Ermənistan silahlı qüvvələrinin bölmələri Basarkeçər rayonunun Zod kəndi istiqamətində yerləşən atəş mövqelərindən Azərbaycan Ordusunun Kəlbəcər rayonu istiqamətində yerləşən mövqelərini minaatanlardan atəşə tutub. Bu barədə Müdafiə Nazirliyi məlumat yayıb. Müdafiə Nazirliyindən verilən məlumata görə, Ermənistan tərəfi Basarkeçər rayonunun Zod yaşayış məntəqəsi istiqamətindəki mövqelərinə əlavə döyüş texnikası və canlı qüvvə cəmləşdirir.
Bildirilib ki, Ermənistan tərəfi növbəti təxribatlar üçün zəmin yaratmaq məqsədilə dezinformasiya xarakterli məlumatlar yayır və beynəlxalq ictimaiyyətdə yanlış fikir formalaşdırmağa çalışır: "Yaranmış gərginliyə və onun fəsadlarına görə bütün məsuliyyət Ermənistanın hərbi-siyasi rəhbərliyinin üzərinə düşür".
"31 avqust-1 sentyabr tarixlərində Ermənistan tərəfi növbəti dəfə hərbi təxribata əl atıb. Bu barədə isə Xarici İşlər Nazirliyindən bildirilib.
Ermənistan silahlı qüvvələrinin Zod istiqamətindəki bölmələri Azərbaycan Ordusunun Kəlbəcər rayonu ərazisində yerləşən mövqelərinə qarşı zərbə PUA-larından və atıcı silahlardan istifadə etməklə atəş açıblar.
Azərbaycan tərəfinin mövqelərinə qarşı məqsədyönlü şəkildə törədilmiş bu təxribat nəticəsində ümumilikdə 3 hərbi qulluqçumuz yaralanıb.
Ermənistan tərəfindən ölkə daxilində gərgin siyasi-ictimai vəziyyətdən diqqəti yayındırmaq, habelə beynəlxalq ictimaiyyəti yanıltmaq məqsədilə törədilən bu kimi əməllər ciddi formada beynəlxalq ictimaiyyət tərəfindən rədd edilməli və qınanılmalıdır.
Ermənistanın törətdiyi təxribatlara görə məsuliyyət tam şəkildə bu ölkənin üzərinə düşür.
Azərbaycan bundan sonra da bu kimi təxribatların qarşısının alınması istiqamətində bütün lazımi tədbirləri görməyə davam edəcək.
Xatırladaq ki, sentyabrın 1-i səhər saatlarında Ermənistan silahlı qüvvələrinin Basarkeçər rayonunun Zod istiqamətindəki bölmələri tərəfindən Azərbaycan Ordusunun Kəlbəcər rayonu ərazisində yerləşən mövqelərinə qarşı zərbə PUA-sı tətbiq edilməsi nəticəsində daha iki hərbi qulluqçumuz yaralanıb. Eyni zamanda Azərbaycan Ordusunun hərbi qulluqçusu Tağıyev Məhəmməd Ramiz oğlu yaralanıb.
Ermənistan sərhəd təxribatlarına artilleriyanı cəlb etdi - niyə məhz indi?...
"Ermənistan birmənalı olaraq sülh istəmir"
Milli Qeyri Hökumət Təşkilatları Forumunun prezidenti Rauf Zeyni "Bakı-Xəbər"ə şərhində bildirdi ki, Ermənistanın son təxribatları təsadüfi deyil və birbaşa Azərbaycanın xoş niyyətlərinə kölgə salmaq niyyətindən irəli gəlir. R.Zeyni hesab edir ki, Azərbaycanın hazırda Xankəndiyə əl uzatdığı bir vaxtda bu təxribatın baş verməsi Ermənistanın kirli məqsədini ortaya qoyur. Ermənistanın Ağdam-Xankəndi yolunun açılmasına qarşı olduğunu xatırladan R.Zeyni qeyd edir ki, o öz aləmində hərbi təxribatla Azərbaycanı öz mövqeyindən döndərmək istəyir.
"Ermənistan heç vaxt təxribatlarına ara verməyib. Danışıqların getməsinə, sülh sazişinin bağlanmasının gündəmdə olmasına baxmayaraq, vaxtaşırı sərhəd boyunca Ermənistan tərəfindən təxribatlara əl atılır. Ermənistan təxribatlardan heç vaxt əl çəkməyib. Onun təxribatları nəticəsində bizim hərbiçilərimiz yaralanıblar, şəhid olublar. Bu gün də yenə Ermənistan təxribat törədib, hərbiçimiz yaralanıb, Xarici İşlər Nazirliyi də beynəlxalq ictimaiyyətə müraciət edib. Ermənistanın bu təxribatı indiki şəraitdə törətməsi qətiyyən təsadüfi deyil. Bir tərəfdən, Xankəndidə "blokada" şousu var, bir tərəfdən Paris meri şou yaradır, o biri tərəfdə separatçılar arasında narazılıq var".
R.Zeyni qeyd etdi ki, Arayik Arutyunyanın "istefa verdiyi" bir vaxtda, Rubenin fəallaşdığı bir məqamda Ermənistanın sərhəd təxribatları həyata keçirməsi onun qətiyyən sülh istəmədiyini deməyə əsas verir: "Ermənistan birmənalı olaraq sülh istəmir. Bu da bizə əsas verir ki, erməni hərbi təxribatlarına son qoyaq, onun növbəti dəfə layiqli cavabını verək, əks-hücum əməliyyatlarını bərpa edək, antiterror əməliyyatı keçirək. Onların qanunsuz hərbi birləşmələri zərərsizləşdirilməlidir və əlbəttə, Ermənistan rəhbərliyinə də ciddi xəbərdarlıq edilməlidir. Hər dəqiqə, hər an hər hansı bir təhlükə gözləmək olar. Ancaq bu təxribatlara birdəfəlik son qoyulmalıdır ki, əhalinin, Ordumuzun, ölkəmizin sərhədlərinin təhlükəsizliyi təmin olunsun. Beynəlxalq hüquq imkan verir, beynəlxalq ictimaiyyətlə də razılaşdırılıb bufer zonası yaratmaq lazımdır, Ermənistan görsün ki, təxribatlara son qoya bilmirsə, ona qarşı tədbir görüləcək" - deyə R.Zeyni qeyd etdi.
Əli TURABOV
