Xəbər verildiyi kimi Ermənistanın müdafiə naziri Suren Papikyan yunan Kiprinə səfərini ləğv edib. Buna səbəb kimi Azərbaycanla sərhəddə vəziyyətin gərginləşməsini göstərib. Dünəndən başlayaraq Ermənistan mediası İrəvandan sərhədə doğru irəliləyən hərbi kalonun görüntülərini də yayıb.
Bütün bunlar Paşinyan başda olmaqla Ermənistan rəsmilərinin “Azərbaycan hücum edəcək” iddiaları fonunda baş verir və aydın görünür ki, rəsmi İrəvan Bakıdan beynəlxalq müstəvidə şikayət etmək üçün sərhədboyu ərazilərdə genişmiqyaslı təxribatlara hazırlaşır.
Hərbi mənbələrə istinadən yayılan məlumatlar da bu yöndədir. Ermənistanın Azərbaycanla şərti sərhəddə 1,2,3 və 4-cü hərbi korpusları fəal şəkildə gücləndirdiyini, həmçinin son həftələr İran ərazisindən zirehli texnika və artilleriya mərmilərinin hərbi birləşmələrə çatdırılması barədə məlumatlar var.
Baş verənlər sərhəddə yeni eskalasiya gözləntisini artırır. Və bu sual önə çıxır: Ermənistanı yeni müharibəyə kim təhrik edir-Rusiya, yoxsa Fransa?
Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, Ermənistanı yeni müharibəyə onun bütün yeni müttəfiqləri sürükləyir:”Ermənistan marionet ölkədir. Onun heç vaxt vahid doktrinası və ideoloji xətti olmayıb. Onların yeganə işi-gücü türk dünyasına qarşı döyüşmək, təxribat törətməkdən ibarət olub. Onlar bütün enerjilərini Türkiyə və Azərbaycanla düşmənçiliyə həsr ediblər. Bu düşmənçiliyin arxasında dayanan güclər var. O güclər ki, Qarabağ probleminin tarixə qovuşmasını istəmirlər. Məsələn, Fransa. Bu ölkə Ermənistandan daha çox Qarabağ haqqında danışır. Makron özünü Paşinyandan daha çox erməni kimi göstərir. Erməni lobbisi, Rusiya, hətta İran onlara açıq dəstək verir. İran hətta Ermənistana müdaxilə olacağı təqdirdə, biganə qalmayacağı kimi məsuliyyətsiz bəyanatla çıxış edib. Bütün bu planların arxasında Cənubi Qafqazda maraqları toqquşan ölkələrin istəkləri dayanır. Paşinyan “ Azərbaycanın ərazi bütövlüyünü tanıyıram” deyir, ancaq həmin ölkələr özlərini didib-tökür ki, niyə belə deyilir? Rusiya açıq şəkildə bu bəyanata öz etirazını bildirir. Hətta öz aralarında problem olan ölkələr belə bu məsələdə Azərbaycana qarşı səfərbər olublar. Bütün dünyanı çalxalayan güclər var, onların işi-gücü öz dövlət maraqlarını təmin etməkdir. Həmin ölkələrin: Suriyada, İraqda, eləcə də Azərbaycanda nə maraqları var? Təbiidir ki, öz dövlət maraqlarını təmin edirlər. Onları heç erməni xalqının da taleyi maraqlandırmır. Belə yanaşma növbəti problemə gətirib çıxaracaq. 44 gündə qalxan “dəmir yumruq” bir qədər mərhəmətli oldu. Torpaqlarımızın böyük əksəriyyətini döyüşsüz aldıq. Bu dəfə mərhəmətə yer qoymurlar. Bütün bunları sonu erməni xalqını faciəyə sürükləməklə nəticələnəcək. Mən arzu edirəm ki, növbəti bir müharibə dalğası baş qaldırmasın. Çünki bu, Ermənistana çox baha başa gələ bilər”.
Məhəmmədəli QƏRİBLİ
