Qarabağ iqtisadi rayonunda yaşayan erməni sakinləri uzun illər boyunduruq altında saxlamaqda davam edən separatçıların ürəyinə xof düşüb. Azərbaycan qanunları qarşısında cavab verəcəklərini bildiklərindən artıq zəli kimi yapışdıqları kresloları tərk edir, olmayan “millət sevgilərini” dəfn edirlər.
Separatçılara bir neçə ildir rəhbərlik edən Araik Arutyunyanın “istefasından” sonra Xankəndidəki kukla “hökumətin” digər təmsilçiləri arasında da “istefalar” başlayıb. Onu da deyək ki, Araik öz “istefası”ndan əvvəl separatçı “dövlət naziri” Qurgen Nersisyanı “vəzifəsindən” azad etmişdi. Növbəti addımı isə əldəqayırma qurumun “maliyyə və iqtisadiyyat naziri “ Vahram Bağdasaryan atıb. Məlumata görə, onun “ərizəsi”nə əsasən qondarma “prezident” onu “vəzifəsindən azad edib”.
Separatçıların oyuncaq vəzifələri tərk etmələri artıq ənənə halını alıb və onlar bir-bir gedirlər. Bir sıra ekspertlər hesab edir ki, artıq bunlar inad etmənin yersiz olduğunu başa düşürlər, oan görə də zəli kimi yapışdıqları kresloları qoyub gedirlər. Qeyd etdiyimiz kimi, separatçılar arasında son günlər belə "istefalar" çoxalıb. Bu "istefaların" əsas səbəbləri nədir? Nə yaxşı "kreslolarını buraxırlar"?
“Araikdən sonra artıq onun komandasında da “istefalar” baş verir”
Azad Vətən Partiyasının sədri Akif Nağı “Bakı-Xəbər”ə şərhində “Orada baş verən dəyişikliklər, Araik Arutyunyanın kreslodan, “vəzifədən” uzaqlaşması çoxdan gözlənilirdi və müəyyən bir prosesin nəticəsi oldu. Çünki orada qruplaşmalar, fikir ayrılıqları vardı. Çox qəribədir ki, bu vəziyyətdə bu adamlar orada vəzifə davası döyürlər. Azərbaycan öz torpaqlarına onsuz da qayıdacaq. Bu, vəzifəyə erməni hərisliyini göstərir, bunlar vəzifə uğrunda mübarizədə hər şeydən keçirlər, gözləri heç nəyi görmür. Onların burunlarının ucundan o tərəfi görmədikləri məlumdur. Eyni tendensiyanı biz İrəvanda da görürük. Sarkisyan və Köçəryan artıq belə açıq tezislə çıxış edirlər ki, hakimiyyət dəyişməsə Qarabağda vəziyyət dəyişməyəcək. Guya bunlar Qarabağda nəyisə dəyişəcəklər. Belə bir vəziyyətdir. Bunlar hər şeyin günahını hakimiyyətdə görürlər, çünki tək istəkləri budur”-deyə bildirdi.
A.Nağının fikrincə, bu gün İrəvandakı vəziyyət keçən əsrin 90-cı illərinin əvvəllərində bizim ölkədə baş verən vəziyyəti xatırladır, yəni adamlar nəyin bahasına olursa olsun hakimiyyətə gəlmək istəyirdilər. Bu gün Ermənistandakıların da xalqı aldatmaqla vəzifəyə gəlmək istədiyini deyən A.Nağının sözlərinə görə, bundan başqa məqsədləri yoxdur: “Onların fikri Xankındidədir. Digər tərəfdən, orada proseslər Rusiya tərəfindən idarə olunur. Rusiya bir qrupu “vəzifədən kənarlaşdırır”, onların yerinə başqa bir qrupu gətirir. Araikdən sonra artıq onun komandasında da “istefalar” baş verir. Araik getdi, onun adamları da yavaş-yavaş səhnədən çıxır. “Vəzifəyə” kim gəlirsə öz “komadasını” gətirir. Başqa bir tərəf də var, onlar əllərini hər şeydən üzüblər və gələcəkdə onları nə gözlədiyini bilirlər, bu səbəbdən də “istefa verib” özlərini sığortalamaq istəyirlər. Baxmayaraq ki, Ermənistan, Qərb, Fransa onlara “möhkəm dayanın” , Rusiya “qorxmayın yanınızdayıq” deyir, amma separatçılar onlara heç kəsin kömək edə bilməyəcəyini anlayırlar. Azərbaycan dövləti həmin ərazidə öz hakimiyyətini bərqərar edəcək, cinayətkarlar da cəzalandırılacaq. Ona görə də separatçılar imkan varkən aradan çıxmağa çalışırlar. Araik də gedəcək, baxmayaraq “mən burdan heç yerə gedən deyiləm” deyir, amma az müddətdən sonra aradan çıxıb gedəcək”-deyə bildirən A.Nağı qeyd ki, “vəzifə”yə gələnlərin hamısı Rusiyanın tapşırığı ilə gəlir və onların da gələcəkdəki aqibətləri məlumdur.
İradə SARIYEVA
