Rusiya XİN-in sözçüsü Mariya Zaxarova Azərbaycan bayrağını təhqir etdiyinə görə erməni futbolçuların Laçın sərhəd-buraxılış məntəqəsində saxlanılmasında Rusiya sülhməramlılarının da günahkar olması ilə bağlı suala cavabında deyib ki, Laçın dəhlizindəki hazırkı vəziyyət Ermənistanın Dağlıq Qarabağı Azərbaycanın ərazisi kimi tanımasının nəticəsidir.
Rusiya Xarici İşlər Nazirliyinin rəsmi nümayəndəsinin bundan sonra dedikləri də diqqət çəkir: “Bu, Avropa İttifaqının himayəsi altında ötən ilin oktyabrında və bu ilin mayında hər iki ölkənin liderinin iştirakı ilə keçirilən sammitində qeydə alınıb (Ermənistanın keçmiş Dağlıq Qarabağı Azərbaycanın ərazisi kimi tanıması - red.) Bu barədə Rusiya XİN-in "Qarabağ ətrafındakı vəziyyətlə bağlı" 15 iyul 2023-cü il tarixli bəyanatında da aydın deyilib. Bu məzmunda məsuliyyəti Rusiya sülhməramlı kontingentinin üzərinə qoymağı yersiz, düzgün olmayan və haqsız hesab edirik. İrəvan və Ermənistan hakimiyyəti tərəfindən Dağlıq Qarabağın Azərbaycana məxsusluğunun tanınmasından sonra yaranan yeni şəraitdə Rusiya sülhməramlı kontingentinin vəzifəsi Azərbaycana Qarabağ ermənilərinin bütün hüquq və təhlükəsizliyini təmin etməyə, o cümlədən Bakı ilə Xankəndi arasında birbaşa dialoqun qurulmasına bütün mümkün yardımı etməkdən ibarətdir".
Zaxarovanın bəyanatından belə çıxır ki, Rusiya sülhməramlıları öz üzərlərinə yeni missiya götürüb. Bu da Qarabağdakı ermənilərlə Azərbaycan hökumətinin dialoqunu təşkil etməkdir.
Əvvəla, sülhməramlıların vəzifələrinin 10 noyabr sənədi ilə müəyyən edildiyi hər kəsə məlumdur və həmin sənəddə Zaxarovanın indi dediyi vəzifəyə uyğun heç nə yoxdur. Zaxarovanın dediyindən belə anlaşılır ki, Ermənistanın "Qarabağ Azərbaycandır" deməsindən sonra yaranmış yeni şəraitdə sülhməramlıların yeni vəzifələri ortaya çıxıb ki, bu da 10 noyabr sənədi ilə ziddiyyət təşkil edir. Belə olan təqdirdə, sülhməramlıların bu yeni vəzifələri ilə bağlı niyə ictimai müzakirələr və Azərbaycan tərəfi ilə fikir mübadiləsi aparılmır?
Hərbi-siyasi ekspert Ramil Məmmədli “Bakı-Xəbər”ə bildirdi ki, Zaxarovanın ifadə etdiyi məqam sülhməramlıların funksiyasına aid deyil: “Azərbaycan heç Ermənistanı bu məsələdə yaxına buraxmır. Dəfələrlə bəyan edilib ki, bu, Azərbaycanın daxili işidir. Ermənilər bu dialoq formatını qəbul edib. Hətta bir dəfə Xocalıda Qarabağdakı ermənilərin nümayəndəsi ilə Azərbaycan dövlətinin təmsilçiləri arasında görüş oldu. Ardınca biz onları Bakıya, sonra Yevlaxa dəvət etdik, görüşdən yayındılar. Görüş yeri kimi əvvəl Slovakiyanın paytaxtı Bratislava təklif olunub, lakin ermənilər bundan imtina edərək, danışıqların Bolqarıstanın paytaxtı Sofiya şəhərində keçirilməsini istəyiblər. Azərbaycan tərəfi buna etiraz edib, bildirilib ki, danışıqlar ölkəmizin sərhədləri daxilində keçirilməlidir. Danışıqlar üçün ermənilərə yaxın olan Ağdam və Yevlaxın adı çəkilib. Belə bir dialoqun təşkili Rusiya sülhməramlılarının səlahiyyətinə aid deyil. Yaxşı olardı ki, sülhməramlılar öz üzərlərinə düşən öhdəlikləri yerinə yetirsinlər. Rusiya bu kontingentə özbaşına olaraq əlavə səlahiyyətlər verə bilməz. Çünki onların mandatı, bölgədə qalma müddəti mütləq mənada Azərbaycanla razılaşdırılıb və bundan sonra da razılaşdırılmalıdır”.
Məhəmmədəli QƏRİBLİ
