Rusiya və Ermənistan arasında münasibətlər o qədər soyuqlaşıb ki, hətta hər iki dövlətin rəsmi şəxsləri qarşılıqlı olaraq bir-birini təhqir etməkdən çəkinmirlər. Bu günlərdə Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanın baş naziri Nikol Paşinyanı “pis rəqqas”la müqayisə edib.
Deyərdik ki, bu gün M.Zaaxarova ilə Ermənistan rəsmiləri arasında “qanlı” söz davası gedir. Bir neçə gün əvvəl M.Zaxarova onun açıqlamasını “absurd” adlandıran Ermənistan Parlamentinin spikeri Alen Simonyanı “Mənə elə gəlir ki, ədəbsizlik həddində olan bu ritorika Ermənistanın siyasi xadimlərinə heç yaraşmır” kimi ifadərlə ədəbisiz, onun açıqlamasını isə “kobudluğa bənzəyən bir şey” adlandırılması A.Simonyanı yenidən hərəkətə keçirib. Belə ki, NEWS.am-a müsahibəsində A.Simonyan onu sərt şəkildə tənqid və təhqir edən Mariya Zaxarovanın eyni motivdə cavabını verib və o, rusiyalı diplomatı “hansısa qurumun hansısa katibəsi” adlandırıb. “Hansısa qurumun hansısa katibəsinin sözlərinə münasibət bildirmək fikrində deyiləm. Bu mənim səviyyəmə uyğun deyil. Bunun üçün Xarici İşlər Nazirliyi var, cavab versinlər. Düşünmürəm, mən və adıçəkilən qurumun şöbə müdirinin müavini ilə eyni adamıq ki, onunla danışaq”-deyə A.Simonyan əlavə edib.
“Onların bir-birinin təhqirlərini cavabsız qoymaması...”
Məsələyə şərh verən politoloq Tural İsmayılov “Bakı-Xəbər”ə “Son dövrlər Ermənistanla Rusiya arasındakı gərginlik artıq tamamilə pik həddə çatıb. Qarşılıqlı şəkildə Ermənistan hakimiyyəti təmsilçiləri ilə Rusiya hakimiyyəti nümayəndələrinin bir-birini qarşılıqlı şəkildə təhqir etməsi müşahidə olunur. Bunun fonunda da Rusiya rəsmlərinin Ermənistan hakimiyyətini təmsil edən rəsmi şəxslərin açıqlamalarına kəskin reaksiya verməsi halları yayılıb. Eyni zamanda Rusiya Xarici İşlər Nazirliyinin brifinqlərində artıq Ermənistanın baş naziri Paşinyan və onun komandasının çox sərt şəkildə təhqir edilməsi adət halını alıb”-deyə bildirdi.
T.İsmayılov qeyd edir ki, bütövlükdə Sorosçuların hakimiyyəti dövründə Ermənistanın Rusiyaya qarşı xəyanətləri açıq və gizli şəkildə davam edib və Rusiyada bunun fərqindədir. “Bəlkə də tarixdə ilk dəfədir ki, Rusiya Ermənistan münasibətləri bu qədər pis və qarşısı alınmaz vəziyyətə gəlibdir. Hər halda Rusiyanın Ermənistana təsir etmək və onun təxribatlarının qarşısını almaq üçün təsir imkanları kifayət qədər çoxdur” - deyə bildirən T.İsmayılovun fikrincə, ən azından, Rusiyada yaşayan minlərlə Ermənistan vətəndaşının taleyi müzakirə olunur. Onun sözlərinə görə, Ermənistan hakimiyyətinə qarşı insanları qaldırmaq üçün Rusiya bu miqrantlardan istifadə edə bilər: “Hər halda Simonyanın Zaxarovanı təhqir etməsi, eyni zamanda Zaxarovanın da Ermənistanın baş nazirinin və onun komandasının ünvanına çox ağır ifadələr işlətməsi və onları aşağılaması bu tendensiyanın gözlənilən nəticələridir. Onların bir-birinin təhqirini cavabsız qoymaması bu ölkələr arasında vəziyyətin hansı şəkildə olduğunu aydın göstərir”.
İradə SARIYEVA
