“Qarabağdakı qanunsuz rejim buraxılmalı və tərksilah edilməlidir”. Bunu bu günlərdə Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
H.Hacıyev daha sonra bunları əlavə edib: “Azərbaycan Qızıl Aypara Cəmiyyətinin tədarük etdiyi buğda ununun istehsal mənşəyinə görə, (Azərbaycan) rədd edilməsi qeyri-qanuni marionet rejimin izlədiyi irqçilikdir. Azərbaycan artıq öz torpağında nəzarətsiz zonaya tolerantlıq göstərə bilməz. Qanunsuz rejim buraxılmalı və tərksilah edilməlidir”.
Beynəlxalq vasitəçilər Qarabağdakı ermənilərin hələ də silahlı vəziyyətdə qalmasının bölgədə proseslərin tənzimlənməsi yolunda ən böyük maneə olduğunu niyə anlamaq istəmirlər? Halbuki, bu, Laçın, Ağdam yolunun açılmasından da vacib məsələdir. Qarabağdakı ermənilərin tərksilah olması məsələsinin Azərbaycan tərəfindən rəsmən qaldırılmasına baxmayaraq, hələ də buna reaksiya vermək istəmirlər.
Məsələ ilə bağlı baki-xeber.com-a açıqlama verən hərbi ekspert İbrahim Rüstəmlinin fikrincə, beynəlxalq təşkilatların buna hələ də reaksiya verməməsi illərdir Azərbaycana münasibətdə sərgilənən ikili standartların davamıdır: “Bu, həmin beynəlxalq vasitəçilərdir ki, 30 il Qarabağda yaşananlara, işğal faktoruna, Azərbaycanın üzləşdiyi haqsızlıqlara sükutla yanaşdılar. Bunlar uzun müddət BMT-nin Qarabağla bağlı qəbul etdiyi 4 qətnaməni görməzdən gəldilər. Praktiki olaraq bu qətnamələri urvatdan saldılar. Azərbaycan Ordusu öz canı-qanı bahasına həmin qətnamələrin icrasını təmin etdi. Halbuki, Azərbaycan üçün prioritet problemin sülh yolu ilə həlli idi. Azərbaycan o qədər sərfəli variantlar təklif etdi, amma vasitəçilərin heç biri buna ciddi yanaşmadı. Azərbaycanın ərazi bütövlüyünü tanıyan vasitəçilər, aparıcı dövlətlər, ölkəmizin ərazi bütövlüyünün pozulmasına etinasız yanaşdılar. Bax budur reallıq. İndi də həmin vasitəçi dövlətlər Qarabağdakı silahlı dəstələrin tərksilah olması çağırışına etinasız yanaşırlar. Niyə? Ona görə ki, Azərbaycana münasibətdə ədalətin bərqərar olmasını istəmirlər. Məsələn, Gürcüstanda, Moldovada, Ukraynada separatizmə münasibətdə daha konkret və sərt mövqe sərgiləyən Qərb, Qarabağ separatçılarına eyni münasibət bəsləmir. Tam əksinə, separatçılara humanitar yardım adı altında vəsait ayırdılar. Bütün bunlar beynəlxalq hüququn təmin olunması məsələsində vasitəçilərin necə riyakar olduğunu ortaya qoyur. Onlar yaxşı bilirlər ki, “humanitar böhran” adı altında aparılan kampaniya real deyil. Məqsəd ermənilərin ac olmasını sübut etmək deyil. Çünki belə bir hal yoxdur. Məqsəd Qarabağı Azərbaycandan qoparmaqdır. Sadəcə, vasitəçilər istəmir ki, separatçılar birdəfəlik susdurulsun. Onlar bununla həm erməniləri himayə edirlər, həm də Qarabağ məsələsindən geosiyasi təsir aləti kimi istifadə edirlər. Ancaq nə etsələr də istəklərinə çata bilməyəcəklər. Azərbaycan gec-tez öz gücü ilə Qarabağdakı silahlı separatçıları tərksilah edəcək”.
Vidadi ORDAHALLI
