Məlum olduğu kimi, Prezident İlham Əliyev Əfv haqqında Sərəncam imzalayıb.
Sərəncam məhkum olunmuş bir sıra şəxslərin, onların ailə üzvlərinin, Azərbaycanın İnsan hüquqları üzrə müvəkkilinin Azərbaycan Prezidentinə ünvanlanmış əfv haqqında müraciətlərinə baxılaraq, məhkumların şəxsiyyətini, səhhətini, ailə vəziyyətini, törətdikləri cinayətlərin xarakterini və ictimai təhlükəlilik dərəcəsini, cəza çəkdikləri müddəti və həmin müddətdə davranışlarını nəzərə alaraq, humanizm prinsiplərinə əsaslanaraq imzalanıb.
Məlumat üçün bildirək ki, əfv olunanlar arasında 16 əcnəbi də var. Onlardan 5 nəfəri İran, 4 nəfəri Rusiya, 2 nəfəri Pakistan, 2 nəfəri Gürcüstan, 1 nəfəri Türkiyə, 1 nəfəri Fransa, 1 nəfəri isə Əfqanıstan vətəndaşıdır.
Qeyd edək ki, əfv sərəncamı qanun qarşısında cavab verən, lakin cəmiyyət üçün artıq təhlükə yaratmayan, peşmançılıq yaşayan və yeni həyata başlamaq istəyən şəxslərə verilən ikinci şansdır. Bu humanist akt bir daha göstərir ki, Azərbaycan dövləti və onun rəhbəri insan taleyinə biganə deyil, əksinə, hər bir fərdin cəmiyyətə reinteqrasiya olunmasına, yenidən sosial həyata qayıtmasına şərait yaratmağa çalışır.
Bəhruz Quliyev: "Bu sərəncam sadəcə hüquqi akt deyil, eyni zamanda cəmiyyətlə dövlətin qarşılıqlı etimadının nümunəsidir"
“SƏS" qəzetinin baş redaktoru, Fəlsəfə üzrə fəlsəfə doktoru Bəhruz Quliyev "Bakı-Xəbər"ə şərhində qeyd etdi ki, Prezident İlham Əliyevin imzaladığı növbəti Əfv sərəncamı bir daha göstərdi ki, Azərbaycan dövləti humanizm prinsiplərinə sadiqdir və vətəndaşın taleyinə laqeyd yanaşmır. Bu sərəncam sadəcə hüquqi akt deyil, eyni zamanda cəmiyyətlə dövlət arasında dialoqun, qarşılıqlı etimadın və inamın dərinləşməsinə xidmət edən mühüm mesajdır: “Əfv olunanlar arasında qadınların, azyaşlı övladı olanların, əlillərin, cəza müddətinin böyük hissəsini çəkmiş şəxslərin olması dövlətin insan amilinə verdiyi önəmi aydın şəkildə göstərir. Bu addım bir daha sübut edir ki, Azərbaycan dövlətinin ədalət konsepsiyası yalnız qanunla ölçülmür, burada mərhəmət, ikinci şans və cəmiyyətə adaptasiya imkanları da əsas yer tutur. Cəmiyyət bu Əfv sərəncamını alqışladı. Bu, sadəcə azadlığa qovuşan fərdlər üçün deyil, həm də onların ailələri, yaxınları və bütövlükdə sosial mühit üçün yeni bir nəfəs oldu. Dövlətin bu addımı vətəndaşların mənəvi dünyasına, onların emosional vəziyyətinə, ailə institutlarına və sosial harmoniyaya ünvanlanmış bir jestdir. Əfv sərəncamı, eyni zamanda, hüquqi maarifləndirmə və cəmiyyətə çağırış baxımından da əhəmiyyətlidir: qanunlara hörmət etməyin, səhvlərdən nəticə çıxarmağın və islah yoluna dönməyin mümkün və dəyərli olduğunu göstərir. Prezident İlham Əliyevin rəhbərliyi ilə həyata keçirilən humanist siyasətin bu nümunəsi cəmiyyətə verilən aydın mesajdır. Azərbaycan dövləti vətəndaşını cəzalandırmaqla deyil, onu qazanmaqla maraqlıdır. Və bu yanaşma müasir Azərbaycan modelinin əsas sütunlarından biridir”.
Əliməmməd Nuriyev: “Əfv alan şəxs artıq sadəcə azadlığa çıxmır – o, cəmiyyətin yenidən etimad göstərdiyi bir fərd kimi çıxır”
“Konstitusiya” Araşdırmalar Fondunun prezidenti Əliməmməd Nuriyev “Bakı-Xəbər”ə şərhində bildirdi ki, Azərbaycan Respublikasının Prezidenti tərəfindən imzalanmış növbəti əfv sərəncamı təkcə hüquqi sənəd deyil, həm də humanizm fəlsəfəsinin canlı ifadəsidir: “Sayca 71-ci olan bu əfv sənədi, həm də dövlətin hüquqla yanaşı mərhəmətlə davranmaq qabiliyyətini nümayiş etdirən tarixi ardıcıllığın davamıdır: Əfv aktı dövlətin öz vətəndaşına bir daha etibar etməsidir. Bu, insanın dəyişmək və islah olmaq imkanının tanınmasıdır. Əfv hüquqi məntiqin içərisinə yerləşdirilmiş mənəvi dəyərlər sistemidir. Amnistiyalarla yanaşı əfv sərəncamları fərdi yanaşmanı, insanın taleyinə xüsusi diqqəti ehtiva edir.
Əfv alan şəxs artıq sadəcə azadlığa çıxmır – o, cəmiyyətin yenidən etimad göstərdiyi bir fərd kimi çıxır. Bu isə, öz növbəsində, onun cavabdehlik və davranış baxımından daha yetkin olması üçün güclü motivasiya yaradır. Əfv ədalət ilə mərhəmətin görüş yeridir”.
Günel CƏLİLOVA
