Beynəlxalq təşkilatların əsas missiyası dövlətlərə, xalqlara eyni gözlə baxmaq, insanların milliyətinə, dilinə, dininə, irqinə, cinsinə fərq qoymadan onların hamısının hüquqlarını müdafiə etmək, haqlarını özünə qaytarmaq olmalıdır. Amma təəssüf ki, bu belə deyil, bütün beynəlxalq təşkilatlar ayrıseçkiliyə yol verir.
Beynəlxalq Qırmızı Xaç Komitəsi (BQXQ) başqa təşkilatlardan heç nə ilə fərqlənmir, o da digər qurumlar kimi ermənipərəstdir. Belə olmasaydı, biz keçən 30 ildə və 44 günlük müharibədən sonra bu təşkilatdan ədalətli mövqe, yanaşma görə bilərdik, o öz qərəzsizliyini, tərəfsizliyini göstərə bilərdi. Amma bilindiyi kimi, bunlar baş vermədi.
Dünən olduğu kimi, bu gün də BQXK-nin Qarabağdakı fəaliyyəti ermənilərin mövqeyini müdafiə etməkdən ibarətdir. Qeyd edildiyi kimi, bu indi də belədir, keçmişdə də belə olub. Məlumdur ki, son aylar BQXK-nın ermənipərəst davranışı daha qabarıq şəkildə özünü göstərir. Qurumun təmsilçilərini daha çox ermənilərin vəziyyəti düşündürür. 30 il azərbaycanlıların faciəsinə seyrçi qalan BQXK indi erməni separatçılarının əsas dayaq yerinə çevrilib. İş o yerə çatıb ki, BQXK-nin əməkdaşları və avtomobilləri separatçıların ixtiyarındadır. Hətta onların rüşvət aldığına dair şayiələr də var.
Məlum olduğu kimi, hələ bu ilin əvvəllərində BQXK-nın maşınlarının İrəvandan Qarabağa gizli, şübhəli yük daşıdığı barədə xəbərlər yayılmışdı. Bundan əlavə qeyd edilirdi ki, komitənin maşınında gizli yollarla separatçılar Ermənistana keçirilir. Bundan başqa, bu ilin iyul ayında Beynəlxalq Qırmızı Xaç Komitəsinin avtomobillərində qaçaqmalın keçirilməsi cəhdləri aşkarlandı. Belə ki, ermənilər Azərbaycana gizli mobil telefon, onun hissələri və aksesuarlarını, siqaret və benzin keçirməyə cəhdlər edirlər. Hətta o vaxt BQXK avtomobillərinin Laçın dövlət sərhədindən buraxılış məntəqəsindən keçidi müvəqqəti olaraq dayandırılmışdı da.
Onlar insanları öz maşınlarında gizli yolla keçirdiyi deyilirdi və həqiqətən də bu fakt aşkarlandı, komitə nümayənləri bir nəfəri keçirərkən ifşa olundu. Onların qaçaqmalçılıq əməlləri də gizlin qalmadı. O vaxt bu əməllərə görə Azərbaycan yolu tamamilə bağlamaq məcburiyyətində qaldı. Ondan sonra baş verən proseslərdə də BQXK heç bir sağlam mövqe ortaya qoymadı. Ermənilərə humanitar yardımın çatdırılması məsələsində komitə çox ləng mövqe tutur, əslində, ermənipərəst yoldadır. Hələ bir dəfə deməyib ki, Azərbaycanın təklif etdiyi Ağdam-Xankəndi yolu ilə Qırmızı Xaç Komitəsi yardım gətirsin. Azərbaycan təklif etdi ki, Qırmızı Xaçın bölgədəki mərkəzi ofisi Bakıda olsun, yaxud onlar Qarabağdakı ermənilərə yardım apararkən Bakı ofisinin əli ilə aparsın, amma razılaşmadılar. Aydın deyil ki, yardım niyə İrəvan ofisinin əli ilə getməlidir. Azərbaycanın təkliflərinə komitənin heç bir reaksiyası yoxdur, altdan-altdan da prosesləri pozmaqla, qızışdırıcılıqla məşğuldurlar. Qayda-qanunla hərəkət edə bilmirlər, bölgədə sülh mənafeyinə uyğun davranış sərgiləmirlər. Onların fəaliyyəti kəskin şəkildə tənqid olunur. Birinci və İkinci Qarabağ müharibələri dövründə də eyni mövqeni tutdular. İndi də yenə ermənipərəstdirlər, birmənalı şəkildə komitənin işindən narazılıq var. Onların Qarabağdakı fəaliyyəti ermənilərin mövqeyini müdafiə etməkdən ibarət olub.
"Bu gün baş verənlərdə komitənin məsuliyyəti çoxdur və bu ona tez-tez xatırladılmalıdır "
"Müasir İnkişaf" Birliyinin sədri Mübariz Göyüşlü "Bakı-Xəbər"ə şərhində "BQXK bölgədə öz vəzifəsini icra etmək əvəzinə erməni separatçılarına xidmət göstərir. Halbuki, onun missiyası ermənilərə xidmət etmək deyil. Hesab edirəm ki, bu, BQXK-nın bitərəf, humanitar dəstək missiyasına ziddir. BQXK-nən öz nizamnaməsinə, götürdüyü öhtəliklərə zidd fəaliyyət göstərməsi bu təşkilatı nüfuzdan salır. BQXK rəhbərliyi bu barədə ciddi düşünməlidir. Bitərəflik, obyektivlik komitənin əsas fəaliyyət istiqamətlərindən, prinsiplərindən biridir. Təəssüf ki, biz o komitənin bitərəf deyil, ermənipərəst mövqedən çıxış etməsinin şahidi oluruq. Xatırlayırıq ki, bir müddət bundan əvvəl bu qurumun sürücülərinin və texniki xidmət əməkdaşlarının qaçaqmalçılıqla məşğul olduğu üzə çıxdı. Bu da Azərbaycanın narazılığına səbəb oldu. BQXK rəhbərliyi özü etiraf etmişdi ki, komitəyə aid avtomobillərdən qaçaqmalçılıq üçün istifadə olunub, bu özü bu komitənin simasını ifşa edən amillərdən biridir"-deyə bildirdi.
M.Göyüşlünün sözlərinə görə, bunlar da BQXK-nın nüfuzuna çox ciddi zərbə vurmaqla yanaşı, onun fəaliyyətini gözdən salır. "Bu komitənin Xankəndidə, başqa yerdə missiya həyata keçirməsi birbaşa rəsmi Bakı ilə razılaşdırılmalıdır. Bu gün baş verənlərdə komitənin məsuliyyəti çoxdur və bu ona tez-tez xatırladılmalıdır. Xankəndiyə bu qurumun nümayəndələri Bakıdan getməlidir. Bu qurumun Xankəndidə nümayəndəliyinin olmasının özü sual doğuran məsələdir. Mənə belə gəlir, bu faktı gələcəkdə Azərbaycan müzakirəyə çıxarıb mübahisələndirə bilər ki, bu qurumun hansı səbəbdən separatçıların toplaşdığı Xankəndidə nümayəndəliyi yaradılıb? Bütövlükdə, BQXK-nı, onun nümayəndələrini Azərbaycana münasibətdə qərəzdən əl çəkib obyektivliyə çağırıram, onların bu həssas məsələlərdə obyektivliyi gələcək fəaliyyətləri üçün önəmlidir"-deyə M. Göyüşlü vurğuladı.
Əli TURABOV
