Fransa Prezidenti Makronun bu həftə regiona səfər edəcəyi ilə bağlı xəbərlər özünü doğrultmadı. Qeyd edək ki, Makronun Ermənistana, ardınca isə Azərbaycana səfər edəcəyi bildirilirdi. Bu xəbəri daha çox tirajlayan məhz erməni mediasıydı. Qeyd edək ki, bu xəbər Rusiya və Azərbaycanda böyük narazılıqla qarşılandı.
Fransanın Bakıdakı səfirliyi bu həftə Prezident Emmanuel Makronun Azərbaycana səfəri ilə bağlı xəbərləri şayiə adlandırıb.
Bu barədə Fransanın Azərbaycandakı səfirliyindən məlumat verilib.
Daha əvvəl erməni mediası öz mənbələrinə istinadən xəbər yayıb ki, E.Makron həftəsonu Ermənistan və Azərbaycana səfər edə bilər və guya səfər sentyabrın 9-10-na planlaşdırılıb.
Banqladeş Xarici İşlər Nazirliyinin məlumatına görə, E.Makronun sentyabrın 10-da bu ölkəyə səfəri planlaşdırılır. Fransa prezidenti Banqladeşə səfərindən əvvəl G20 sammitində iştirak etmək üçün Hindistana yollanacaq.
Ola bilərmi ki, Makronun regiona səfəri ilə bağlı dezinformasiyanın yayılması nəbz yoxlama xarakteri daşıyıb?
Politoloq Ramiyyə Məmmədova “Bakı-Xəbər”ə açıqlamasında bildirdi ki, birincisi Azərbaycan heç bir dövlətlə düşmənçilik aparmır: “Hansısa dövlətin və ya dövlət başçısının onun dövlət xadimlərini qəbul etməməsi də bizim siyasətimizə uyğun deyil. Makronun haqqıdır, istədiyi dövlətə səfər edə bilər, ancaq bu protokol qaydasında öncədən razılaşdırılmalıdır. Razılaşdırılmamış səfərlər təbii ki, olmur. Bunun Ermənistan mediasında yayılması da yəqin ki, kəşfiyyat xarakterli də ola bilər. Kəşfiyyat xarakterli olsa belə, bunun nəticəsi heç nə verən deyil. Çünki, nəyin kəşfiyyatını edirlər? Makronu burada sevib- sevməmək sual olunursa, birmənalı deyiləcək ki, Makronu Azərbaycanda sevmirlər. Makronun yürütdüyü fransız siyasətini Azərbaycan qəbul etmir. Eyni qaydada Rusiyanın bu günki gündə Fransa ilə Afrika ölkələrində çaxnaşması başlayıb. Fransanın oradan çıxarılması məsələsi gündəmdədir. Bundan iki gün öncə Makron özü çıxış etdi və dedi ki, Fransa əsgərləri Afrikanın bir çox bölgələrindən geri çəkiləcəklər. Təbii ki, ordakı geri çəkilmənin nəticəsi etibarı ilə, yerlərini ruslara verəcəklər. Çünki, ruslar bu gün orda Fransa ilə böyük bir iç savaşına girib. Artıq, bir çox müqavilələrin, yeraltı qaynaq müqavilələrinin hər birini Afrika dövlətləri Fransa ilə ləğv edib, Rusiya ilə bağlayıblar. Fransa müstəmləkəsinin 50 ildən çox olan hegemonluğu bitmək üzrədir. Təbii ki, Rusiya ilə kəllə - kəlləyə gəlirlər. Rusiyanın bu gün Qarabağda Fransanı görmək istəməsi sıfıra bərabərdir. Bunu demək lazımdır ki, Fransa prezidentinin Ermənistana gəlmə məsələsi ola bilər, ancaq Qarabağa gedib, hansısa bir çıxışı etmək istəsə, bunu təbii ki, edə bilməyəcək. Çünki, burada Azərbaycan torpağı var, Azərbaycandan icazə alınmalıdır. Makron da bunu etmək istəməz. Çünki, bütün kanallardan bağırır ki, Qarabağ ermənilərindir, Qarabağ ermənilərə qaytarılmalıdır. Yəni, Fransanın erməni lobbisinin vəkili kimi çıxış edir. Ona görə də, Qarabağa gəlməsi mümkün deyil. Təbii ki, Azərbaycan dövlətinə gələ, Prezidentlə görüşə bilər. Ancaq, bunun da nəticəsi olmayacaq. Hansısa bir müqavilələr bağlaması, Qarabağ məsələsini həll etmək istəməsi mümkün deyil. Artıq Fransa prezidentinin son zamanlarıdır. O, çox gözəl bilir ki, bu seçkilərdə qalib gəlməyəcək və çıxıb gedəcək. Ona görə də, gələcək üçün ritorik çıxışlar edir. Gələcək siyasıti üçün yenə də ermənilərdən dəstək almaq niyyətindədir. Ancaq, mən inanmıramki bu gün Fransa prezidenti Azərbaycana gəlib, Qarabağ və ya Qarabağ ermənilərinin problemini həll edə bilər. Bu sıfıra bərabərdir. Fransa hazırda Avropa Birliyində hörmətini itirib. Merkel gedəndən sonra Fransa bir az tək qalıb. Ona dəstək verən də yoxdur. Bu məsələlərdə artıq görürük ki, Makronun çıxışları Avropa Birliyində və Amerika tərəfində neqativ qarşılanmağa başlayır. Bu o deməkdir ki, Makronun getmə vaxtı gəlib və Fransa post -Makron siyasətinə hazırlaşmalıdır. Bu siyasətlə başqa dövlətlərlə yenidən münasibətlər sistemi qurmalıdır”.
Məhəmmədəli QƏRİBLİ
