Qabil Hüseynli: “Strukturlaşmış bu şəbəkə ölkəmizin müstəqilliyi üçün ciddi təhdid sayılırdı”
Dövlət Təhlükəsizliyi Xidmətinin (DTX) İctimai əlaqələr şöbəsindən verilən məlumata görə, DTX tərəfindən xarici xüsusi xidmət orqanlarının Azərbaycanda kəşfiyyat fəaliyyətinin təsbit edilməsi və qarşısının alınması istiqamətində intensiv araşdırmalar davam edir.
Dövlət Təhlükəsizliyi Xidmətində başlanmış cinayət işi üzrə keçirilən əməliyyat-istintaq tədbirləri nəticəsində xarici xüsusi xidmət orqanları nümayəndələrinin illər ərzində Azərbaycanda çoxmərhələli kəşfiyyat işi, bununla əlaqədar qonşu ölkələrin ərazisində məxfi görüşlərin təşkili və Azərbaycan xüsusi xidmət orqanları əməkdaşlarını fərdi əməkdaşlığa cəlb etməyə istiqamətlənən kanalların qurulmasından ibarət dərin kəşfiyyat işi müfəssəl aşkarlanıb, aidiyyəti şəxslər casusluq formasında dövələtə xəyanət və digər cinayət əməllərinə görə cinayət məsuliyyətinə cəlb edilib, xarici xüsusi xidmət orqanları əməkdaşlarının kəşfiyyat işi üçün uydurulmuş və həqiqi şəxsiyyətləri, kəşfiyyat metodikaları aşkarlanıb, əməliyyat-kəşfiyyat işləri ilk mənbəyədək ifşa edilərək zərərsizləşdirilib.
Müəyyən edilib ki, xarici xüsusi xidmət orqanları tərəfindən maddi maraq müqabilində, xüsusi təxəllüs verilməklə məxfi əməkdaşlığa cəlb edilmiş Azərbaycan Respublikasının vətəndaşı, 1959-cu il təvəllüdlü İsmayılov Zakir Əlibala oğlu keçmiş Milli Təhlükəsizlik Nazirliyində şöbə rəisi və digər məsul vəzifələrdə işlədiyi dövrdə Azərbaycan Respublikasının dövlət təhlükəsizliyi və milli maraqları zərərinə fəaliyyət göstərərək, tutduğu vəzifələrə görə ona məlum olan, habelə əldə edə bildiyi əks-kəşfiyyat fəaliyyəti üzrə sənədlər, şəxsi heyət barədə və digər məxfi məlumatları, eləcə də 2015-ci ildən etibarən təqaüddə olduğu dövrdə keçmiş əlaqə və imkanlarından istifadə edərək təhlükəsizlik orqanlarında baş verən dəyişikliklər barədə məlumatları, Azərbaycan xüsusi xidmət orqanlarına qarşı kəşfiyyat işlərinin mümkün üsulları barədə təhlillərini müntəzəm xarici xüsusi xidmət orqanına təqdim etməklə dövlətə xəyanət edib.
İstintaq zamanı Zakir İsmayılovun xarici xüsusi xidmət orqanları ilə gizli və şifrəli yazışmaları, xarici xüsusi xidmət orqanlarına göndərilmiş sənədlər, gizli toplanılmış məlumatların olduğu elektron daşıyıcılar, səsyazmalar və iş üzrə əhəmiyyət kəsb edən digər çoxsaylı materiallar aşkar edilib. Zakir İsmayılov Cinayət Məcəlləsinin 274-cü (dövlətə xəyanət) maddəsi ilə məsuliyyətə cəlb edilərək həbs edilib.
Eləcə də müəyyən edilib ki, 1977-ci il təvəllüdlü Yusifzadə Bəhruz Yaşar oğlu təhlükəsizlik orqanlarında xidmətdən ehtiyata buraxıldıqdan sonra xarici ölkələrə səfərlərində əvvəllər məxfi əməkdaşlığa cəlb etdiyi xarici ölkə vətəndaşının vasitəsilə onunla əlaqə quran xarici xüsusi xidmət orqanları əməkdaşları ilə görüşlər təşkil edib, onlar tərəfindən maddi maraq müqabilində əməkdaşlığa cəlb edilib, yenidən Azərbaycan xüsusi xidmət orqanlarından hər hansı birinə işə düzəlməyə cəhd etmək barədə tapşırıq alıb. Bəhruz Yusifzadə göstərilən istiqamətdə fəaliyyət göstərərkən ifşa olunub.
Bəhruz Yusifzadənin casusluq fəaliyyətinə, xarici xüsusi xidmət orqanlarından maddi vəsait qəbul etməsinə dair çoxsaylı video və sair materiallar əldə edilib. Bəhruz Yusifzadə Cinayət Məcəlləsinin 274-cü (dövlətə xəyanət) maddəsi ilə məsuliyyətə cəlb edilərək həbs edilib.
Aparılan cinayət işi üzrə cinayət əməllərinin törədilməsinə şərait yaradan hallar müəyyən edilib, digər şəxslər müxtəlif cinayət əməllərinə görə məsuliyyətə cəlb edilib, ifşa olunmuş dərin casusluq işi üzrə xarici xüsusi xidmət orqanlarının əldə etdiyi məlumatların mahiyyəti nəzərə alınaraq mümkün nəticələri aradan qaldırılıb. Hazırda cinayət işi üzrə istintaq-əməliyyat tədbirləri davam edir.
Hazırkı geosiyasi reallıqlar baxımından xarici kəşfiyyatın Azərbaycanda bu cür casus şəbəkəsi yaratmaqda uzaq hədəfləri nə ola bilər?
Politoloq Qabil Hüseynli qəzetimizə bildirdi ki, həyata keçirilən bu əməliyyatı yüksək dəyərləndirmək olar: “Hesab edirəm ki, aparılan istintaq çərçivəsində həmin şəbəkənin digər üzvləri də ifşa ediləcək. Bu, dölətimizin təhlükəsizliyi üçün xüsusi önəm daşıyan bir məsələdir. Hesab edirəm ki, belə bir casus kanalı bir neçə gün ərzində yaradılmayıb. Uzun illərdir onun üzərində iş aparılıb. Çox şükürlər olsun ki, dövlətimiz üçün ciddi təhlükə yaradan bu xəstəliyi vaxtında amputasiya ediblər. Açıq etiraf etmək lazımdır ki, ölkədə belə bir şəbəkənin olması çox adamda şübhə doğurmadı. Çünki bundan əvvəl də buna bənzər şəbəkələr ifşa edilərək məsuliyyətə cəlb edilib. Ölkənin bir sıra bölgələrindən tutmuş, bəzi məscidlərə qədər uzanan bu şəbəkənin hazırkı situasiyada məqsədi bəllidir. Müstəqil Azərbaycanın mövcudluğu, inkişaf etməsi, regionda və dünyada artan nüfuzu həmin şəbəkənin arxasındakı qüvvələri ciddi narahat edir. Açıq deyək ki, ölkəmizin bu göstəriciləri ətrafımızda olan bəzi ölkələri də ciddi narahat edir. Çox təəssüflər olsun ki, onların öz çirkin niyyətləri üçün atdığı tilova bizim vətəndaşlarımız da düşürlər”.
Qabil Hüseynlinin sözlərinə görə, bir neçə il bundan əvvəl müəyyən bölgələrdə onların bəzi şəbəkələrinin ifşası olub: “Bu onlara ciddi zərbə olsa da, bütünlüklə ifşası ilə nəticələnmədi. Strukturlaşmış bu şəbəkə ölkəmizin müstəqilliyi üçün ciddi təhdid sayılırdı. Bir sıra hallarda isə məlum şəbəkə əldə etdiyi informasiyanı Ermənistana çatdıra bilirdi. Hələlik istintaq getdiyi üçün bizə aparılan əməliyyatın bir çox detalları məlum deyil. Ümidvarıq ki, gələcəkdə bununla bağlı əlaqədar qurumlar tərəfindən ətraflı məlumat veriləcək. Bu əməliyyat bir daha sübut etdi ki, Azərbaycanın təhlükəsizliyi göz bəbəyi kimi qorunur və əmin əllərdədir”.
Məhəmmədəli QƏRİBLİ
