Otuz il əvvəl Füzuli rayonu uğrunda gedən döyüşlərdə itkin düşən şəhid Hüseynov Əli Heydər oğlunun Edilli kəndində kütləvi məzarlıqda aşkarlanan nəşinin qalıqları bu günlərdə Füzulinin Yağlıvənd kəndində torpağa tapşırılıb.
Məlumat üçün bildirək ki, Hüseynov Əli Heydər oğlunun nəşinin qalıqları keçən il Xocavənd rayonunun Edilli kəndi ərazisində tapılan 12 şəxsin basdırıldığı üçüncü kütləvi məzarlıqda aşkar edilib. Həmin məzarlıqda erməni vəhşiliyinə məruz qalan, məftil və kəndirlərdən istifadə edilməklə əl-ayağı bağlanaraq kütləvi şəkildə basdırılmış 12 insan qalığı tapılıb. Kəllə sümüklərində küt alət izləri, həmçinin güllə və iti alətin deşdiyi izlər müşahidə olunub. Bu faktlar onu göstərir ki, erməni qəsbkarları əsir götürdüyü azərbaycanlıları zorakılıqla qətlə yetirib və kütləvi basdıraraq cinayət izlərini ört-basdır etməyə çalışıblar.
“Ermənilər elə bilirdi ki, onların etdiyi vəhşikliklər sirr olaraq qalacaq, ancaq…”
Azad Vətən Partiyasının rəhbəri Akif Nağı "Bakı-Xəbər"ə açıqlamasında qeyd etdi ki, işğaldan azad edilən torpaqlardan bərpa işləri aparıldıqca aşkar olunan kütləvi məzarlıqların sayı artacaq: “Azərbaycan tərəfi dəfələrlə rəsmi və qeyri-rəsmi formada beynəlxalq təşkilatların diqqətinə çatdırıb ki, ermənilər xüsusi vəhşiliklə əsirlikdə saxlanılan azərbaycanlıları qətlə yetirib. Ermənilər qadın, qoca, uşaq demədən hər bir kəsi amansızcasına öldürüb. Kütləvi məzarlıqda aşkarlandıqca o insanların hansı şəkildə qətlə yetirildiyi bir daha aydın olur. Ermənilər soydaşlarımıza elə işgəncələr veriblər ki, bunu dilə gətirən zaman insanın qanı donur. Ermənilər elə bilirdi ki, onların etdiyi vəhşikliklər sirr olaraq qalacaq. Ancaq nəzərə almaq lazımdır ki, cinayət izi gec-tez açılır”.
A.Nağı onu da əlavə etdi ki, Azərbaycan tərəfi beynəlxalq ictimaiyyəti məlum cinayətlə bağlı məlumatlandırır. Ancaq xristian təəssübkeşləri erməni cinayətlərini görməzlikdən gəlir. Eyni zamanda, həmin dövlətlər öz dövlət maraqlarını da üstün tutur. Bu səbəbdən də həmin ölkələr hər zaman Azərbaycana qarşı ədalətsiz mövqe tutur: “Azərbaycan torpaqları işğal altında olan zaman belə qərb ölkələri tərəfindən ölkəmizə qarşı biganə münasibət bəslənilib”.
Həmsöhbətimizin sözlərinə görə, erməni vəhşiliyi bu gündə davam edir. Azərbaycan tərəfindən hansısa əsgər və ya sadə vətəndaş səhvən yolu azıb Ermənistana keçərsə onlar bunu siyasi şouya çevirir. Günü bu gündə ermənilər əsirlikdə olan vətəndaşlarımızın başına olmazın müsibətlərini gətirir: “Birinci Qarabağ müharibəsi zamanı möcüzə şəklində əsirlikdən geri qaytarılan şəxslərin başlarına gələnlər insanı dəhşətə salır. Ancaq Azərbaycan erməni əsirləri ilə normal şəkildə davranıb, onlar beynəlxalq hüquq normalarına uyğun formada saxlanılıb. Bu kimi faktlar ortadadır. Dünya nə qədər kar və kor olsa da fakt faktlığında qalır”.
Günel CƏLİLOVA
