Məlum olduğu kimi, Ermənistanın Rusiyadakı səfiri Vaqarşak Arutunyan bu ölkənin Xarici İşlər Nazirliyinə çağırılıb.
Rusiya XİN-in yaydığı məlumata görə, Rusiya tərəfi son vaxtlar Ermənistan rəsmi dairələrində və siyasi elitasında Kollektiv Təhlükəsizlik Müqaviləsi Təşkilatına (KTMT) üzvlük və ikitərəfli müttəfiqlik əlaqələrinin davam etdirilməsi ilə bağlı, eləcə də Ermənistan-Azərbaycan münasibətlərinin normallaşdırılmasına dair 2020-2022-ci illərdə Moskva, Bakı və İrəvan tərəfindən imzalanmış sazişlərin həyata keçirilməsinə müəyyən şübhələrin olduğunu qeydə alıb.
Məlumatda deyilir ki, bu fonda Ermənistan rəhbərliyi bir sıra tədbirlər, o cümlədən Roma statusunun ratifikasiya edilməsi, baş nazirin arvadı Anna Akopyanın Kiyevə səfər etməsi və humanitar yardım aparması, Ermənistan ərazisində ABŞ-ın iştirakı ilə hərbi təlimlər keçirilməsi kimi qeyri-dost tədbirlər həyata keçirir.
Bununla əlaqədar, Rusiya XİN Ermənistanın Moskvadakı səfiri Vaqarşak Arutunyanı xarici siyasət idarəsinə çağıraraq kəskin etiraz edib və ona nota verib.
Notada Ermənistan parlamentinin sədri Alen Simonyanın Rusiya XİN-in rəsmi nümayəndəsi, informasiya və mətbuat departamentinin direktoru Mariya Zaxarovanın və bütövlükdə Rusiya XİN-in ünvanına təhqiredici ifadələr işlətməsinin yolverilməzliyi də əksini tapıb. Bundan əlavə, sənəddə jurnalist Gevorkyan və bloger Badalyanın saxlanılması ilə bağlı narahatlıq ifadə olunub.
O da vurğulanır ki, Rusiya və Ermənistan müttəfiq olaraq qalır və tərəfdaşlıq əlaqələrinin möhkəmlənməsinə yönəldilmiş bütün razılaşmalar yerinə yetiriləcək. Rusiya XİN bunun KTMT təlimlərinin təşkili, Ermənistan-Azərbaycan münasibətlərinin nizama salınması üçün KTMT missiyasının Ermənistana göndərilməsinə də aid olduğunu diqqətə çatdırıb.
Səfirin Rusiya XİN-ə çağırılması və ona etiraz notası təqdim edilməsi faktını şərh edən erməni mediası yazır ki, müstəqil Ermənistan tarixində ilk dəfə Ermənistan səfiri Rusiya Xarici İşlər Nazirliyinə çağırılıb və ona etiraz edilib. Qeyd olunur ki, səfirə bir sıra qeyri-dost addımlarla bağlı etiraz notası təqdim edilib.
Siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “baki-xeber.com”a şərhində “Həqiqətən də Rusiya və Ermənistan arasında baş verənlər bir daha onu təsdiq edir ki, bu ölkələr arasında ziddiyyətlər xeyli kəskinləşib və açıq müstəviyə keçib. Bu iki ölkənin son 32 ildəki münasibətlərinə nəzər saldıqda ilk dəfə görürük ki, Ermənistan səfiri Rusiya XİN-ə çağırılıb, ona etiraz notası təqdim edilib. Bu hadisə birinci dəfə idi baş verirdi. Etiraz notasında da konkret məsələlər qeyd olunub. Bildiyimiz kimi, sentyabrın 11-dən Ermənistan və ABŞ hərbi təlimləri start götürəcək. Eyni zamanda Anna Akopyanın Ukraynaya getməsi və özü ilə “humanitar yardım” aparması, Beynəlxalq Cinayət Məhkəməsinin Roma statusunun təsdiq üçün Ermənistan parlamentinə göndərilməsi və digər bu kimi məsələlər etiraz notasında göstərilir. Görünür ki, bu da çox ciddi şəkildə Rusiyanı narahat edir” - deyə bildirdi.
M.Məmmədlinin sözlərinə görə, bu olanlar bir daha təsdiqləyəcək ki, Ermənistan tədricən Rusiyanın təsir dairəsindən çıxır, çıxmağa çalışır, bu da Rusiya tərəfindən böyük narahatlıqla, eyni zamanda da narazılıqla qarşılanır. “Baş verənlər də Ermənistan Azərbaycan arasında gərginliyin yenidən artması fonunda baş verir ki, bu da bir çox təhlilçilər, beynəlxalq ictimai rəy tərəfindən də diqqətlə izlənir” - deyə M.Məmmədli əlavə etdi.
İradə SARIYEVA
