Ermənistan növbəti avantüraya əl ataraq Azərbaycanla sərhəddən uzaq ərazidə qəsdən yanğınlar törədib. Ermənilər bunu, guya Azərbaycan tərəfinin dron hücumu ilə bağlayır. Qarşı tərəfin uydurma bəyanatına görə, yüzlərlə hektar ərazi yanğına məruz qalıb və hətta bu hücum nəticəsində Ermənistan ordusunun bir polkovniki də həlak olub. Görünən odur ki, Ermənistan öz ərazilərində yanğınlar törədərək Azərbaycanı ittiham edir.
Maraqlıdır, Ermənistanın sərhəd bölgələrində öz ərazilərini yandırıb Azərbaycanın üstünə atmaqda məqsədi nədir? O da məlumdur ki, işğal dövründə də ermənilər əraziləri yandırırdılar. Növbəti yandırmada öz əllərinin olmağını da ört-basdır etmək məqsədləri ola bilərmi?
“Yanğınların, guya təhlükəsizlik qayğılarından irəli gəlməsi ilə bağlı deyilənlər ag yalan idi”
Sözügedən məsələni “Bakı-Xəbər”ə şərh edən politoloq Elşən Manafovun fikrincə, bunda erməni tərəfinin bir sıra məqsədləri var: “Azərbaycan tərəfinin dron hücumu ilə bağlı baş vermiş yanğının söndürülməsi zamanı erməni xilasetmə qurumunun polkovnik leytenantı Armen Qasparyanın həlak olması ilə bağlı Ermənistan KİV-nin yayımladığı məlumatlar növbəti erməni yalanından başqa bir şey deyil. Bununla belə, Ermənistanın bizə qarşı apardığı informasiya müharibəsinin tərkib hissəsidir. Peykdən çəkilmiş görüntülərdə də erməni zabitinin özünün törətdiyi yanğını söndürmək istəyərkən ehtiyatsızlıqdan həlak olması açıq-aşkar görsənir. Bununla belə, bu hadisənin özundən belə informatik ajiotaj yaratmaq və bunu dünya mediasına çıxartmaq üçün ermənilərin təxribata əl atmaları şübhəsizdir. Ümumiyyətlə, işğalın davam etdiyi bütün bu müddət ərzində ermənilər dəfələrlə bu səpkili təxribatlara əl atmaqla həm Azərbaycana qarşı təzyiqlərin artmasına, həm də ziyan çəkmiş tərəf kimi bəlli dairələr tərəfindən onlara olan maliyyə, informasiya, siyasi dəstəyin daha da güclənməsinə çalışmışlar. Yanğınları Azərbaycan ərazisində törətməklə isə ermənilər həm respublikamızın ətraf mühitinə, həm də onun ekosisteminə ziyan vurmağa çalışıblar. Həmçinin, ərazilərdəki resursları tükətmək və ya məhv etmək, flora və faunanı dağıtmaq kimi bədniyyət əməllərini də həyata keçirməyə çalışıblar. Bəzi hallarda onlar bunun, guya ki, təhlükəsizlik tələblərindən irəli gəlməsi ilə bağlı cəfəng fikirlər səsləndirsələr də, əslində belə deyil. Bəllidir ki, bu yanğınların guya təhlükəsizlik qayğılarından irəli gəlməsi ilə bağlı deyilənlər ag yalan idi. Əksinə, Azərbaycana məxsus ərazilərdə yanğınlar törətməklə onlar həm də ətraf mühitin qorunması, ekosistemdə tarazılığın gözlənilməsi ilə bağlı qoşulduqları beynəlxalq konvensiyaları da kobud şəkildə pozurdular. Beynəlxalq təşkilatların bu problemlərə adekvat reaksiya göstərməmələri onları növbəti belə cinayətlərə əl atmağa sövq edirdi. Hazırkı şəraitdə Azərbaycanın ətraf mühit və ekosistemi mühafizəsinə, qorunmasına məsul olan qurumları da bütün bu faktları toplamalıdır. Ermənistan tərəfinin beynəlxalq konvensiyaların pozulmasına görə məsuliyyətə cəlb edilməsi üçün məlum beynəlxalq təşkilatlarla məqsədyönlü şəkildə iş aparmalıdırlar”.
Vidadi ORDAHALLI
