Ermənistanın Baş naziri Nikol Paşinyan Rusiya ilə münasibətlərdən danışıb. Bu barədə o, “La Repubblica”ya müsahibəsində söz açıb:
“Rusiyalı tərəfdaşlar tez-tez Qərb ölkələrinin Ermənistan hakimiyyətini Rusiyanı regiondan sıxışdırıb çıxartmağa sövq etdiyini deyirlər. Tarixdə Rusiyanın Cənubi Qafqazı tərk etməsi nümunələri olub. Eyni ssenarinin təkrarlana biləcəyi fikrini doğuran proseslər var. Oyanıb görə bilərik ki, Rusiya Federasiyası artıq regionda deyil... Biz rusiyalı tərəfdaşlarımıza deyirik ki, Rusiya müəyyən addımlar atsa da, atmasa da, bölgəni tərk edir. Bilmirik hansı səbəbdən. Biz ancaq ehtimal edə bilərik. Amma deyə bilərəm ki, bu bizi narahat edir”.
Maraqlıdır, Paşinyan doğrudan da hesab edir ki, Rusiyanın bölgəni tərk edəcəyi həqiqətdir, yoxsa bu da növbəti imitasiyadı?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Rusiya regionu tərk etmir, heç tərk etmək kimi niyyəti də yoxdur: “Sadəcə, Paşinyan açıq etiraf edə bilmir ki, onlar Rusiyaya bel bağlayıb, ancaq Moskva gözləntilərini doğrultmayıb. Rusiya ilə bağlı olan iradlar məhz bununla bağlıdır. Bununla Ermənistan özünün vassal olmasını dolayısı ilə etiraf etmiş olur. Bu, həqiqətən də belədir. Özünün suveren hüquqlarını dərk edə bilməyən bir ölkənin siyasi rəhbərliyi artıq bütün prosesləri özbaşına buraxıb. Biz aydın şəkildə görürük ki, Ermənistan daxilində xaos baş alıb gedir. Ölkə gecə-gündüz mitinq edib, etiraz şousu yaratmağa meyllidir. Robert Köçəryan kimi ekslər bir amalla yaşayırlar ki, yenidən idarəetməni ələ alsınlar. Belə fon yaradırlar ki, güya bunu edə bilsələr, Ermənistan təşəbbüsü ələ ala bilər. Bunların hamısı xülyadır. Ermənistanda gözəl başa düşürlər ki, onların ən böyük dərdi yürütdükləri səhv sitasətlə bağlıdır. Bir ölkənin iki mühüm qanunverici aktında Azərbaycan və Türkiyə düşmən ölkə kimi təsbit olunubsa, belə ölkədən nə gözləmək olar? Ölkə vaxtilə yaradılması ilə bağlı üzərinə qoyulan missiyadan kənara çıxa bilmir. 30 ildir ki, Ermənistana xaricdən siyasi və maddi dəstək verilir. Həmin pullar ölkənin inkişafına deyil, Azərbaycanla müharibəyə, Qarabağın işğalına xərclənir. Serj Sarkisyan gənc müdavimlərlə görüşdə deyirdi ki, biz Qarabağı aldıq, siz prosesi davam etdirməlisiniz. Nəzərdə Naxçıvan və digər torpaqlar tutulurdu. Güya bunlar belə yolla özlərini ifadə etməyə çalışırlar. Ermənistana heç dövlət də demək olmaz. Onların bütün amalı Azərbaycan və Türkiyə ilə müharibəyə girişməkdən ibarətdir. Buna görə də Paşinyanın fikirlərini cəfəngdən başqa nəsə saymaq olmaz. Bu bir daha göstərir ki, onların gələcəklə bağlı aydın siyasəti yoxdur. Yalnız və yalnız hansısa üçüncü ölkəyə, xüsusən də Rusiyaya bel bağlayırlar. Tutaq ki, Rusiya bölgədən gedəcək, onda Ermənistan adda ölkə dağılıb getməlidir? Bizim ölkə başçısı doğru olaraq dəfələrlə qeyd edib ki, Erməmistan suveren ölkə deyil. Belə ölkə olsaydı, özünə məxsus yer tuta bilərdi. Onlar çalışır ki, bütün prosesləri Laçın yolunun müqəddəratına bağlasınlar. Gündəmdə sülh danışıqları kimi mühüm proses varsa, niyə məhz Laçın yolu kimi bəhanəni ortaya atırlar? Bunlar ancaq cılız spektrli məsələləri özləri üçün əsas götürməklə, diqqəti özlərinə cəlb edirlər. Biz görürük ki, bu xalqın ümumiyyətlə lider yetişdirmək kimi qabiliyyəti yoxdur. 100 il əvvəl də onlar terrorla məşğul olublar, bu gün də həmin ənənəni yaşadırlar. Bu millət öz terror ənənəsi ilə öyünürsə, ondan yaxşı nəsə gözləməyə dəyməz”.
Məhəmmədəli QƏRİBLİ
