Hüseyn İbrahimov: “Orada terror qruplaşmaları aktiv olsa, bu, region dövlətləri üçün təhdid ola bilər”
Dövlət Təhlükəsizliyi Xidmətinin rəisi, general-polkovnik Əli Nağıyev “Əfqanıstan: regional təmaslar, təhlükəsizlik və inkişaf” mövzusunda Bakıda keçirilən beynəlxalq konfransda çıxış edib.
Ə.Nağıyev bildirib ki, Əfqanıstanda vəziyyətin gərgin qalmasında maraqlı olan pozucu qüvvələrin və terror qruplaşmalarının destruktiv cəhdlərinin qarşısının alınmalıdır. Xidmət rəisi qeyd edib ki, tədbirin keçirilməsində əsas məqsəd Əfqanıstanla bağlı məsələdə vahid mövqe ortaya qoyulmasıdır: “Əfqanıstanın beynəlxalq münasibətlər sistemində öz yerini tutması, bu ölkədə əmin-amanlığın təmin edilməsi vacibdir. Bütün bunlar üçün region ölkələri və digər dövlətlər koordinasiyalı fəaliyyət və birgə səy göstərəcəklər”.
Əfqanıstana aid belə bir konfransın Azərbaycanda keçirilməsinin məzmunu, mahiyyəti nədir? Ümumilikdə, Əfqanıstanda sabitliyin, Azərbaycanda təhlükəsizliyin, regionda təhlükəsizlik məsələlərinə nə kimi bağlılığı var?
“Azərbaycan hər zaman Əfqanıstanda sabitliyin, inkişafın olmasında maraqlı olub”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimovun fikrincə, bir sıra faktorlara görə Əfqanıstanda sabitliyin olması vacib əhəmiyyət kəsb edir: “Əvvəla, Azərbaycan hər zaman müsəlman ölkəsi olan Əfqanıstanda sabitliyin, inkişafın olmasında maraqlı olub. Ölkəmiz 2002-ci ildən başlayaraq Əfqanıstandakı sülh yaratma əməliyyatlarına öz töhvəsini verib. 2021-ci ilin yayında ölkəni ən sonuncu tərk edən Azərbaycan qüvvələri olub. Bütün bunlarla yanaşı, Əfqanıstandakı yeni hakimiyyətlə diplomatk münasibətlər qurub. Əfqanıstanda sabitliyin olması ona görə vacibdir ki, bu ölkə coğrafi baxımdan olduqca önəmli mövqedə yerləşir. Əfqanıstanın 3 Orta Asiya ölkəsi (Türkmənistan, Özbəkistan və Tacikistan) ilə sərhədi var. O cümlədən, Əfqanıstan qərbdən İranla sərhəddir. Uzun illər Əfqanıstan böyük güc mərkəzlərinin nüfuz mübarizəsinin mərkəzində olub. Nəticədə illərlə davam edən vətəndaş müharibələri ölkəni xeyli geri salıb. Bu gün Əfqanıstan dünyanın 10 yoxsul ölkəsindən biri hesab olunur. Əhalinin sayı 40 milyon nəfər olan ölkənin inkişafı ilə bağlı ciddi problemlər var. Məsələ ondadır ki, Əfqanıstanda terror qruplaşmaları aktiv olsa, bu, region dövlətlərdəki sabitlik üçün təhdid ola bilər. Bizi birləşdirən din amili var. Ona görə də region dövlətləri Əfqanıstanda sabitliyin təmin təmin edilməsində koordinasiyalı fəaliyyət göstərməlidilər. Çünki bu, Əfqanıstanla qonşu olan, o cümlədən yaxın region ölkələrinin maraqlarına cavab verir. Əfqanıstanda sabitlik, inkişaf narkotik vasitələrin istehsalı və yayılmasının önlənməsində vacib rol oynaya bilər. Azərbaycan nə mümkündürsə, bu işdə Əfqanıstana öz töhvəsini verə bilər”.
Vidadi ORDAHALLI
