Ermənistan Qarabağda kütləvi şəkildə yeni minalar döşəyir. Bu barədə Azərbaycan Müdafiə Nazirliyi məlumat yayıb. Məlumata görə, son dövrlərdə Qarabağ iqtisadi rayonundakı Ermənistan silahlı qüvvələrinin qalıqları və qeyri-qanuni erməni silahlı dəstələrinin ərazilərimizə kütləvi şəkildə yeni minalar döşəməsi, bununla da Azərbaycana qarşı mina terroru siyasətini davam etdirməsi müşahidə edilməkdədir.
Qeyd edək ki, sentyabrın 10-da Azərbaycan ordusunun hərbi qulluqçusu Eminov Xəyyam Mahal oğlu Ağdam rayonu ərazisində bölmələrimizin təminat yolunda qeyri-qanuni erməni silahlı dəstələrinin kəşfiyyat-diversiya qrupu tərəfindən təxribat məqsədilə basdırılmış piyada əleyhinə minaya düşərək xəsarət alıb. Mühəndis-istehkam bölmələri tərəfindən həmin ərazinin minalardan təmizlənməsi işləri aparılır. Hələlik isə Ermənistan silahlı qüvvələri və qeyri-qanuni erməni silahlı dəstələri tərəfindən Azərbaycan torpaqlarında basdırılmış minalar insanların həyatına təhlükə yaratmaqda davam edir. Qeyd edək ki, 2020-ci ilin noyabrından bu yana işğaldan azad olunmuş rayonlarda 95 min hektardan çox ərazi minalardan təmizlənib. İkinci Qarabağ müharibəsi bitdikdən sonra 305 nəfər mina qurbanı olub. Onlardan 57 nəfəri həyatını itirib, qalanları isə müxtəlif dərəcəli bədən xəsarətləri alıb. Bu vaxta qədər 30 minə yaxın piayada əleyhinə mina, 17 minə yaxın tank əleyhinə mina və 40 mindən çox partlamamış hərbi sursat aşkar edilərək zərərsizləşdirilib. Minaların təmizlənməsi isə elə də ucuz başa gəlmir. Elə bu günlərdə sözügedən xüsusda Amerikanın dünyaca məşhur “Forbes” nəşri çox maraqlı məqamlara toxunub: “Beynəlxalq Qırmızı Xaç Komitəsinə görə, minanın istehsalının dəyəri 3 dollardan 75 dollara qədər nisbətən ucuz olsa da, bir minanın çıxarılması üçün tələb olunan xərc 300-1000 dollar arasında dəyişə bilər. Hətta zəngin təbii qaz ehtiyatlarına görə nisbətən varlı ölkə olan Azərbaycan üçün də bu, böyük problem yaradır. Azərbaycan minalarla mübarizədə kömək üçün APOPO-dan da istifadə edib. Təşkilat ABŞ-da qeydiyyatdan keçmiş, baş ofisi Tanzaniyada olan qeyri-kommersiya təşkilatıdır. APOPO mina təmizləmə ictimaiyyətində həm itlərdən, həm də nəhəng Afrika kisəli siçovullardan mina təmizləmə prosesində istifadə etdiyinə görə məşhurdur. Azərbaycanda yeni şeyləri və innovativ həlləri sınamaq istəyi var... Amma çətinliklər də var. Ermənistan hakimiyyəti ardıcıl olaraq minaların harada yerləşdirildiyini göstərən xəritələri təhvil verməkdən imtina edib və ya verdiyi xəritələr uğursuz olub”.
Xatırladaq ki, Ermənistan 2020-ci il 10 noyabr tarixli üçtərəfli bəyanatın 4-cü bəndinə zidd şəkildə Azərbaycan ərazilərində qanunsuz hərbi fəaliyyəti davam etdirib. Eyni zamanda, qeyri-qanuni silahlı qüvvələr hələ də Qarabağ bölgəsində qalaraq təxribatlar törədir, ərazilərə minalar yerləşdirirlər. Bütün bunlara rəğmən, beynəlxalq təşkilatlar, bir çox xarici dövlətlər Ermənistanın və onların Qarabağda Rusiya sülhməramlılarının təsir zonasında olan havadarlarının törətdiyi cinayətlərə göz yumur. Burada onu da qeyd edək ki, BMT, Avropa İttifaqı və minatəmizləmə üzrə ixtisaslaşmış təşkilatlar bu prosesdə Ukraynanın yanındadır. Onlar Ukraynanın hərbi əməliyyatlar aparılmayan bölgələrində bu problemdən tez zamanda xilas olması üçün zəruri texniki dəstəyi göstərirlər. Lakin Azərbaycana minaların təmizlənmə istiqamətində beynəlxalq səviyyədə dəstək göstərilmir. Vətən müharibəsindən sonra Azərbaycanın işğaldan azad edilmiş ərazilərində bir milyondan çox mina basdırılıb. Hətta müharibədən sonra, Laçın yolunun açıq olduğu müddətdə separatçılar havadarlarının fəal dəstəyi nəticəsində Azərbaycan ərazisinə minalar daşıyıb. Hələlik isə Azərbaycan hökuməti təkbaşına bütün resurslardan istifadə edərək işğaldan azad edilmiş ərazilərin minalardan təmizlənməsi əməliyyatlarını həyata keçirir. Müdafiə Nazirliyinin mühəndis-istehkam qoşunlarının, Dövlət Sərhəd Xidmətinin, Fövqəladə Hallar Nazirliyinin müvafiq və ixtisaslaşmış bölmələri minaların təmizlənməsi əməliyyatlarına cəlb edilib. Minatəmizləmə işlərində müasir texnikalardan istifadə edilməsinə baxmayaraq, ərazilərin kütləvi şəkildə minalarla çirkləndirilməsi, basdırılmış minaların coğrafiyasının müxtəlifliyi və bu vaxta qədər Ermənistan tərəfindən dəqiq xəritələrin təqdim olunmaması onların yerlərinin müəyyənləşdirilməsi və təmizlənməsi işlərində hədsiz çətinliklər yaradır. Bu fonda Ermənistanın ölkəmizə qarşı törətdiyi mina terroru hərbi qulluqçularımızın və mülki şəxslərin həyatını itirməsinə və ya yaralanmasına səbəb olur. Eyni zamanda, keçmiş məcburi köçkünlərin öz doğma torpaqlarına qayıdışını ləngidir, sahibkarlıq subyektlərinin fəaliyyətinə, bölgədə həyata keçirilən bərpa və yenidənqurma işlərinə maneə yaradır. Bu şəraitdə Qarabağ iqtisadi rayonundakı Ermənistan silahlı qüvvələrinin qalıqları və qeyri-qanuni erməni silahlı dəstələrinin ərazilərimizə kütləvi şəkildə yeni minalar döşəməsi Azərbaycanı bu xüsusda daha sərt addımlar atmağa vadar edə bilər. Bu halda nəticələr ermənilər üçün yaxşı olmayacaq.
Tahir TAĞIYEV
