Son vaxtlar BBC telekanalı, o cümlədən bu media qurumunun Azərbaycan xidməti tərəfindən Azərbaycan-Ermənistan münasibətləri, Azərbaycanın Qarabağ iqtisadi rayonunun ermənilər yaşayan hissəsində mövcud vəziyyətlə bağlı qeyri-obyektiv materiallar yayımlanır və qərəzli, həqiqətdən uzaq iddialar irəli sürülür.
Bu materiallarda suveren ərazimiz olan Qarabağ bölgəsindəki erməni separatçıları təbliğ edilir. Bu media orqanının yayımladığı veriliş müəllifin, ümumilikdə isə BBC-nin qərəzini, hadisələrin gərginləşməsində nə qədər maraqlı olduğunu, bu yanaşması ilə Ermənistana yaxınlığını aydın şəkildə nümayiş etdirir.
BBC kimi media qurumu niyə açıq şəkildə erməni separatizmini dəstəkləyir? Buradakı maraq maddidir, yoxsa siyasi?
Media eksperti Azər Həsrət “Bakı-Xəbər”ə açıqlamasında bildirdi ki, BBC ABŞ - ın Azad Avropa və Azadlıq radiosu kimi tabliğat media vasitəsi olaraq qurulub: “Yəni onun məqsədi həqiqətən də Böyük Britaniyanın mənafelərinin bu və ya digər şəkildə dünya üzərində təbliğ və təşviq edilməsidir. Britaniya dövləti konkret olaraq bu media qurumundan özünün maraqları üçün istifadə edir. Bu maraqlardan istifadə edərkən də, hətta ən yaxın münasibətlərdə olduğu dövlətlərlə belə üz - üzə gələ bilir. Bu nə üçün lazımdır? Ona görə lazımdır ki, həmin dövləti hansısa məsələlərdə təsir altında saxlasın, öz siyasi və biznes maraqlarını önə çəksin, dövlət içində də təsir vasitələrini genişləndirsin. “ BBC Azərbaycanca“ deyə bir xidmət var. Başqa dillərdə də xidmətlər var. Yəni adama deyərlər ki, sənin nə marağın var Londonda oturub mənim dilimdə radio yayımlayırsan, internet üzərindən fəaliyyət göstərirsən, üstəlik də mənim ölkəmin içində jurnalistlər saxlayıb, onlara külli miqdarda maaş verirsən? Bu sırf siyasi təbliğat vasitəsidir, media vasitəsi deyil. Bizim bildiyimiz klassik anlamda kütləvi informasiya vasitəsi ilə əlaqəsi yoxdur. Ona görə də, Azərbaycan dövləti illər öncə BBC - nin FM dalğasında olan yayımını dayandırmağa məcbur olmuşdu. Yəni onlara Azərbaycanın daxili işlərinə qarışdıqlarına, Azərbaycanda siyasi yellər əsdirməyə çalışdıqlarına görə dəfələrlə xəbərdarlıq edilmişdi. Dövlət onlara başa salmışdı ki, biz sizin əslində nə ilə məşğul olduğunuzu görürük, onu yığışdırmalısız. Təəssüflər olsun ki, Azərbaycan dövlətini dinləmədilər və dinləmədikdə də dövlət öz ərazində FM dalğasında BBC-nin yayımını dayandırdı. Eləcə də “Azadlıq” radiosunun yayımı dayandırılmışdı. İndi isə onlar erməni tərəfdən çıxış etməklə, əslində Azərbaycana təsir imkanlarını genişləndirmək məqsədini güdürlər. Yəni BBC - nin bağlı olduğu Böyük Britaniya dövləti əslində Azərbaycan dövlətinin ərazi bütövlüyünü tanıyır. Qarabağı da Azərbaycanın tərkib hissəsi sayır. Amma necə olur ki, bu dövlətin maliyyələşdirdiyi bir media qurumu tam əksini edir? Bu sırf ingilis siyasətidir. Biz də bunu bilirik. Arzu edərdik ki, Böyük Britaniya dövləti Azərbaycanla dost münasibətlər fonunda BBC - nin bu qeyri - media fəaliyyətini dayandırsın. Azərbaycan dövləti BBC jurnalistlərinin Azərbaycanda fəaliyyətlərini də əngəlləməlidir. Onların burda akkreditasiyası varsa, o da ləğv edilməlidir. Çünki onlar açıq şəkildə tərəf tuturlar və Azərbaycanda bölücülüyü təşviq edirlər”.
Məhəmmədəli QƏRİBLİ
