Ermənistanın baş naziri Nikol Paşinyan 1999-cu ildə baş vermiş cinayətin açılmasına böyük əhəmiyyət verir, vətəndaşlara bunun nə üçün və necə baş verdiyi, günahkarların kim olduğu barədə konkret açıqlamalar verir.
Paşinyan İrəvanda İdman-Konsert Kompleksi qarşısında Karen Dəmirçiyanın abidəsinin açılışında deyib ki, Dəmirçiyanın abidəsinin paytaxtda çox layiqli yerdə görünməsindən məmnundur: “Mən inana da bilmirəm ki, Karen Dəmirçiyana atəş açan əlin erməni xalqı, Ermənistan xalqı ilə hər hansı mənəvi, dəyərli, insani əlaqəsi ola bilər. Mən buna inana bilmirəm. İnana bilmirəm ki, bu torpağın, bu suyun yetişdirdiyi kimsə Karen Dəmirçiyanın qətlini təşkil etmək fikrinə düşə bilər. Bu, şəxsə qarşı cinayət deyil, Ermənistan Respublikasına qarşı cinayət idi”.
Paşinyan qeyd edib ki, çoxları bu məsələyə bütün mürəkkəbliyi ilə aydınlıq gətiriləcəyini və aydınlaşdırılacağını gözləyir. Onun sözlərinə görə, bu gün bir çox məlum işlərə baxanda ən yüksək hökumət səviyyəsində sübutların təhrif edildiyi fenomenini görmək olar: “Ən son nümunə martın 1-də baş verən hadisədir ki, biz görürük ki, yerində atılan mərmilər yığılıb, məhv edilib, sonradan atılan mərmilər maddi sübut kimi qəbul edilib. Amma mən hesab edirəm ki, bu, erməni xalqının istəyidir”.
Bəllidir ki, Dəmirçyanın öldürülməsi Ermənistanla Azərbaycan arasında danışqlarda əldə oluna biləcək razılaşmanı pozmaq üçün atılıb. Bu məsələdə erməni millətçilərlə Rusiyanın əli olduğu versiyası daha çox səslənir. Onda isə Paşinyan bu məsələnin üstünə getməklə faktiki olaraq Rusiyanı nüfuzdan salmış olurmu?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Nikol Paşinyan siyasətə Ter-Petrosyanın köməkçilərindən biri kimi gəib: “Sonra, Aşot Biryanla da yaxın münasibətləri olub. Ancaq hakimiyyətə gəldikdən sonra, sağ olan bütün yaxın silahdaşları ilə münasibətləri pozulub. Bu gün erməni siyasətində açıq şəkildə Paşinyanı müdafiə edən heç bir sabiq siyasətçi yoxdur. Paşinyan Karen Dəmirçiyanın abidəsinin açılışında iştirak edir və onun haqqında xoş sözlər söyləyir. Birinci məqsəd onun papulyarlığından faydalanmaqdır. İkincisi, indiki siyasi rəqiblərini vurmaq üçün Karen Dəmirçiyanın ölümündən istifadə etməkdir. Ən əsası Köçəryanı günahlandırmağa çalışır. Demək ki, cinayət anında müəyyən maddi sübutlar bilərəkdən yox edilib. Cinayətin izlərini itirməyə cəhd göstərilib. Üçüncü səbəb isə, növbəti dəfə Rusiyanın bostanına daş atmaqdır. “Karen Dəmirçyanı vuran erməni ola bilməz”, deyərək bu cinayətin xaricdə Rusiya tərəfindən hazırlandığını iddia edir. Xatırlayırsızsa, Dəmirçian İstanbul Sammiti ərəfəsində öldürüldü. Həmin dövrdə məlum idi ki, Sammitdə imzalamaq üçün sənəd hazırdı və bu həm Ermənistanda, həm də Azərbaycanda çox ciddi narazılıqla qarşılanmışdı. Hətta, Azərbaycan prezidentinin katibliyinin rəhbəri Eldar Namazov, beynəxlq məsələlər üzrə dövlət müşaviri Vəfa Quluzadə və xarici işlər naziri Tofiq Zülfüqarov həmin təklifə etiraz olaraq istefa vermişdilər. Eyni narazılıq Ermənistanda da var idi. Son nəticə də Ermənistan parlamentində törədilən kütləvi qətl bu prosesi də pozdu. Düzdür, həmin təklif yenidən Ki-Uest danışıqlarında ortaya qoyuldu,qəbul edilmədi. Bu gün biz çox sevinirik ki, İstanbul Sammitində və sonra sənəd müzakirə olunmadı. Azərbaycanın bugünki nəaliyyətləri bizim ağlımıza gəlməyəcək qədər çoxdur. Həmin təkliflər, xüsusilə ordakı qeyri - bərabər ərazi mübadiləsi Azərbaycanın marqqlarına qəti cavab vermirdi. Karen Dəmirçyanın haqqında bu qədər xoş sözlər söyləməklə Paşinyan Rusiya haqqında söylədiyi təhlükəli bəyanatlara birini də əlavə etdi. Onun söylədiklərini çox diqqətlə izləyən Moskva bu məsələni də lazımi qaydada qeyd etdi. Bundan əvvəl Paşinyanın “Ukrayna müharibəsində Rusiyanın müttəfiqi deyilik” bəyənatına Peskov qısa şəkildə cavab vermişdi. Bu bəyanatlar da Rusiya tərəfindən nəzərə alınacaq. Hadisələr, Qarabağ ermənilərinin davranışları ona doğru gedir ki, Azərbaycan yaxın dövrdə anti-terror əməliyyatı keçirmək, Qarabağ ərazisindəki cinayətkar dəstələri tərksilah etmək məcburiyyətində qalacaq. Paşinyanın da bu bəyanatları ona aparıb çıxaracaq ki, Rusiya bu məsələdə ya neytral mövqe tutacaq, ya da Azərbaycana kömək göstərməyə çalışacaq. Ona görə də, hesab edirəm ki, bilərək, yaxud bilməyərək bu bəyanatları verməsindən asılı olmayaraq, Paşinyan Azərbaycana xidmət etməkdə davam edir. İstərdik ki, onun anti- rus bəyanatları bununla başa çatmasın. Paşinyanın Rusiyaya qarşı dediyi sözlər, düşüncələr var ki, onun səsləndirilməsi Ermənistan Rusiya münasibətlərinin gərginləşməsinə, Rusiyanın növbəti dəfə Ermənistanı cəzalandırmaq istəyinə gətirib çıxarq bilər. Bu isə Azərbaycanın maraqlarına cavab verir. Azərbaycan hakimiyyəti hər zaman olduğu kimi, bu dəfə də Paşinyanın yaratdığı imkanlardan maksimum yararlanmağa çalışacaq”.
Məhəmmədəli QƏRİBLİ
