Ermənilər hazırda qondarma “blokada”, “aclıq” yalanını bütün dünyaya yaymaq üçün müxtəlif muzdlu xarici jurnalistlərdən, deputatlardan, rəsmi şəxslərdən istifadə edirlər. İndiyə qədər bir neçə xarici media qurumunu öz torlarına salmağı bacarıblar. Təəssüf ki, erməni təbliğat maşınının həyata keçirdiyi iftira kampaniyasına onlar bəzi əcnəbi media qurumlarını da qoşa biliblər.
ABŞ-ın nüfuzlu “New York Times” nəşrinin də bu yalana uyduğunu müşahidə edirik. Ermənistan mediasında “New York Times”ın köşə yazarı Nikolas Kristofin sözügedən qəzetdə çap etdirdiyi bədnam yazıdan danışılır. Laçın yolunun olmayan “blokadasından” narahat olan muzdlu köşə yazarı geninə-boluna yalanlar danışıb, erməni dəyirmanına su tökən iddialar səsləndirib. Guya Azərbaycan Rusiyanın Ukrayna münaqişəsi ilə məşğul olmasından istifadə edir və bundan istifadə edərək “bəşəriyyətə qarşı cinayətlərini” törədir. “Armenpress”in yaydığı məlumata görə, Nikolas Kristof şər-böhtan, iftira dolu cızmaqarsına “Daha bir etnik təmizləmə baş verə bilər, lakin biz buna məhəl qoymuruq” başlığı qoyub.
Üzdəniraq juranalist ABŞ və digər dünya güclərinin, o cümlədən “mövzuya kifayət qədər susqun yanaşan” Böyük Britaniyanın Azərbaycana “təzyiqlərini artırmalı olduğunu” vurğulayıb.
Elə təqdim edirlər ki, guya “New York Times” qəzetinin dərdi ancaq Qarabağdakı ermənilərin vəziyyəti və Laçın yolunun bağlı olmasıdır. Bu müəllif də, başqaları da, nədənsə, hər gün Laçın yolundan adlayıb İrəvana gedən erməniləri görmək istəmirlər.
Ermənilər bu iftira kampaniyasına artıq “New York Times”ı də qatmağa nail olub, bu yalanı beynəlxalq mediada fırladırlar. Bu cür dezinformasiyaların bu tip qəzetlərə ayaq açması nə deməkdir? Ziyanlı tərəfi nədir? Ermənilər nəyəsə nail ola bilərmi?
“...Transmilli KİV-də yazan müəlliflərin erməni şəbəkəsi ilə yaxın əlaqədə olduqlarını...”
Mətbuat Şurası İdarə Heyətinin üzvü, media eksperti Müşfiq Ələsgərli “Bakı-Xəbər”ə açıqlamasında “Erməni şəbəkəsinin informasiya savaşı müstəvisində son dövrlər kifayət qədər aqressivləşməsi müşahidə olunmaqdadır. Onlar sözləri keçən, əlləri çatan bütün müstəvilərdə, KİV qurumlarında Azərbaycan əleyhinə qarayaxma kampansiyası aparmaq üçün təşəbbüslər göstərirlər. Təəssüflə qeyd etmək lazımdır ki, bu kampaniya təkcə Ermənistan mediasında deyil, bəzən transmilli KİV-lər tərəfindən də dəstəklənir. Arıq üç aya yaxındır ki, biz bu cür aqressiv və amansız bir savaşın aparıldığının şahidi oluruq. Qeyd edə bilərik ki, məsələn, “Vaşinqton post” kimi qəzet 6 gün ərzində Azərbaycana qarşı üç məqalə dərc etmişdi. BBC-nin, eyni zamanda Fransanın “F24” və digər kanallarının da bu cür kampaniyada aktiv iştirak etdiyinin şahidi oluruq. Proseslərin təhlili göstərir ki, bütün bu kampaniyanın kökündə erməni lobbisi, erməni diasporu və bütövlükdə erməni şəbəkəsi dayanır. Biz ötən açıqlamalarımızda həmin məqalələri transmilli KİV-lərdə yazan müəlliflərin erməni şəbəkəsi ilə yaxın əlaqədə olduqlarını, xüsusi ilə “Ruben Vardanyan” Fondundan mükafatlar aldıqlarını faktlarla sübut etmişdik. Bu fakt deməyə əsas verir ki, indi davam edən kampaniyanın kökündə erməni şəbəkəsinə yaxın olan, onlardan müəyyən mükafatlar, hədiyələr qəbul edən transmilli KİV qurumları, yaxud da jurnalistlər dayanır. Ermənistan şəbəkəsinin informasiya müstəvisində bu cür aqressivləşməsi başadüşüləndir. Çünki 2020-ci ildə onlar Qarabağ savaşında açıq müstəvidə döyüşdə məğlub olmuşdularsa, sonradan öz neqativ mübarizələrini diplomatiya və informasiya platformalarında aparırdılar. Son dövrlərdə isə onlar diplomatiya platforması müstəvisində də uduzdular. Bəllidir ki, nə Beynəlxalq Cinayət Məhkəməsində, nə də BMT-nin Təhlükəsizlik Şurası müstəvisində Azərbaycana əleyhinə təşkil etdikləru müzakirələrdə heç bir nəticə qazana bilmədilər, bununla da diplomatik müstəvidə də uduzdular. Bu, ermənilərin ikinci böyük məğlubiyyəti idi”-deyə bildirdi.
Ermənilərin döyüş və diplomatiya sahəsində əllərindən çıxan bu oyunu indi də informasiya müstəvisinə keçirdiklərini deyən M.Ələsgərli bildirdi ki, onlar bütün güclərini informasiya savaşına həsr edərək Azərbaycanı dünya ictimaiyyətinin gözündən salmağa çalışırlar: “Bir daha təəssüflə qeyd edək ki, bəzən transmilli media müstəvisində də bu cür neqativ informasiyaların dərcinə nail ola bilirlər. Azərbaycan tərəfi də bu məsələdə kifayət qədər aktivdir və hesab edirəm ki, öz həssaslığımızı bir qədər də artırmalıyıq. Bu təkcə dövlətin işi deyil, xalqın, jurnalistikanın, diasporun, bütün Azərbaycan adına çıxış edən təsisatların hamısının vahid güc ətrafında birləşməsi və bu şəkildə erməni təxribatına qarşı mübarizə aparması tələb olunur. Hesab edirəm ki, onların cavabı layiqli şəkildə verilir də...”
M.Ələsgərli hesab edir ki, bundan sonra Azərbaycan mediası, cəmiyyəti öz sözünü deyəcək, Ermənistan şəbəkəsinin təxribatlarını növbəti dəfə ifşa edəcək. İradə SARIYEVAA
