"Azərbaycan Rusiyanın sülhməramlı kontingentinin iştirakı ilə Dağlıq Qarabağda ermənilərin soyqırımı siyasətini davam etdirir". Bu sərsəm və məsuliyyətsiz açıqlama ilə Nikol Paşinyan avqustun 31-də Ermənistan hökumətinin iclasında çıxış edib.
Paris meri Ann İdalqonun başçılıq etdiyi nümayəndə heyətinin Zəngəzurda "humanitar karvanı" müşayiət etdiyini bildirən Paşinyan qeyd edib ki, nə bu karvana, nə də iyulun 26-dan orada dayanan "humanitar yük" daşıyan yük maşınlarına "Dağlıq Qarabağa" (? ) (Nikol hələ də dərk etmir ki, "Dağlıq Qarabağ" adlı ərazi vahidi yoxdur, Qarabağ iqtisadi rayonu var) daxil olmaq imkanı verilməyib.
"Bu o deməkdir ki, Azərbaycan Rusiya sülhməramlı kontingentinin iştirakı ilə Dağlıq Qarabağ ermənilərinin aclıq yolu ilə soyqırımı siyasətini davam etdirir. Bu siyasətin əsas məqsədi "Dağlıq Qarabağ" ərazisini ermənilərdən azad etməkdir. Bayaq dediyim kimi, bu dəhşətli planın həyata keçirilməsi ssenarilərindən biri belədir: Azərbaycan "humanitar böhranın" ən kəskin mərhələsində birtərəfli qaydada Laçın dəhlizini açmağı, insanların "Dağlıq Qarabağı" tərk etməsinə şərait yaratmağı və onların geri qayıtmasının qarşısını almağı planlaşdırır. Bu soyqırım və deportasiya siyasəti XXI əsrdə, beynəlxalq ictimaiyyətin gözü qarşısında baş verir”, - Nikol Paşinyan sərsənləyib.
Paşinyan heç zaman reallıqdan, həqiqətdən danışmayıb. Həmişə olduğu kimi, yenə də dünyanın gözünə kül üfürürməklə məşğuldur. Maraqlıdır, Azərbaycanla yanaşı o, Rusiyanın da ünvanına ittihamlar səsləndirib. İki əsrə yaxındır onları himayə edən ruslara da "ağzının acısını" tökən Paşinyan qondarma "blokada" və "genosid" oyunu ilə niyyətlərini tam ifşa edir. Dünya bilir ki, deyilənlər yalandır və Qarabağda yaşayan ermənilər bizim vətəndaşlarımızdır. Bir də Paşinyan niyə demir ki, Azərbaycan Xankəndiyə humanitar yardım gətirib, ermənilər acından ölmədikləri üçün Azərbaycanın xeyirxah əlini sıxmaq istəmirlər?
“Paşinyan Qərbdən birmənalı dəstək almaq istəyir və Qərbə göstərmək istəyir ki, Ermənistanın qarşısında Azərbaycanla yanaşı, guya Rusiya da var”
Siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində bildirdi ki, Paşinyanın iddiası tamamilə absurddur: “Biz Paşinyanın belə bir ziddiyyətli mövqeyinə və hər zaman faktları təhrif etməsinə, bir çox hallarda yalan danışmasına artıq alışmışıq. Əslində Ermənistan hökumətinin, baş nazirinin bu cür ziddiyyətli mövqeyi bu gün iki ölkə arasında sülhün əldə olunmasına əsas maneələrdən biri kimi qəbil edilməlidir. Yəni belə ziddiyyətli, bir - birini təkzib edən mövqeyə görə biz Ermənistanla sülhə nail ola, sülh müqaviləsini imzalaya bilmirik. Konkret olaraq Ermənistanın baş nazirinin səsləndirdiyi ittiham da böhtandan və yalandan başqa bir şey deyil. Yəni bu ittiham heç bir halda Azərbaycan tərəfindən qəbul edilə bilməz”.
M.Məmmədlinin sözlərinə görə, bölgədə necə "etnik soyqırım" həyata keçirilir ki, birincisi, bugünə qədər Laçın-Xankəndi yolundan ermənilər istifadə edib, etməkdə də davam edirlər? İkincisi də, Qarabağdakı ermənilərin humanitar ehtiyaclarını ödəmək üçün Azərbaycan dəfələrlə yardımlar təklif edir: “Bildiyiniz kimi, artıq Qarabağda yaşayan ermənilərə Ağdam-Xankəndi yolu təklif edilib və artıq Azərbaycan hətta özü orada yaşayan ermənilərə ərzaq göndərib, amma hələ qəbul etməyiblər. Azərbaycanın humanist addımlarına baxmayaraq, ermənilər israrla Azərbaycanın göndərdiyi ərzağı qəbul etməkdən imtina edir. Bu da ondan xəbər verir ki, əslində ermənilərin qaldırdığı məsələ, humanitar böhran şousu, kampaniyası humanitar deyil, siyasi xarakterlidir. Məqsədləri ilk növbədə sülh prosesini pozmaq, ləngitmək, Azərbaycana qarşı beynəlxalq səviyyədə müəyyən qərarların qəbul olunmasına nail olmaqdır və s. Bütün bunlar Ermənistan hökumətinin xoş olmayan niyyətinin göstəricisidir, pozucu mövqeyindən xəbər verir.
Paşinyan hökumətinin Rusiya ilə ciddi problemlərinin olması aydın məsələdir. Zaman-zaman bu problemlər sistematik olaraq tərəflər arasında çıxır. Paşinyanın bu dəfə Rusiya sülhməramlı qüvvələrini də ittiham etməkdə bəlli bir siyasi məqsədi var. Məqsəd də odur ki, Paşinyan Qərbdən birmənalı dəstək almaq istəyir və Qərbə göstərmək istəyir ki, Ermənistanın qarşısında Azərbaycanla yanaşı guya Rusiya da var. Guya Rusiya sülhməramlıları bölgədə Azərbaycana kömək edir, Azərbaycanın addımlarına seyrçi yanaşır və sair. Təbii, bu heç bir əsası olmayan fikirlərdir, çünki Rusiya sülhməramlı qüvvələrinin bölgədəki fəaliyyətindən Ermənistandan daha çox Azərbaycan narazıdır. Çünki Rusiya sülhməramlı qüvvələri bir çox hallarda öz missiyasından kənar fəaliyyət göstərib”-deyə bildirən M.Məmmədli qeyd etdi ki, onlar müəyyən öhdəliklərini həyata keçirməyiblər. Onun sözlərinə görə, Rusiya 2020-ci il 10 noyabr bəyanatına əsas qarant olan dövlətdir və bugünə qədər həmin bəyanatın bir çox bəndləri həyata keçirilməyib, Rusiya da, bölgədəki Rusiya sülhməramlı qüvvələri də bununla bağlı hər hansı bir addım atmayıb. “İkinci Qarabağ müharibəsi bitdikdən sonra qondarma rejimə və Ermənistana aid olan erməni silahlı birləşmələri hələ də Qarabağda mövcudluğunu davam etdirir. Halbuki, üçtərəfli bəyanata əsasən Rusiya onları çıxarmalı idi”-deyə müsahibimiz bildirdi.
İradə SARIYEVA
