Daşdəmir Əliyev: “Sonda biz deyən oldu və Rusiyanın təxribatları səmərə vermədi”
Məlum olduğu kimi, ötən ayın 29-da Azərbaycan Qızıl Aypara Cəmiyyəti tərəfindən Qarabağda yaşayan erməniəsilli şəxslərin ehtiyaclarını qarşılamaq üçün humanitar yardım yola salındı. Humanitar yardım karvanında ilkin mərhələ üçün 40 ton un məmulatları var idi. Ancaq ermənilər həmin yükü qəbul etməkdən imtina etdi.
Maraqlıdır ki, bölgəyə nəzarət edən Rusiya sülhməramlıları erməniləri məcbur etmədi ki, həmin yükü qəbul etsin. Bunun ardınca Rusiyanın özü sentyabrın 9- da Ağdamdan keçməklə Xankəndiyə bir maşın yük göndərdi və həmin yük qəbul olundu. Rusiya bu məsələdə nə oyun oynadı?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Azərbaycan iyun ayının 15-də Laçın sərhəd məntəqəsində baş verən silahlı insidentdən sonra Beynəlxalq Qızıl Xaç Komitəsinə Laçın yolu ilə tibbi təxliyələrin davam etdirilə biləcəyini bildirib, humanitar yardımların isə Ağdam-Xankəndi yolu vasitəsilə çatdırılmasını təklif edib: “Buna cavab olaraq Qarabağ ermənilərinin təmsilçiləri Ağdamdan Xankəndiyə gedən yolu bağlayaraq, Azərbaycandan gələn humanitar yükləri qəbul etməyəcəklərini bildirib. Sentyabrın 9-da Rusiya Qızıl Xaç Komitəsinin Qarabağın erməni icmasına göndərdiyi humanitar yük də ilkin olaraq erməni sakinlər tərəfindən qəbul edilmədi. Yalnız sentyabrın 12-də Rusiya Qızıl Xaç Cəmiyyətnin humanitar yük avtomobili ermənilər yaşayan Xankəndi şəhərinə buraxılıb.
Azərbaycan Qızıl Aypara Cəmiyyətinin hazırda erməni sakinlərlə birbaşa təması yoxdur. Rusiya Sülhməramlı Kontingentinin komandanlığı vasitəsilə razılıq əldə olunsaydı, humanitar yüklər ünvana çatdırılardı. Görünür, Rusiya bu məsələdə də oyun oynayıb. Öz dominantlığını sübut etmək üçün belə siyasət yürüdüb. Hamıya bəllidir ki, erməni separatçıları orada sülhməramlıları eşidir. Onlar təzyiq etsəydi, bizim yük də buraxılardı. Sadəcə, bunu istəməyiblər. Çünki həmin yolun açılmasını istəmirlər. Arzuları budur ki, yüklər Iaçın yolu ilə birbaşa Ermənistandan keçsin. Buna nail ola bilmədikləri üçün belə davranırlar. Azərbaycan hər iki yolun paralel işlənməsini təklif edirdi. Sonda biz deyən oldu və Rusiyanın təxribatları səmərə vermədi”.
Məhəmmədəli QƏRİBLİ
.jpg)