Ermənistanın baş naziri Nikol Paşinyanın arvadı Anna Akopyan (Hakobyan) yalançılıqda və düzməcə quraşdırmaqda heç də ərindən geri qalmır, hətta şərait yarananda ondan bir addım irəli gedir.
A.Akopyan Ukraynanın birinci xanımı Yelena Zelenskanın dəvəti ilə sentyabrın 6-da Kiyevdə keçirilən “Birinci Ledilər və Centlmenlərin üçüncü zirvə toplantısı”ndə iştirak edib. "Psixi sağlamlıq: Gələcəyin Dayanıqlığı və Zəifliyi" mövzusunda təşkil edilən tədbirdə çıxış edən Akopyan timsah göz yaşı axıdaraq qeyd edib ki, XXI əsrdə “Həlak olmuş uşaqlar” sərgisinin olması, bombardman nəticəsində uşaqlarda çapıqlar olması, XXI əsrdə mühasirədə, ac və ürəyində soyqırım qorxusu olan uşaqların olması normal deyil. Elə bilməyin, Akopyan bu sözləri Ukraynada həlak olan uşaqların müsibətinə acıdığı üçün deyib. Xeyr, o sadəcə öz yalanlarını sırımaq üçün bu məqama toxunub. Akopyan yalandan iddia edib ki, guya Qarabağda 30 min uşaq “qida çatışmazlığından əziyyət çəkir”. Dünyanın gözünə kül üfürmək istəyən Annanın əsas məqsədi uydurduğu yalanın daha çox adama, ölkəyə çatmasıdır. Xankəndinin “blokada”da olması da, orada uşaqların “acından ölməsi” də, başqa iddialar da blefdir. O, elə bilir ki, Ukraynada danışdığı yalan ayaq tutub yeriyəcək, yanılır...
“Akopyan saxtakar olduğunu göstərdi”
Müstəqil.az-ın baş redaktoru Faiq Balabəyli “Bakı-Xəbər”ə bildirdi ki, Anna Akopyan öz millətinin xarakterinə uyğun hərəkət edib. F.Balabəylinin qeyd etdiyinə görə, yalan danışmaq ermənilərə xasdır: “Yalan danışmaq, şər-böhtan atmaq, öz məqsədinə çatmaq üçün yalandan göz yaşı axıtmaq ermənilərin canına-qanına hopub. Bizim torpaqlarda yaradılan Ermənistan adlı ölkənin apardığı dövlət siyasəti də təpədən-dırnağa yalan üzərində qurulub. Hazırda ermənilərin yaşadığı Xankəndidə 30 min uşağın olması iddiasının özü gülünc səslənir, çünki heç orada 30 min əhali yoxdur. Ola bilsin, saylarını kağız üzərində şişirdə bilərlər, saxta rəqəmlər çıxara bilərlər, amma orada onların sayı qətiyyən çox deyil. Bu gün Ukraynada “ac uşaqlardan”, uydurma “blokada”dan “uşaqların soyqırım qorxusun”dan danışan Akopyan niyə dönüb geriyə baxmır? Dünyaya 30 min “ac uşaq” nağılını danışan Anna heçmi Xocalı uşaqlarının sızıltısını, fəryadını duymadı? Yaxud o sammitdə iştirak edənlər arasında bir nəfər tapılmadımı ki, Annaya “30 il bundan əvvəl sizin dediklərinizi ermənilər azərbaycanlı uşaqlara qarşı edib, dövlət olaraq uşaq qatili Azərbaycan yox, Ermənistandır” desin. Azərbaycan uşaqlarını qaz borularına yığıb ağzını qaynaqlayan, yaralı uşaqları divara mismarlayan, orqanlarını çıxarıb satan erməni faşistləri olub. Erməni jurnalistlərin yazdığı kimi, erməni qatilləri ayaqları çirklənməsin deyə, Xocalıdan olan azyaşlı qız uşağını suyun içinə atıblar və onun bədənindən “körpü” kimi istifadə edib keçiblər. Bunları da erməni faşistləri edib” - deyə bildirən F.Balabəyli qeyd etdi ki, Akopyanın o sammitdə “Laçın yolu” ilə bağlı “məsələ qaldırması”, “120 min ermənin” “taleyindən” danışması gülünc səslənir. O vurğuladı ki, Laçın yolu Azərbaycan ərazisidir, Xankəndi də həmçinin. F.Balabəyli dedi ki, ermənilərə Ağdam-Xankəndi yolu təklif edilir, Azərbaycan hökuməti onlara un məhsulu göndərib, ermənilər həqiqətən də ac olsaydılar mütləq o unu qəbul edərdilər, ac olmadıqları və siyasi oyun oynadıqları üçün hələ də Azərbaycanın humanitar yardımını qəbul etməyiblər. “Belə bir söz var: “Ac qılıca təpər (sarılar). Demək bunlar ac deyillər ki, humanitar yardımımızı qəbul etmirlər. Həqiqətən də uşaqları acdırsa və onlar öz uşaqlarını sevirlərsə, humanitar yardımı qəbul etməlidirlər. Amma göründüyü kimi iddialarının hamısı siyasi oyundur”.
Akopyanın çıxışına gəlincə, F.Balabəyli vurğuladı ki, o, məkanı da düzgün seçməyib, çünki Ukrayna təcavüzə məruz qalan bir ölkədir, Kiyev də ərazisi işğal edilən bir dövlətin paytaxtıdır. “Anna Akopyan işğalçı Ermənistanın baş nazirinin həyat yoldaşıdır. Ukrayna da işğala məruz qalıb, burada uşaqlar qətl edilir, aclıqla, susuzluqla üzləşir, ata-analarını itirir. Necə ki, illər əvvəl rus orsusunun köməyi ilə ermənilər bizim uşaqları öldürürdülər, ac qoyurdular. İndi o hallar Ukraynada yaşanır. Bu baxımdan, Akopyanın çıxışlarında işlətdiyi sözlərin hamısı yalan və uydurmadır. Akopyan saxtakar olduğunu göstərdi” - deyə F.Balabəyli qeyd etdi.
İradə SARIYEVA
