Azərbaycan dövlət müstəqilliyini bərpa etdikdən sonra İran adlanan molla rejimi Xomeyniçiliyi və "fars şiəliyi"ni yaymaq üçün ölkəmizin daxilində öz emisarları vasitəsilə təbliğat işi aparıb. Təəssüf ki, vətəndaşlarımız arasında mollaların toruna düşənlər də, onların qulluğunda qul kimi dayananlar da, ona casusluq edənlər də olub.
Məlum olduğu kimi, Azərbaycanda İranın casus şəbəkəsinə qarşı əməliyyatlar keçirilib. Həyata keçirilən əməliyyat tədbirləri nəticəsində molla rejiminə xidmət edən və onları təbliğ edən şəxslər saxlanılıb. Bu əməliyyatlar indi də İran casuslarının üzə çıxarılıb ifşa edilməsi istiqamətində davam edir.
MOUZE Telegram kanalı məlumat yayıb ki, molla rejimi Azərbaycanda həbs edilən casuslarını "qəhrəmanlaşdırır".
Məlumatda bildirilir ki, molla rejiminin nümayəndələri və bəzi adı azərbaycanlı olanlar Kərbəla yolunun üstündə Azərbaycanda həbs edilən İran casuslarının fotolarını vurublar. Fotolar elə bir yerə vurulub ki, insanlar onu görə bilir. Molla rejimipərəstlər Azərbaycan haqda hədyanlar danışırlar, o casusları isə "göylərə" qaldırırlar. Həyata keçirdikləri təbliğatla guya onları Hüseyn yolunun , Kərbəla yolunun "fədailəri" kimi qələmə verməyə çalışırlar, casusları "qəhrəmanlaşdırırlar" .
"Əslində, həbs edilən casuslar heç molla rejiminin vecinə də deyil, sadəcə onların şəkillərini Kərbəla yolunun üstündən asmaqla özünü" təəssübkeş" kimi qələmə vermək istəyir"
BAO sədrinin müavini Babək Türkoğlu "Bakı-Xəbər"ə şərhində bildirdi ki, İrana casusluq etdikləri və molla rejiminin siyasətini yaydıqları üçün həbs edilən Azərbaycan vətəndaşları Tehran rejiminin qurbanlarıdır. B. Türkoğlu vurğuladı ki, bu gün molla rejiminin onları "qəhrəman" kimi təqdim etməsi, "fədai" kimi qələmə verməsi sırf təbliğat məqsədi daşıyır. "Onlar" fədai" deyillər. Bu adamlar dünyaya islamı yox, islam pərdəsi altında narkotiki, terroru yayan, insanları zəhərləməklə məşğul olan, bölgəni, dünyanı terror təhlükəsi ilə üz-üzə qoyan sözdə İran İslam Respublikası olan, əslində isə Xaşxaşilərin yolunu gedən bir ölkənin "fədailəridir". Həbs olunan casuslar "islam" adı altında gizlənən terrorçu qrupların üzvləridirlər. Azərbaycan dövlətinə xəyanət edib molla rejiminin təbliğatçısı olan bu adamlar Həsən Sabbahın yolunu davam etdirən mollakratiyanın "fədailəridir" . Təbii ki, bunların içində aldadılaraq casus şəbəkəsinə cəlb edilənlər də var. Guya İmam Hüseynin "yolu" ilə gedən bir ölkə olduğunu iddia edən mollakratya təəssüflər olsun ki, yenidən farsçılıq, persçilik, imperiyaçılıq "ənənəsini" dirçəltmək istəyir. Bu çürük amal uğurunda insanların dini duyğularından istifadə edərək onları öz çirkin əməllərinin qurbanına çevirirlər. Fars-molla rejiminin "qəhrəmanlaşdırdığı" casuslar mollakratiyanın qurbanlarıdırlar"- deyə qeyd edən B Türkoğlunun sözlərinə görə, casus şəbəkəsində olan insanların bəziləri savadsızlıqdan, bilgisizlikdən və cahillikdən onlara inanıblar. Müsahibimiz qeyd etdi ki, günümüzdə onların təbliğ etdiyi xurafata uyanlar da az deyil. "Mollakratiya onların inancından, Allaha olan sevgisindən sui istifadə edib. Bu terrorçu rejim öz mənafeyi üçün hər cür məsələdən istifadə edir. Biz bunu açıq şəkildə görə bilirik. Bu gün İraqda, Suriyada, Yəməndə, bir sözlə, harda İran varsa orada terror, qətlam, səfalət var. Bunlar necə İmam Hüseyn yolunu gedirlər ki, Urmuda o boyda gölümüzü susuz qoyub milyonlarla insanın həyatını təhlükəyə atırlar. Bu rejimin çirkin niyyətləri aşırı dərəcədədir. İran adlanan ölkə. İmam Hüseynin yox, Yezidin, Müaviyənin yolu ilə gedir. Onlar insanların dini inancından öz məqsədləri üçün istifadə edirlər. Tehran rejimini xüsusi əməliyyat nəticəsində saxlanılan İran casuslarının həyatı zərrə qədər maraqlandırmır. Əslində, həbs edilən casuslar heç molla rejiminin vecinə də deyil, sadəcə onların şəkillərini Kərbəla yolunun üstündən aşmaqla özünü "təəssübkeş" kimi qələmə vermək istəyir. Molla rejimi öz çirkin hədəfinə çatmaq üçün milyonlara insanı qurban verər. Həmin adamlar əslində bunlar üçün qurbanlıqdır. Bütün məsələləri təhlil etdikdə görürük ki, İran Həsən Sabbahın yolunu davam etdirməkdədir. Bölgədə bütün müsəlman ölkələri ilə düşmənçilik edir, amma xristian erməni ilə qardaşlıq münasibətindədir. Çünki ikisi də Azərbaycan dövlətinə qarşı düşmənçilik edir"-deyə B. Türkoğlu qeyd etdi.
Əli TURABOV
