“Sputnik” radiosunun Qarabağda yayımının dayandırılması ilə bağlı önəmli məqam ortaya çıxıb. “Rossiya seqodnya” xəbər agentliyinin baş direktoru Dmitri Kiselyov Dövlət Dumasının MDB işləri, Avrasiya inteqrasiyası və həmvətənlərlə əlaqələr üzrə komitəsi sədrinin birinci müavini Konstantin Zatulinin radionun bərpası ilə bağlı çağrışına rədd cavabı verib və bunu belə əsaslandırıb:
“Bir müəddət əvvəl Ermənistanın baş naziri Nikol Paşinyan bəyan etmişdi ki, sülhə nail olmaq üçün İrəvan Azərbaycanın ərazi bütövlüyünü tanımağa və Ermənistanın ərazisini 1991-ci il sərhədləri daxilində təsbit etməyə hazırdır. Biz bu bəyanatdan çıxış edirik və hesab edirik ki, Azərbaycanın tənzimləyici orqanlarının razılığı olmadan Qarabağ ərazisində yayımımızın davam etdirilməsi Moskva tərəfindən münasibətlərin səmimiliyini şübhə altına alır və mürəkkəbliklə doludur. Ölkələrimiz arasında dövlətlərarası münasibətlərin inkişafının vacibliyini əsas gətirərək bu qərara gəldiyimizi bir daha bəyan edirik. Yayımı davam etdirmək üçün rəsmi Bakının icazəsi lazımdır”.
Qeyd edək ki, Zatulin daha əvvəl məktubla müraciət edərək “Rossiya Seqodnya” media qrupunu “yayımı dayandırmaq qərarına” yenidən baxmağa çağırmışdı.
“Rusiyada müəyyən dairələr hansı oyunlardan çıxsalar da, Qarabağdakı separatçıları əvvəlki kimi dirçəldə bilməyəcəklər”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucovun fikrincə, Zatulin və onun kimi erməni lobbisindən yallanan Rusiyanın bir sıra siyasiləri Qarabağda gedən son proseslərdən bərk narahatdılar: “Əvvəla, “Rossiya seqodnya” xəbər agentliyinin “Sputnik” radiosunun Qarabağda yayımı qanunsuz idi. Ən azından ona görə ki, bu, digər dövlətin daxili işinə kobud müdaxilədir. Digər tərəfdən, Rusiya Azərbaycanın ərazi bütövlüyünü tanıyıb. Belə olan halda Kiselyovun açıqlaması o qədər də məntiqli görünmür. Mütləq idi ki, Paşinyan məlum açıqlama verəndən sonra radionun yayımı dayandırılsın? Ancaq nəzərə alsaq ki, Rusiya postsovet məkanında separatçı ocaqların yaradıcısıdır, o zaman bu, o qədər də təəccüblü deyil. Lakin o da var ki, Paşinyanın anti-Rusiya siyasəti müəyyən qədər bizim maraqlarımıza uyğundur. Biz Vətən müharibəsində işğal altında olan ərazilərimizin böyük hissəsini azad etdik. Daha sonra bir sıra digər vacib strateji yüksəklikləri nəzarətə götürdük. Ən başlıcası, Laçın yolunun başlanğıcında nəzarət-buraxılış məntəqəsinin qurulması çox ciddi uğur idi. Görünən odur ki, bütün bunlar Zatulin kimi erməni lobbisindən bəslənən siyasiləri bərk narahat edir. Baxmayaraq ki, Zatulinin Ermənistana girişi qadağan olunub, amma o, köpək kimi separatçıları müdafiə etməkdə davam edir. Halbuki, hazırkı vəziyyət 90-cı illərdəki kimi deyil. Azərbaycan da 30 il əvvəlki dövlət deyil. Ona görə də Rusiyada müəyyən dairələr hansı oyunlardan çıxsalar da, Qarabağdakı separatçıları əvvəlki kimi dirçəldə bilməyəcəklər. Separatizmdən təsir rıçaqı kimi istifadə etmək artıq əvvəlki kimi effektli deyil. Üstəlik, Rusiyanın Ermənistanla birbaşa quru sərhədinin olmadığını nəzərə alsaq, çox şey mümkün deyil”.
Vidadi ORDAHALLİ
