Moskvanın narahatlığına və Ermənistan rəsmilərini sərt tənqid etməsinə baxmayaraq, İrəvan hələə də iki ölkə arasında münasibətlərində heç bir gərginliyin olmadığını iddia edir. Ermənistan xarici işlər nazirinin müavini Paruyr Hovhannisyan parlamentdə diplomatik danışarkən bu xüsusda qeyd edib: ətrafında müzakirələr gedən fikir ayrılıqları var: “Gərginliklə bağlı iddiaları şərh etmək çətindir, bizim Rusiya ilə işgüzar münasibətlərimiz var və həmişə olduğu kimi, bizim bütün tərəfdaşlarla həmişə fikir ayrılığımız var, bu o demək deyil ki, bu, gərginlik kimi şərh edilə bilər”.
Bu arada Rusiya həm Roma Statutunun ratifikasiya prosesi, həm də erməni-amerikan hərbi təlimləri ilə bağlı narahatlığını ifadə etməkdə davam edir. Eyni zamanda, Ermənistan və Rusiyanın yüksək rütbəli məmurlarının bir-birinə cavab verdikləri diplomatik tərz getdikcə sərtləşir, təhqiramiz bəyanatlara qədər gedib çıxır. Bu vəziyyətə baxmayaraq, Ermənistan parlamentinin Xarici Əlaqələr Komitəsinin sədri Sarkis Xandanyan iddia edir ki, Ermənistan-Rusiya münasibətlərində yeni heç nə baş vermir, sadəcə olaraq, strateji müttəfiq üçün Ermənistanın uzun müddətdir cavab ala bilmədiyi suallar var: “Mən münasibətləri gərginləşdirmək istəmirəm, amma deyirəm ki, faktlar qeydə alınır. Bu faktlar təkcə bu gün deyil, dünən də, əvvəlki aylarda da qeydə alınıb”. Gələn həftə başlayacaq erməni-amerikan hərbi təlimlərinə və bununla bağlı Rusiyanın narahatlığına toxunan Xandanyan vurğulayıb: “Ermənistan ərazisində erməni-amerikan hərbi təlimlərinin keçirilməsi qərarı Ermənistanın suveren qərarıdır. KTMT-nin üzvü olan Ermənistan heç bir halda öz suverenliyini itirmir, xüsusən də KTMT-nin Ermənistanda və Ermənistana münasibətdə iş üslubunu nəzərə alsaq. Mən başa düşürəm ki, müxtəlif tərəflərin narahatlığı ola bilər və narazılıq ifadə edə bilər, lakin bu, Ermənistanın suveren qərarıdır. Mən də hesab edirəm ki, bu həm də Ermənistan-Amerika münasibətlərinin dərinləşməsinin nəticəsidir”. Bu arada ABŞ-ın Ermənistandakı səfirliyi bildirib ki, “biz hərbi qüvvələrimiz arasında hazırlığı təmin etmək və operativ qarşılıqlı əlaqəni daim təkmilləşdirmək üçün tərəfdaşlarımızla daim təlimlər keçirir və işləyirik”. “Sentyabrın 11-20-də Ermənistanda keçiriləcək erməni-amerikan hərbi təlimləri müstəqil Ermənistanın tarixində ilkdir, yoxsa NATO çərçivəsində keçirilən hərbi təlimləri nəzərə almasaq, başqa hərbi təlimlər olubmu” sualına səfirlik belə cavab verib: “Ermənistan ABŞ-ın çoxdankı tərəfdaşıdır və ABŞ Müdafiə Nazirliyinin Dövlət Tərəfdaşlığı Proqramı vasitəsilə 2003-cü ildən Kanzas Milli Qvardiyası ilə güclü tərəfdaşlıq edir. Amerika və erməni birləşmələri Ermənistanda, ABŞ-da və digər ölkələrdə birgə hərbi təlimlərdə iştirak edib və belə təlimlər Ermənistanda 2003, 2006 və 2008-ci illərdə keçirilib”. Buna baxmayaraq, qarşıdan gələn hərbi təlimlərlə bağlı məlumatlar rəsmi Moskvada narahatlıq yaradıb. Rusiya prezidentinin mətbuat katibi Dmitri Peskov bildirib ki, Ermənistanın ABŞ-la birgə təlimlər keçirmək niyyəti narahatlıq doğurur. Rusiya xarici işlər nazirinin müavini Sergey Ryabkov isə erməni-amerikan təlimlərini şərh edərkən deyib ki, Moskva Kollektiv Təhlükəsizlik Müqaviləsi Təşkilatının üzvlərinin öz müttəfiqləri ilə təlimlər praktikasına riayət etməsini istəyir: “Rusiya Ermənistandakı müttəfiqlərinə ciddi şəkildə çatdırdı ki, onların ABŞ-la keçirdiyi təlimlər Moskvada narahatlıqla qarşılanır. Moskva KTMT ölkələri ilə təlimlər praktikasına riayət etməyin tərəfdarıdır”.
Mövcud vəziyyətdə Ermənistanın KTMT-dən çıxmasının mümkün olub-olmaması ilə bağlı suala Ermənistan parlamentinin Xarici Əlaqələr Komitəsinin sədri Sarkis Xandanyan cavab verib ki, hazırda Ermənistanın KTMT-dən çıxması prosesi getmir. Bununla yanaşı, Moskva Rusiya prezidenti Vladimir Putinin həbsinə order verən Beynəlxalq Cinayət Məhkəməsinin Roma Statutunun ratifikasiyasından da narahatlığını bildirib. Sarkis Xandanyan deyir ki, onun fikrincə, Ermənistan parlamenti Roma Statutunu ratifikasiya etməlidir. Üstəlik, hökumət bu sənədi heç bir qeyd-şərtsiz parlamentə göndərib: “Əgər siz nizamnaməni oxusanız, görərsiniz ki, burada, məsələn, son iki il ərzində, Azərbaycanla münaqişədə baş vermiş bir sıra hərbi cinayətlərdən bəhs olunur. Fikrimcə, bu nizamnamənin ratifikasiyası Ermənistan Respublikasının dövlət maraqlarından irəli gəlir və hesab edirəm ki, qeyd-şərt üçün heç bir əsas yoxdur”. Bir neçə gün əvvəl Moskva Ermənistan hökumətinin Roma Statutunu ratifikasiya üçün parlamentə göndərməsi ilə bağlı İrəvandan açıqlama istəyib. Bu izahatların artıq Moskvaya verilib-verilmədiyi bəlli deyil. Bunlar fonunda daha bir qalmaqal Ermənistanda rusiyapərəst bloger Mika Badalyan və “Sputnik Ermənistan” radiosunun icmalçısı Aşot Gevorkyanın saxlanılmasıdır. Qeyd edilir ki, M.Badalyan, A.Gevorkyanla birlikdə daha beş nəfər odlu silahların qanunsuz dövriyyəsində şübhəli bilinərək saxlanılıblar. İstintaq Komitəsinin mətbuat katibi Qor Abramyan feysbukdakı səhifəsində yazıb ki, onlar Cinayət Məcəlləsinin qanunsuz olaraq silah əldə etmə, satma, saxlama, daşıma, çatdırma maddələri ilə saxlanılıblar. Faktla bağlı istintaq qrupu yaradılıb, istintaq tədbirləri davam etdirilir. “Rossotrudniçestvo”nun rəhbəri Yevgeni Primakov özünün teleqram kanalında Mika Badalyanın naməlum maskalı şəxslər tərəfindən oğurlanması barədə məlumat verib. Rusiya Xarici İşlər Nazirliyinin rəsmi nümayəndəsi Mariya Zaxarova da vəziyyəti şərh edərək, bunun İrəvanda keçirilən Rusiya-Ermənistan media forumu ilə bağlı növbəti təxribat olduğunu bildirib: “Yatıb iki ölkə arasında münasibətləri necə pozacağını görənlərin təxribatı. Qərb isə buna çoxlu pul yatırıb. Biz vəziyyətin inkişafını diqqətlə izləyirik. Saxlanılanların taleyindən narahatıq, insidentin baş vermə şəraitini aydınlaşdırmaq üçün addımlar atacağıq”.
Samirə SƏFƏROVA
