NATO-nun Avropa İnkişaf Komitəsinin sədri Günter Fellinger rəsmən Ermənistanı Alyansa üzv olmağa çağırıb. O, açıqlamasında Nikol Paşinyana zəmanət də vəd edib: “Nikol Paşinyan, mən Ermənistanı NATO-ya üzv olmağa çağırıram. Co Bayden Ermənistanı qoruyacaq”.
Öz növbəsində Ermənistan xarici işlər nazirinin müavini Vaan Kostanyan bildirib ki, ölkəsi NATO ilə müxtəlif formatlarda əməkdaşlıq edir və bu proses gələcəkdə də inkişaf etdiriləcək: “NATO-nun Avropa İnkişaf Komitəsinin rəhbəri Günter Fehlinger Ermənistanı Şimali Atlantika Alyansına qoşulmağa çağırıb. Biz NATO ilə müxtəlif formatlarda əməkdaşlıq edirik və bu prosesi davam etdirməyə hazırıq”.
Məlum məsələdir ki, Ermənistanın Qərbə meyllənməsi Rusiyada narahatlıqla qarşılanır. Üstəlik, Ermənistanın NATO-ya inteqrasiya etməsi Rusiyanı əməlli-başlı özündən çıxara bilər.
Maraqlıdır, nə baş verir? Doğrudanmı ermənilər bunun indiki dövrdə mümkün olduğunu düşünürlər?
“Bu, NATO ilə Rusiya arasında Cənubi Qafqaz uğrunda gedən mübarizənin başlanğıcıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “NATO rəsmisinin Ermənistana Alyansa üzv olmaq üçün çağırış etməsi təsadüfi deyil. Bu, geosiyasi mübarizənin kəskinləşməsinin tərkib hissəsidir. Hesab edirəm ki, bu, NATO ilə Rusiya arasında Cənubi Qafqaz uğrunda gedən mübarizənin bir başlanğıcıdır. Blokda yaxşı bilirlər ki, indiki vaxtda bu o qədər də asan olmayacaq. Ən azından ona görə ki, Ermənistan KTMT üzvüdür. Ermənistanda Rusiyanın hərbi bazaları, siyasi və hərbi agentura şəbəkəsi mövcuddur. Bütün bunları yox saymaq o qədər də məntiqli görünmür. Ancaq görünür, Paşinyan bundan istifadə edərək Moskvanı şantaj edir. Ermənistan rəsmiləri müxtəlif açıqlamalar verməklə Rusiya ilə münasibətləri dramatikləşdirirlər. Ümumiyyətlə, Ermənistanın NATO-ya üzv olması gələcək perspektivdə mümkün deyil. İlk növbədə ona görə ki, Ermənistan hazırkı problemləri həll etmək istəmir. Azərbaycanla sülh müqaviləsi bağlamır. Kommunikasiya xətlərinin açılması ilə əlaqədar üzərinə düşən vəzifələri yerinə yetirmir. Sərhədlərin delimitasiyası ilə bağlı gərəkən tədbirləri görmür. Belə bir vəziyyətdə Paşinyanın gələcək siyasi taleyi də sual altındadır. Fikrimcə, onu Saakaşvilinin taleyi gözləyə bilər. Erməni cəmiyyəti kriminallardan ibarətdir. Düzgün dövlət siyasətləri yoxdur. Belə bir müstəqil siyasəti olmayan bir ölkə NATO üzvü ola bilməz. Ermənistan Rusiyanı yalnız şantaj etməklə məşğuldur. Ermənistanda yenidən kriminal siyasilərin hakimiyyətə gəlməsi mümkündür. Ona görə də Ermənistanın NATO-ya üzv olması mümkün deyil”.
Vidadi ORDAHALLI
