Xəbər verdiyimiz kimi, Qarabağdakı separatçıların rəhbəri Arayik Arutyunyan istefa verib. O, bu addımı ilə bağlı ermənilərə müraciət edib.
Arayik deyir ki, o, “prezident” olandan 4 ay sonra müharibə başlayıb: “Biz bu müharibədə məğlub olduq. Əlbəttə ki, məğlubiyyətin bütün günahını mənim üzərimə yıxmaq olar. Bu məsuliyyətdən imtina etmirəm. Buna görə ermənilərdən üzr istəyirəm”.
Separatçıbaşı daha sonra qeyd edib ki, müharibədən sonra durumları daha da ağırlaşıb. O, Azərbaycanın davamlı təzyiqlər göstərməsini ön plana çıxarıb: “Lakin biz mümkün qədər müqavimət göstərdik. Amma bunların yetərli olduğunu düşünmürəm. Ona görə də, prinsipial qərarların qəbul edilməsi üçün dəyişikliyə getməyi qərara aldıq. İlk addımı isə mən atıram. Qoy, dəyişiklik məndən başlasın”.
O deyib ki, istefa ilə bağlı qərarını iki gün əvvəl verib: “İstefamı sabah erməni xalqına təqdim edəcəm. Buna qədər “dövlət naziri” Qurgen Nersisyanı istefaya göndərmişəm. Onun yerinə isə Samvel Şahramanyanı gətirmişəm. Ona əminəm ki, hər şeyi etməyi bacaracaq”.
Arayik sonda deyib ki, Qarabağdan getmək fikrində deyil. O, ailəsi ilə birlikdə Xankəndidə yaşayacağını bildirib.
Arayik Arutunyanın istefası ilə bağlı başqa hansı məqamlar var və bunun bizə nə kimi xeyri və ya ziyanı ola bilər?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, Arayik Arutunyan bölgədə vəziyyətin çox gərgin olduğu bir zamanda istefa verir: “Bu, könüllü seçimdən daha çox, məcburiyyətə oxşayır. İstəyir ki, “mən çıxan kimi bunu elədiniz” fikirini ortaya qoya bilsin. Artıq separatçı rejim vəziyyətin çıxılmaz olduğunu anlayır. Görürlər ki, yaxın zamanda həmin ərazidə Azərbaycan öz suverenitetini tam bərpa edəcək. Maksimum dərəcədə çalışırlar ki, erməni qınağından kənarda qala bilsinlər. Arayik Artunyanın istefasının Azərbaycana xeyrinə və zərərinə gəldikdə, məsələ belədir ki, Arayik az - çox təsir gücünə malik idi, Azərbaycanın tələblərini anlasaydı, onun vasitəsilə o tələblərin icrası müəyyən qədər asan olardı. Arayikin getməsi, yeni gələnin iddiası, ultramillətçilərin və lobbiçilərin əlində olması, Rusiya tərəfindən oyuncağa çevrilməsi müəyyən sıxıntılar yarada bilər. Amma Arayikin getməsinin yararı da var. Bu yarar odur ki, artıq orda iddialı qüvvələr çox olduğuna görə sabitlik olmayacaq. Bir tərəfdən Azərbaycanın, bir tərəfdən Ermənistanın öz basqısı, bir tərəfdən də Rusiyanın öz maraqları üçün manevrləri həmin adamları daha çox çıxılmaz vəziyyətə salacaq, oyuncağa çevirəcək. Amma istənilən halda Azərbaycanın son addımları çox doğru və yararlı oldu. Mən sizə bir məsələni də demək istəyirəm. Cənubi Koreya Azərbaycanın erməni əsilli əhalisinə humanitar yardım üçün Azərbaycana 7 milyon dollar yardım ayırıb. Mən çox istəyərdim ki, Koreyanın o yardımına Türkiyə, Özbəkistanın və bu kimi ölkələrin də yardım maşınları qoşulsun. Belə maşınların bölgəyə gəlməsi beynəlxalq yardım halı alar və bu, ermənilərin vəziyyətini daha da ağırlaşdırar. Saxta erməni təbliğatının qarşısında bir maneəyə çevrilər. Mən çox istərdim ki, Azərbaycan hakimiyyəti təcili bu addımların da baş tutmasına nail olsun”.
Məhəmmədəli QƏRİBLİ
