“Bu gün bizim aramızda ilk dəfə olaraq Şimali Kiprin nümayəndəsi də iştirak edir. Şimali Kipr türk qardaşlarımızı xüsusilə salamlamaq istəyirəm. Nazir burada müşahidəçi kimi, amma eyni zamanda, öz bayrağı ilə təmsil olunur. Təbii ki, Şimali Kiprin bayrağı da bizim tədbirdə dalğalanmalıdır və dalğalanacaqdır”.
Bu barədə Prezident İlham Əliyev sentyabrın 7-də Türk Dövlətləri Təşkilatının üzv və müşahidəçi dövlətlərinin təbii fəlakət və fövqəladə halların idarə edilməsi üzrə nazirlərinin ikinci görüşünün və “Bakı-2023” beynəlxalq təliminin iştirakçıları ilə görüşdə deyib.
“Azərbaycan bütün Türk dünyasında birləşən qardaşlarımızın hər zaman yanında olubdur və çox sevindirici haldır ki, son Zirvə görüşündə Şimali Kipr Türk Dövlətləri Təşkilatına müşahidəçi seçilmişdir. Bu münasibətlə bütün türk qardaşlarımızı ürəkdən təbrik edirəm. Bu, bir daha bizim birliyimizi göstərir, bir daha iradəmizi göstərir. Onu göstərir ki, biz haqq yolunda hər zaman bir-birimizin yanındayıq və yanında olacağıq”, - Prezident Əliyev bildirib.
Ölkə başçısı həmçinin vurğulayıb ki, Azərbaycan üçün türk dövlətləri ilə əlaqələr xarici siyasətdə birinci dərəcəli vəzifədir. Prezident Əliyev “Təsadüfi deyil ki, son bir neçə il ərzində mənim Təşkilata üzv olan ölkələrə çoxsaylı səfərlərim həyata keçirilmişdir. Təşkilata üzv ölkələrin dövlət və hökumət başçılarının da Azərbaycana bir çox səfərləri həyata keçirilmişdir və bu il də bu səfərlər nəzərdə tutulur. Yəni, bu, bir daha onu göstərir ki, biz düzgün yoldayıq”-deyə qeyd edib.
Prezident Əliyev Şimali Kiprə xüsusi jest göstərdi və onun tanınması prosesinə böyük təkan verdi.
“Şimali Kipr Türk Cümhuriyyəti dünyada müstəqil dövlət kimi tanınmalıdır”
Prezidentin bəyanatının böyük əhəmiyyətini vurğulayan AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə şərhində “İlk növbədə Türk Dövlətləri Təşkilatının müxtəlif səviyyələrdə tədbirlər keçirməsi təqdirəlayiq haldır. Təbii ki, Prezident İlham Əliyevin Türk Dövlətləri Təşkilatına üzv və müşahidəçi dövlətlərin nazirləri ilə görüşünün əhəmiyyəti böyükdür. Bu görüşdə Şimali Kipr nümayəndəsinin iştirakı tədbirə əlavə rəng qatdı. Bu onu göstərir ki, türk dövlətləri artıq Şimali Kiprin də yaxın zamanlarda öz sıralarında müşahidəçi kimi deyil, müstəqil bir türk dövləti kimi görmək istəyirlər. Zatən, Prezident İlham Əliyevin də çıxışında buna işarələr vardı. Artıq Türk Dövlətləri Təşkilatının (TDT) tədbirlərində Şimali Kipr Cumhuriyyətinin bayrağının dalğalanması, nümayəndəsinin iştirakı çox yaxın zamanlarda onun müstəqilliyinin TDT tərəfindən tanınacağına ciddi bir siqnaldır. Hesab edirəm ki, Azərbaycan Prezidentinin bəyanatı onu deməyə əsas verir ki, Şimali Kiprin müstəqilliyinin tanınması hadisəsi uzaqda deyil.
Əvvəllər bizim Qarabağla bağlı ciddi problemimiz olduğu üçün Şimali Kiprə elə də böyük dəstək verə bilmirdik. Artıq böyük ölçüdə bu problem aradan qaldırıldığına görə Azərbayvan da Türkiyə kimi Şimali Kipr Respublikasının müstəqilliyinin tanınmasından yanadır. Şimali Kipr Türk Cumhuriyyəti dünyada müstəqil dövlət kimi tanınmalıdır”-deyə bildirdi.
Şimali Kiprin müstəqilliyinin tanınması ilə təşkilatın gücünə əlavə gücün qatılacağını deyən F.Ələkbərlinin fikrincə, o tanındıqdan sonra TDT-nin də üzvü olacaq. O, vurğuladı ki, bu arada Türkmənistanın da, Macarıstanın da bu təşkilatın üzvü olacağı gözləniləndir...
İradə SARIYEVA
