Ermənistan İraq Kürdüstanını Türkiyəyə qarşı yönəltmək planı ilə işləyir...
Məhəmməd Əsədullazadə: “İstənilən halda burada xarici təsirlərin rolu var”
Ermənistan baş naziri Nikol Paşinyan Münhen Təhlükəsizlik Konfransı çərçivəsində İraq Kürd Muxtariyyətinin rəhbəri Nəçirvan Bərzani ilə görüşüb. Bu barədə Ermənistan hökuməti məlumat yayıb.
Tərəflər ikitərəfli ticari-iqtisadi əməkdaşlıqdan məmnunluq ifadə ediblər və iqtisadi münasibətlərə əlavə təkan verəcək işgüzar əlaqələrin dərinləşdirilməsinin vacibliyini vurğulayıblar. Bundan başqa, bölgədə sülh və sabitliyin təmin edilməsi istiqamətində ardıcıl addımların atılmasının önəmi bildirilib.
İraq Kürdüstanı ilə Ermənistan arasında regional sabitlik və təhlükəsizlik sahəsində nə əməkdaşlıq ola bilər? Məgər İraq Kürdüstanı ayrıca dövlətdir? Üstəlik, Ermənistan bizim bölgədə antisülh, təhlükəsizliyə yönəlmiş fəaliyyətlə məşğul olduğu bir vaxtda İraq Kürdüstanının Ermənistanla bu yaxınlaşmasının arxasında nə niyyət dayanır, məqsəd nədən ibarət ola bilər? İraq Kürdüstanının Ermənistanla əməkdaşlığa yönəldilməsində xarici təsirlərin (ABŞ-ın) rolu nə qədərdir? Məlum məsələdir ki, İraq Kürdüstanı üzdə Türkiyə ilə normal münasibətlərdə olsa da, əslində tərəflər arasında bir gərginlik var. Ən azından ona görə ki, İraq Kürdüstanı da Türkiyənin ərazi bütövlüyü üçün potensial təhdid mənbələrindən biridir. Belə şəraitdə Paşinyanın Bərzani ilə əməkdaşlığı beynəlxalq qüvvələrin təsiri altında olan prosesə oxşayırmı? İkincisi, Ermənistanın əməkdaşlığa cəhd etməsi İraq Kürdüstanından gələcəkdə Türkiyəyə qarşı istifadə niyyəti ilə bağlı ola bilərmi?
“Ermənistan maraqlıdır ki, Türkiyənin ərazi bütövlüyü təhdid altında olsun, separatizm güclənsin”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, tərəflər arasında təmasların arxasında bir sıra məqamlar ola bilər: “İraq Kürdüstanı ilə Ermənistan arasında olan münasibətlər, Paşinyanın Bərzani ilə görüşü təsadüfü deyil. Burada bir sıra məqamlar ola bilər. Məsələ ondadır ki, Ermənistan illərdir Azərbaycanın yaxın münasibətlərə malik olduğu ölkələrlə xüsusi təmaslar qurmağa çalışır. Xüsusən ərəb dövlətləri ilə bu kimi təmaslar daha çox qurulur. Fikrimcə, bu amil ola bilər. Digər tərəfdən, Ermənistan Türkiyə üçün potensial təhlükə mənbəyi olan istənilən ölkə ilə xüsusi yaxın münasibətlər qurmaqda maraqlıdır. Bu ölkələrin də başında Yunanıstan gəlir. Belədə, əlbəttə, Ermənistan maraqlıdır ki, Türkiyənin ərazi bütövlüyü təhdid altında olsun, separatizm güclənsin. Bu baxımdan, təbii ki, Ermənistan tərəfinin niyyətində xoş məqam axtarmaq sadəlövhlük olar. Başqa bir tərəfdən, ola bilsin ki, Ermənistan İraq Kürdüstanından neft idxal etmək istəyir. Digər bir tərəfdən istisna deyil ki, beynəlxalq güclər Kürd Muxtariyyətindən istifadə edib PKK-ya dəstək verərlər. Türkiyəyə qarşı mövqe ortaya qoya bilərlər. Yəni bu, prinsipcə mümkündür. Ancaq ümumi götürdükdə, hesab edirəm ki, burada iqtisadi maraqlar, neft alışları var və silah alışı da ola bilər. Nikol belə addım atmaqla, həm də İraqın ərazi bütövlüyünü sual altında qoyur. İstənilən halda, burada xarici təsirlərin rolu var”.
Vidadi ORDAHALLI
