Ermənistanın baş naziri Nikol Paşinyanın İtaliya mətbuatına müsahibəsində Rusiya ilə bağlı qəbuledilməz tonda verdiyi açıqlamalardan Moskva son dərəcə narazıdır. Bu barədə TASS-a diplomatik mənbə məlumat verib.
Məlumatda Ermənistan hakimiyyətindən narazılıq ifadə olunub: “Moskva Ermənistan rəhbərliyinin son ictimai bəyanatlarından, o cümlədən baş nazirin İtaliyanın “La Repubblica” qəzetinə verdiyi müsahibədən və Xarici İşlər Nazirliyinin avqustun 31-də olan şərhindən son dərəcə narazıdır. Bunlar özlərinin səhvlərinə görə məsuliyyəti Rusiyaya yükləmək məqsədilə qəbuledilməz ton və məzmun hesab olunur”.
Qeyd edilib ki, Rusiya Ermənistanı və Cənubi Qafqaz regionunu tərk etmək niyyətində deyil. Lakin İrəvan Qərbin Rusiya Federasiyasını sıxışdıran alətinə çevrilməməlidir.
“Rusiya Cənubi Qafqazı o zaman tərk edəcək ki, Ukrayna müharibəsində məğlub olsun və parçalanmağa doğru getsin”
Məsələ ilə bağlı “Bakı-Xəbər”ə açıqlama verən siyasi ekspert Elşad Həsənovun fikrincə, Rusiyanın buna sərt reaksiya verəcəyi gözlənilən idi: “Nəzərə almaq lazımdır ki, 2018-ci ildə Paşinyanın hakimiyyətə gəlməsi Soros Fondunun vəsaiti hesabına reallaşdı. Hazırda onun komandasında təmsil olunanların əksəriyyəti Soros Fondunun yetirmələridir. Onlar hakimiyyətə gələndən bəri Rusiyadan qopmağa çalışırlar. Təsadüfi deyil ki, Paşinyan hakimiyyəti davamlı olaraq KTMT-ni boykot edir. Ancaq bir sıra səbəblərdən Ermənistanın Rusiyadan qopması hələlik mümkün deyil. Çünki Rusiyanın orada hərbi bazası var, Ermənistanın sərhədlərini qoruyur və s. Baxmayaraq ki, Rusiya Ukrayna müharibəsində zəifləsə də Ermənistandan çıxmaq istəmir. Çünki Rusiya fərqindədir ki, Ermənistandan çıxsa Cənubi Qafqazı itirəcək. Düzdür, Paşinyan hakimiyyətini devirə bilmirlər, amma kaprizlərinə dözürlər. Baxın, 44 günlük müharibədə Ermənistan məğlub oldu, amma 2021-ci ilin ortalarında keçirilən parlament seçkilərində Paşinyan qalib gəldi. Belə bir hal çox nadir hadisədir. Məsələ ondadır ki, Paşinyan Ermənistanda mövcud olan anti-Rusiya ovqatından öz mənafeyi üçün istifadə etdi. Paşinyan bir çox hallarda pərdəarxası Qərblə yaxınlaşma kursu götürüb. Üstəlik, Ermənistanın Ukrayna müharibəsi ilə əlaqədar sanksiyalardan yayınaraq siyasət aparması bu ölkəyə pul qazanmağa imkan verir. Söhbət qadağan olunan məhsulların Rusiyaya ötürülməsindən gedir. Biz görürük ki, Qərb bunu çox vaxt görməzdən gəlir. Diqqəti çəkən məqam odur ki, Paşinyan və onun komandası son zamanlar Rusiyaya qarşı ritorikanı sərtləşdirir. Erməni tərəfi Laçın yolunda yaranan vəziyyətə görə birbaşa Rusiyanı ittiham edir. Paşinyanın İtaliyanın “La Repubblica” qəzetinə verdiyi müsahibədə daha sərt tənqidi fikirlərlə çıxış etməsi təsadüfi deyildi. Məsələ ondadır ki, son vaxtlar Rusiya Ermənistanda revanşist müxalifətin Paşinyana qarşı fəaliyyətini gücləndirir. Həmçinin Qarabağdakı separatçıları bu yöndə kökləyir. Belə olan halda Paşinyan tənqidlərin dozasını artırır və bu da Rusiya siyasi dairələrində narazılıqla qarşılanır. Üstəlik, son dövrlər Fransa ilə sürətlə yaxınlaşan Ermənistan hakimiyyəti daha cəsarətlə Moskvanın üzərinə gedir. Gümrüdə Rusiya hərbi bazası qarşısında mitinqlər keçirilir, səfirliyin qarşısında keçirilən aksiyalarda Putinə qarşı şüarlar səsləndirilir. Əlbəttə ki, bütün bunlar tərəflər arasında münasibətləri gərginləşdirir. Rusiya Cənubi Qafqazı o zaman tərk edəcək ki, Ukrayna müharibəsində məğlub olsun və parçalanmağa doğru getsin”.
Vidadi ORDAHALLI
