Avropa İttifaqının (Aİ) Ermənistandakı Monitorinq Missiyası Azərbaycan-Ermənistan sərhədində patrul fəaliyyətini artırıb. Bu barədə missiyanın "X" (tvitter) sosial şəbəkə hesabında qeyd edilib.
“Aİ Monitorinq Missiyası hərbi vəziyyətdə hər hansı dəyişikliyi müşahidə etmək üçün Ermənistanın Qeqarkunik və Sünik vilayətlərinin Azərbaycanla sərhəd ərazilərində patrul fəaliyyətini artırıb. Biz regionda mövcudluğumuz vasitəsilə gərginliyin aradan qaldırılmasına və vəziyyətlə bağlı Aİ-ni qərəzsiz hesabatına töhfə verməyi hədəfləyirik”, - deyə paylaşımda bildirilib.
Xatırladaq ki, bu il 21 fevral tarixində Avropa İttifaqının (Aİ) Ermənistana göndəriyi mülki missiya (EUMA) fəaliyyətə başlayıb. Avropa Xarici Fəaliyyət Xidmətinin (EEAS) mülki planlama və davranış (CPCC) üzrə idarəedici direktoru Stefano Tomat əməliyyatın mülki komandanlığı vəzifəsini yerinə yetirəcək, missiyaya rəhbərliyi isə Markus Ritter edəcək. Missiyanın ilkin mandatı iki ili əhatə edir.
Maraqlıdır, Aİ-nin Monitorinq Missiyasının fəaliyyətinin gücləndirilməsində məqsəd nədir?
“Rusiya-Ermənistan münasibətlərinin gərginləşməsi fonunda, Aİ-nin bu yöndə aktivliyini artırması təsadüfi deyil”
Məsələ ilə bağlı fikirlərini “Bakı-Xəbər”lə bölüşən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov bunun səbəbini son günlər erməni tərəfinin yaratdığı ajiotajla əlaqələndirdi: “Məlum olduğu kimi, son günlər Ermənistan rəsmiləri və ölkə mediası davamlı olaraq hay-həşir salırlarki, Azərbaycan eskalasiyaya hazırlaşır. Qarabağa və Ermənistan sərhəddinə ordu birləşmələri cəmləyir. Bunu necə var dünyanın bir sıra aparıcı media resursları da tirajlayır. Əsasən də təbliğat o istiqamətə yönəldilib ki, guya Azərbaycan Meğri rayonunu güc yolu ilə ələ keçirəcək. Aİ-nin Ermənistandakı Monitorinq Missiyası da bunu əlində əsas götürərək Ermənistanın iki vilayətində patrul xidmətini gücləndirir. Guya ki, yaranan eskalasiya zamanı bunlar toqquşmaları qeydə alıb hesabat hazırlayacaqlar. Əslində isə Avroittifaqın məqsədi Monitorinq Missiyası adı altında Ermənistanda fəaliyyət sferasını genişləndirmək, müşahidəçilərin sayını artırmaqdır. Çünki Rusiya-Ermənistan münasibətlərinin gərginləşməsi fonunda, Aİ-nin bu yöndə aktivliyini artırması təsadüfü deyil. Bütün bunlar arasında heç şübəsiz ki, bu və ya digər dərəcədə əlaqə var. Hesab edirlər ki, qurum Ermənistanda Rusiyanı əvəz etməyə hər an hazır olmalıdır. İstisna deyil ki, bütün bu oyunlarda Fransanın xüsusi rolu var. Biz unutmamalıyıq ki, biləvasitə Fransanın fəaliyyəti sayəsində Avvropa missiyasının iki il müddətinə Ermənistana yerləşdirilməsinə qərar verildi. Ona görə də yeni oyunların hazırlanması istisna deyil”.
Vidadi ORDAHALLI
