Erməni baş nazir Nikol Paşinyan Brüssel, Praqa və Vaşinqton görüşlərinin müsbət nəticələrini heçə endirmək üçün son vaxtlar bütün vasitələrə əl atır. Məsələ ondadır ki, Paşinyan Ermənistanın Azərbaycanın ərazi bütövlüyünü tanıdığını dəfələrlə müxtəlif platformalarda, hətta beynəlxalq məkanda rəsmən bəyan edib.
Üstəlik, həmin bəyanatlarında Qarabağın Azərbaycana məxsus olduğunu da birmənalı şəkildə vurğulayıb. Qarabağ mövzusunun məhz Bakı-Xankəndi birbaşa təmasları ilə nizamlanmasının vacibliyini bildirib.
İndi isə Paşinyan bütün bunlardan imtina etməyə can atır. Paşinyanın sentyabrın 2-də “Dağlıq Qarabağın müstəqillik bəyannaməsi”nin ildönümü ilə əlaqədar təbrik müraciətinin məzmunu, ərazi iddiası ritorikası faktiki olaraq onun Praqada, Brüsseldə Qarabağın Azərbaycanın tərkib hissəsi olması ilə bağlı səsləndirdiyi fikirlərdən imtima etdiyi təəssüratı yaradır.
O da məlumdur ki, Rusiya rəsmiləri Paşinyanın Praqada Azərbaycanın ərazi bütövlüyü ilə bağlı ortaya qoyduğu mövqedən narahat idilər. Paşinyanın son ritorikasından sonra bu, Rusiyanın Qarabağ siyasətinə necə təsir edəcək?
“İstənilən halda, Kreml bundan öz məqsədləri üçün maksimum istifadə etməyə çalışacaq”
Məsələ ilə bağlı fikirlərini “Bakı-Xəbər”lə bölüşən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynovun fikrincə, bütün bunlardan Rusiya öz mənafeyi üçün istifadə edəcək: “Bəli, son vaxtlar Paşinyanın ritorikasında sərtləşmə və Brüsseldə verdiyi vədlərdən yayınmaq elementləri özünü daha çox göstərir. Fikrimcə, bunun səbəblərindən biri Rusiyanın Ermənistanda öz təzyiq rıçaqlarını artırması ilə bağlıdır. Məsələ ondadır ki, Qarabağ separatçılarının başçısı Araik Arutunyan müəyyən qədər Paşinyanla hesablaşırdı. Rusiyanın təziqi ilə o, istefa verdi. Eyni vaxtda Rusiyaya bağlı Köçəryan-Sarkisyan cütlüyü, onlara yaxın olan digər revnşist qüvvələr fəallaşaraq Paşinyana təziqləri artırıblar. Əvvəl bu, əsasən parlamentdə və onlara yaxın olan media resurslarında özünü daha çox göstərirdisə, indi ictimai səviyyədə də təzyiqlər artıb. Ölkədə revanşistlər mitinqlər keçirir və yaxın günlərdə belə aksiyaların sayının artacağı gözlənilir. Hətta İrəvan meri olmağa çalışan Andranik Tevanyan belə, görüşlərinin hamısında Qarabağ mövzusunu qabardır. Bütün təbliğatı bunun üzərində qurur. Bütün bunlar nəticə etibari ilə Paşinyana yönəlik təzyiqlərin dozasının artmasına səbəb olur. Hesab edirəm ki, Paşinyan revanşistlərin və Rusiyanın ona olan təzyiqlərinə görə Bürüssel öhdəliklərini pozur. Son günlər onun ritorikanı sərtləşdirməsi ictimai rəyə hesablanmış gedişlər də ola bilər. O, bununla ona yönəlik təzyiqləri niytrallaşdırmağa çalışır. Ancaq istənilən halda, Kreml bundan öz məqsədləri üçün maksimum istifadə etməyə çalışacaq. Çünki Rusiya istəmir ki, Azərbaycan-Ermənistan münasibətlərinin tənzimlənməsində Avropa İttifaqı təşəbbüsü ələ alsın. Ümumiyyətlə, Moskva Qərbin regionda təşəbbüsü ələ almasına qarşıdır”.
Vidadi ORDAHALLI
