Ermənistanın baş naziri Nikol Paşinyan Kotayk rayonunun Katnağbyur (Mehribanlı) kəndində yeni tikilmiş əsas məktəbin açılışı zamanı dövlət himnini tənqid edib:
“Son günlər 5-6 məktəbdə olmuşam. Bütün tədbirlərimiz dövlət himni ilə başlayır və biz 6 fərqli variantda, 6 fərqli temp, 6 müxtəlif mətndən ibarət Ermənistanın dövlət himnini dinlədik. Bu da problemdir, himni hansısa dövlət qurumunda bu templə, digərində isə başqa tempdə və ya başqa mətnlə ifa etmək olmaz”.
Xatırladaq ki, Nikol Paşinyan bu yaxınlarda Ermənistan dövlət himninin mətninin dəyişdirilməsini təklif edib. O, eyni zamanda Müstəqillik Aktının mətnini də sərt tənqid etmişdi. Belə çıxır ki, Ermənistanın heç normal dövlət atributları da yoxdur?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistan keçmişi və tarixi olmayan bir ölkədir: “Özlərinə qondarma bir tarix yazdıqları kimi, dövlət atributları da saxtadır. Ermənilər yalnız ayrı-ayrı ölkələrin: mətbəxtini, musiqisini deyil, həm də onların atributlarını da öz adlarına rəsmiləşdirə biliblər. Məsələn, Kolumbiyanın milli bayrağını özünküləşdirib, Ermənistan bayrağı yaradıblar. Başqa bir ölkənin himninə aid musiqini də oğurlayıb, özlərinə himn ediblər. Gerbləri isə ümumiyyətlə cəvəngiyatdır. Ermənistan cəmiyyətində uzun müddətdir ki, himnin və gerbin dəyişdirilməsilə bağlı müzakirələr gedir. Onları hardasa başa düşmək olar. Bayraq, gerb o vaxt əziz sayılır ki, o həqiqətən sənə məxsus olur. Belə müzakirələrin getməsi sübut edir ki, bu atributlar onlara məxsus deyil. Ermənistanın Müstəqillik Haqqında Aktında və Konstitusiyasında da başqa ölkələrə açıq şəkildə ərazi iddiaları irəli sürülür. Onlar bölgədə normal münasibətlər qurmaq istəyirsə, mütləq mənada həmin sənədləri də kökündən dəyişməlidir. Ermənistanın baş naziri Nikol Paşinyan parlamentdə 2022-ci il dövlət büdcəsinin icrasının yekunlarına həsr olunmuş iclasda çıxış edərkən dövlət rəmzləri ilə bağlı bir neçə hay-küy doğuran açıqlamalar verib. O, Ermənistanın gerbi və himni məsələsinə psixoanaliz nöqteyi-nəzərindən yanaşıb.
Ermənistanın baş naziri müxalifət blokundan olan deputat Qeqam Manukyanın açıqlamalarını şərh edərkən gerbin “düzgün olması” ilə bağlı arqumentlərə toxunub. Çıxışında qeyd edib ki, baş nazirin tez-tez danışdığı “Ermənistanın kadastr kağızı” Ermənistanın gerbidir.
Ermənistanın baş naziri cavabında deyib: “Əgər biz elan etsək ki, kadastrdan bu bizim sənədimizdir, o zaman çağırırıq ki, gəlin bizi məhv edin”.
Ermənistanın baş naziri bundan əvvəl deyib ki, ölkənin gerbinin məzmunu ilə bağlı məsələ çoxsaylı fərziyyələrə səbəb olub. Baş nazirin fikrincə, emblem ermənilərin psixologiyasını aydın şəkildə əks etdirir”.
Paşinyan Ermənistan Milli Assambleyasında çıxışı zamanı ölkənin hazırkı geribinin reallıqla əlaqəsi olmadığını dilə gətirib:
“Bizim gerbimizdə nə təsvir olunub?.. Burada Ermənistanın dörd sülaləsinin emblemi olan Ağrı dağında Nuhun gəmisi təsvir olunub. Emblemə baxanda belə bir sual yarandı: bunun bizə nə dəxli var? Axı biz bunu 1991-ci ildə qəbul etmişik. Bunun 1991-ci ildə qurulan dövlətə nə dəxli var? O nə danışır? Nuhun gəmisi Ağrı dağında yerləşir və indiki Ermənistanın ərazisi su altında qalıb. Orada uzun müddət Ermənistanın təbii şəraitində yaşamayan şiri də görmək olar. Bu problem bizim hər birimizdə mövcud olan ikiliklə bağlıdır: tarixi Ermənistan və real Ermənistan”.
Məhəmmədəli QƏRİBLİ
