Avropa Birliyinin xarici siyasət və təhlükəsizlik məsələləri üzrə ali nümayəndəsi Jozep Borrell deyib ki, Azərbaycana qarşı heç bir sanksiya tətbiq edilməyəcək:
“Azərbaycan həqiqətən də bizə yanacaq verir, daha doğrusu, milyardlarla kubmetr qaz satır. Bu il imzalanmış müqavilə sayəsində biz həcmləri əhəmiyyətli dərəcədə - 8-12 milyard kubmetr artıracağıq. Avropa Komissiyasının sədri şəxsən bu saziş üzrə danışıqlar aparmaq üçün Azərbaycana səfər edib. Bu, avropalıların qışda çox ehtiyac duyduğu enerji resurslarını əldə etmək imkanı verəcək”.
AB-nin bu mövqeyini necə şərh etmək olar?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, bu hadisə, Jozep Barelin belə bir münasibəti, ümumiyyətlə avropalıların Azərbaycanla bağlı düşündükləri, Azərbaycan diplomatiyası son illər ərzində gördüyü işlər nəticəsində həqiqətən də çox sağlam və qarşılıqlı münasibətlər vektorunu qura bilməsindən xəbər verir: “İndi Ermənistan gah Qərbə , gah da Şərqə doğru yıxılır. Ölkə daxilində hərcmərclikdi, siyasi qüvvələr bir - birini qırır. Bəziləri deyir ki, biz Qərbə doğru meyl götürməliyik, bəziləri də Şərqə sadiq qalmağın zəruri olduğunu deyir. Bütün bunlar nədən xəbər verir? Biz deyəndə ki, Azərbaycan dövlətinin siyasəti taraz siyasətdir, onu nəzərdə tuturuq ki, həm Şərqlə, həm Qərblə eyni səviyyədə işguzar münasibətlərimizi qura bilmişik. Eləcə də Avropa ilə bağlı tarazlığımızı qorumuşuq. Avropa özlüyündə asan bir istiqamət deyil. Avropalılar çox şıltaq, bəzi hallarda aqresiv, bəzi hallarda isə xristian təəssübkeşliyi ucbatından türkəfob və islamafob bir mövqedən çıxış edirlər. Amma, Azərbaycan hələ Heydər Əliyevin dövründən özünü Avropaya necə göstərdisə,addım - addım biz Qərbi özümüzə yaxınlaşdıra bildik. Onlara başa saldıq ki, Ermənistanla münasibətlərimizin kökündə dini amil durmur, Ermənistanın ərazi iddiaları nəticəsində meydana gəlmiş bir qarşıdurmadır. Azərbaycan multikultural dəyərlərə söykənən dövlət qurub və bu hüquqi dövlətdir. Burada bütün mexanizmlər hamısı işləyir. Ona görə də, Avropa anladı ki, Azərbaycan diplomatiyasına diqqət yetirmək lazımdır. Son illər ərzində Ursula von der Leyen xanım gəldi, enerji memarandumuna imza atdı. Azərbaycan Prezidenti Buxarestdə yaşıl enerjinin Avropaya göndərilməsi ilə bağlı daha bir sənədə imza atdı. Bütün bunlar onu göstərir ki, biz enerji amilini öz diplomatiyamızın əsas elementinə çevirə bildik. Hər şey enerji amili ilə bitmir. Bizim xeyli sayda, 9 Avropa İttifaqının ölkəsi ilə yaxşı münasibətlərimiz var. Çox böyük sənədlər toplusunu qəbul edib, imzalamaqla, həm də münasibətlərin hüquqi bazasını gücləndirmişik. İstər - istəməz, avropalılar, Avropa Birliyinin rəhbərləri gözəl anlayırlar ki, Azərbaycan münasibətlərdə çox dəqiq hesablamalar əsasında hərəkət edir. Heç bir prosesdə sui - istifadələrə yol vermir. Digər tərəfdən, ölkənin rəsmiləri dedikləri vədlərə vaxtında əməl edirlər və nə dərəcədə Azərbaycan ciddi bir tərəfdaşdır. Burda ermənilərə tərəfkeşlik edən qüvvələr də az deyil. Ancaq, yavaş - yavaş onların mövqeləri zəiflədi. Çünki, Azərbaycana üstünlük verən qüvvələrin əşyayi- dəlilləri, sübutları o dərəcədə inandırıcı və güclüdür ki, qarşı tərəfin də arqumentləri qeyri - ciddi görünür. Ona görə, bəzi hallarda ermənilərin demaqogiya dalğasında belə bir fikirlər eşidirik ki, guya Qərb Azərbaycanın nefti və qazı ucbatından demokratiyanın dayaqlarını bada verir. Amma, bunlar hamısı uydurmalardı. Çünki, əgər Ermənistan bildirirsə ki, onlarda demokratiya çox inkişaf edib, demək yalandır. Orada hansı demokratiyanın göstəricilərindən danışmaq olar ki, onlar Qərbi valeh edə bilsinlər? Yoxdur onlarda elə demokratiyanın meyarları. Odur ki, Azərbaycana bütün proseslər sabit dalğa ilə inkişaf edir. Biz Qərbə inteqrasiyamızı gücləndiririk. Yadınızdadırsa, Heydər Əliyev İstanbul Sammitində də, Budapeşt Sammitində də qeyd etmişdi ki, Azərbaycan hərbi - siyasi bloklara qoşulmaq niyyətindən uzaqdır. Bizim üçün əsas inteqrasiyadır. Biz Qərbə, Avropaya doğru inteqrasiyamızı get - gedə gücləndirəcəyik. Ona görə də, bu gün görürük ki, Avropa İttifaqında Azərbaycana qarşı çox böyük diqqət var. Azərbaycanla bağlı ümidlər özünü doğruldur. Burda heç bir pafos yoxdur. Biz bərabərhüquqlu münasibətlərimizin inkişafında maraqlıyıq və əlimizdən gələni edirik. Ona görə də, Jozep Borrel belə açıqlamalar verir. Özü də mürəkkəb siyasətçilərdəndir. Bəzi hallarda anlaşılmaz fikirlərə yer verir. Amma , bu dəfə biz görürük ki, həqiqətən də Azərbaycanla bağlı ümidverici mövqe tutaraq, həqiqətləri özündə əks etdirir və bildirir ki, Azərbaycan Avropa üçün çox vacib tərəfdaşdır”.
Məhəmmədəli QƏRİBLİ
