Ermənistanın Nazirlər Kabineti Beynəlxalq Cinayət Məhkəməsinin Roma statutunu ratifikasiya üçün parlamentə göndərib. Bu barədə Ermənistan hökumətinin mətbuat xidməti məlumat yayıb.
İyun ayında Ermənistanın ədliyyə naziri Qriqor Minasyan bildirib ki, hökumət Roma statutunun ratifikasiyasına dair qanun layihəsini yaxın həftələrdə parlamentə göndərəcək. Ermənistanın konstitusiya məhkəməsi martın 24-də Roma statutunun ölkənin konstitusiyasına zidd olmadığını bəyan edib.
Qeyd edək ki, Roma statutu Ermənistan parlamenti tərəfindən ratifikasiya olunacağı təqdirdə Beynəlxalq Ədalət Məhkəməsinin qərarlarının icrası Ermənistan hökuməti üçün məcburi xarakter daşıyacaq.
Xatırladaq ki, Haaqa tribunalı Rusiya prezidenti Vladimir Putinin həbsinə dair qərar çıxarıb. Roma statutu ratifikasiya olunarsa, Putin Ermənistan ərazisinə səfər edə bilməyəcək.
Ermənistanın bu addımı atması Rusiya ilə münasibətlərə hansı formada təsir edə bilər?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, bundan bir müddət əvvəl Ermənistanın Konstitusiya Məhkəməsinin Haaqa Məhkəməsinin Vladimir Putinin həbsi barədə qərarını konstitusiyaya uyğun hesab etməsi Rusiyada etirazla qarşılandı: “Kremlin sözçüsü Dmitri Peskov Ermənistan hakimiyyətinin məlum qərarının rəsmi İrəvanla müzakirə ediləcəyini açıqlasa da, ekspertlər Ermənistanın bu addımını Rusiya üçün təhqiredici və xəyanət hesab etdilər.
Bu, o anlama gəlir ki, Ermənistan artıq Rusiyadan uzaqlaşmaqda çox dərinə gedib. Daha dəqiq desək, bu Ermənistanın Rusiyaya xəyanətinin göstəricisidir. Rusiya dəfələrlə Ermənistanı və erməni xalqını müxtəlif vəziyyətlərdə və müxtəlif dövrlərdə xilas edib. Ona görə də, Ermənistanın Beynəlxalq Cinayət Məhkəməsinin qərarlarını tanıması birbaşa xəyanətdir. Rəsmi Moskva Ermənistanın bu xəyanəti ilə bağlı hansı addımı atacaq, bunu demək hələ ki çətindir. Lakin aydındır ki, indi Vladimir Putin formal olaraq Ermənistana səfər etsə, orada həbs oluna bilər. Onun ötən səfəri zamanı Paşinyan anti-Putin mitinqi təşkil etmişdi. İndi isə o, Putini həbs edəcək? Əlbəttə ki, bu təkcə Ermənistanın xəyanətkar siyasəti deyil, həm də ağılsız siyasətidir. Ermənistanın bu qərarı səbəbindən Rusiya daha çox Azərbaycana tərəf hərəkət edəcək, Azərbaycanın istəklərinə daha çox anlayışla yanaşacaq. Bu isə, Bakının tezliklə və effektiv şəkildə bütün Qarabağ üzərində nəzarəti ələ keçirməsi ilə nəticələnəcək.
Ermənistanın dövlət kimi mövcudluğunun əsas zəmanətçisi məhz elə Rusiyadır. İndi Rusiya cəmiyyətində belə sual yaranır: Ümumiyyətlə, Rusiyaya Ermənistan kimi müttəfiq nəyə lazımdır? Ermənistanın Beynəlxalq Cinayət Məhkəməsi ilə bağlı qərarının Rusiyaya münasibətdə konkret, birbaşa nəticəsi olmayacaq. Çünki Ermənistan ərazisində Rusiya prezidentinin həbsi mümkün deyil. Lakin bu hadisə Rusiya vətəndaş cəmiyyətinə və siyasi çevrələrinə Ermənistanla müttəfiqlik Rusiyaya nə verir və bu müttəfiqlik nəyə lazımdır sualı haqqında bir daha düşünmək üçün yaxşı imkan verir”.
Məhəmmədəli QƏRİBLİ
