddi irəliləyişlər gözləməyə dəyər: “ABŞ öz qoşunlarını Suriyadan çıxarır. Pentaqonun rəhbəri Mettis istefaya göndərildi. Bu o anlama gəlir ki, ABŞ-la Rusiya arasında İranın Suriyadakı mövcudluğuna dair razılaşma var. Təbii ki, Rusiya və İranla hər hansı bir razılıq əldə etmədən ABŞ həmin bölgəni tərk etməzdi. Ən azı İsrail buna imkan verməzdi. Bu, Ermənistan üçün ciddi risq anlamına gəlir. Çünki bu böyük razılaşmanın tərkibində Dağlıq Qarabağ konfliktinin nizamlanması prosesi də ola bilər. Yəqin ki, dünya gücləri “Artsax”da (qondarma qurum - M.Q.) Ermənistan tərəfindən status-kvonun qorunmasına da maneçilik törədəcəklər. Paşinyan hakimiyyəti hadisələrin bu cür gedişinə hazır olmalıdır və bu gündən başlayaraq bu plan üzrə işlərini qurmalıdır”.
Mərkəz rəhbəri daha sonra qeyd edir ki, hadisələrin bu cür gedişi Ermənistanın xeyrinə deyil və bu həmin ölkənin “milli maraqları”na cavab vermir.
Erməni analitikin fikirlərində ən vacib diqqətçəkən məqam qarşıdakı 2019-cu ildə Dağlıq Qarabağ konfliktinin həlli üçün ciddi addımların atılacağına və həlledici olacağına dair irəli sürülən arqumentləridir. Qeyd edək ki, bir neçə gün əvvəl Azərbaycan Prezidenti İlham Əliyev də məcburi köçkünlərlə görüşündə 2019-cu ilin münaqişənin həllində həlledici olacağına dair fikirlər səsləndirib. Eyni zamanda, Rusiyanın Azərbaycandakı səfiri də qarşıdan gələn ildə konfliktin həlli istiqamətində müsbət irəliləyişlərin olacağına işarə edib.
Göründüyü kimi, çox müxtəlif tərəflərin 2019-cü ildə münaqişənin həlli yönümündə həlledici irəliləyişin olacağına dair səsləndirdiyi fikirlər üst-üstə düşür.
2019-cu ildə Dağlıq Qarabağ konfliktində həlledici dönüşün olacağını şərtləndirə biləcək dəlillər hansılardır?
Ekspert Elşən Həsənov “Bakı-Xəbər”ə bildirdi ki, bunu şərtləndirən bir sıra amillər var: “Əvvəla geopoltik anlamda baş verənlər bizim coğrafiyaya diqqəti artırır. Bura Suriyada baş verən dəyişikliyi, ABŞ-ın İranı sıxmaqda daha da maraqlı olmasını və bu istiqamətdə bizim regionun imkanlarından yararlanmaq cəhdlərini aid edə bilərik. Bütün bu amillər regionda maraqları olan güclərin bir qədər açıq oyuna gedəcəyini şübhəsiz edir. Eyni zamanda, regionun özündə baş verən proseslər belə impulsun olacağını deməyə əsas verir. Bilirsiniz ki, Ermənistanda hakimiyyət dəyişikliyi baş verib. Həmin hakimiyyət müharibə üzərində dövləti ələ keçirmiş əvvəlki hərbi xunta rejimindən fərqlənməyə çalışır. Hiss edilir ki, Dağlıq Qarabağ münaqişəsinin nizamlanması istiqamətində hansısa addımı atmaq istəyirlər. Paşinyan anlayır ki, onun güzəştə getməkdən başqa yolu yoxdur. Çünki status-kvonu saxlamaq üçün heç bir bəhanə qalmayıb. Artıq Azərbaycan da məsələnin həllini konkret şəkildə qoyur. Bundan əlavə, hazırda Rusiya ilə Ermənistanın yeni hakimiyyəti arasında ciddi narazılıqlar var. Perspektivdə onların davam edəcəyi gözlənir. Çox güman ki, Moskva məhz Dağlıq Qarabağda güzəştin əldə edilməsilə bağlı Paşinyana təzyiqləri gücləndirəcək. Eyni zamanda, münaqişənin həllinə yeni yanaşma ortaya qoyulmağa başlayıb. Bunu da Azərbaycan diplomatiyasının qələbəsi saya bilərik. Artıq bir sıra nüfuzlu ölkələr və təşkilatlar münaqişənin Azərbaycanın ərazi bütövlüyü çərçivəsində həll edilməsinin vacibliyinə dair fikirlər səsləndirirlər ki, bu da ümidləri artırır. Azərbaycanın bu situasiyada arxalandığı ən mühüm faktorlardan biri də hərbi gücünün qat-qat Ermənistanı üstələməsidir. Sadalananların hamısı 2019-da həlledici addımların atılacağını şərtləndirir”.
Məhəmmədəli QƏRİBLİ
