Rusiya Xarici İşlər Nazirliyi Ermənistan hökumətinin Roma statutunu parlamentə ratifikasiya üçün göndərməsinə münasibət bildirib.
Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə rəsmi İrəvanın bu addımının Rusiya-Ermənistan münasibətlərinə necə təsir edəcəyi ilə bağlı suala cavab verib və bildirib ki, Rusiya Ermənistan tərəfindən bu haqda izahat istəyib.
“İrəvanın təqdim edəcəyi cavabın məzmunundan çıxış edərək gələcək addımlarımızı müəyyən edəcəyik”, deyə Rusiya XİN sözçüsü vurğulayıb.
Qeyd edək ki, Beynəlxalq Ədalət Məhkəməsi (Haaqa tribunalı) Rusiya Prezidenti Vladimir Putini Ukrayna ərazisində müharibə cinayətlərində ittiham edərək barəsində qərar çıxarıb. Ermənistan parlamenti sənədi ratifikasiya edəcəyi təqdirdə, İrəvan Beynəlxalq Ədalət Məhkəməsinin qərarını icra etmək öhdəliyi götürür. Bu isə o deməkdir ki, Putin Ermənistana səfər edərsə, həbs olunaraq aidiyyəti üzrə təhvil verilməlidir.
“Rusiyanı qıcıqlandıran odur ki, Ermənistan bu ölkə ilə bir sıra ittifaqlarda olsa da, Paşinyan hakimiyyəti bunu nəzərə almır”
Məsələ ilə bağlı “Bakı-Xəbər”ə açıqlama verən ekspert Yadigar Məmmədli buna birmənalı yanaşmadı: “Məlum olduğu kimi, Qərb təsir imkanlarını Ermənistanda artırmaq üçün bir sıra addımlar atır. Üzdə Fransa görünsə də, əslində bunun arxasında Avropa İttifaqı və digər qərb ölkələri dayanır. Bu, gözlə görünür. Ancaq məsələ ondadır ki, Putinin həbsi ilə bağlı qərar əsasən siyasi motivlidir. Ermənistanın buna getməsi, Rusiyaya xəyanət anlamına gəlir. Çünki Ermənistanın yaradılışı Rusiya ilə bağlıdır. Lakin ermənilərr tarixən satqın millət olduğunu nəzərə alsaq bu, bizim üçün təəccüblü olmamalıdır. Rusiyanı qıcıqlandıran odur ki, Ermənistan bu ölkə ilə bir sıra ittifaqlarda olsa da, Paşinyan hakimiyyəti bunu nəzərə almır. Əslində Ermənistan Rusiya ilə müttəfiq olduğu üçün Roma statutunu ratifikasiya etməkdən yayınmalı idi. Ancaq görünən odur ki, erməni tərəfi bundan Kremlə yönəlik şantaj məqsədi ilə istifadə edir. Bunun müqabilində umacağı odur ki, Qarabağ məsələsində Rusiya Azərbaycana qarşı aqressiv mövqe sərgiləsin. Qərbin məqsədi isə bu kimi qərarlarla Rusiyanı Ermənistandan sıxışdırıb çıxarmaqdır. Ancaq nəzərə alsaq ki, Ermənistanın Rusiyadan asılılığı böyük və çoxşaxəlidir, o zaman bu, o qədər də asan görünmür. Hesab edirəm ki, Ermənistan parlamenti son anda bunu ratifikasiya etməkdən yayınacaq. Ən azından bunu hansısa formada təxirə salacaqlar. Zaxarovanın izahatla bağlı fikirləri onu göstərir ki, Rusiya bu məsələdə ciddidir və güzəştə getmək fikrində deyil”.
Vidadi ORDAHALLI
