Başı Afrika dərdindən ayılmayan, əsgərləri "qara qitə"də rəzil duruma düşən Emmanuel Makron Ermənistan üzərindən üstümüzə gəlir. Məqsəd bəllidir, yeni ərazilərdə hökmran olmaq, yeni torpaqlar ələ keçirmək. İmperiya xislətli bu ölkəni düşündürən Azərbaycanın təbii sərvətləri və Orta Asiyanın enerji daşıyıcılarının və Cənub-Şərqi Asiya ölkələrindən gələn yüklərin keçəcəyi Orta Dəhlizin əsas seqmentlərindən biri olan Azərbaycana nəzarətdir.
Fransa bu gün beynəlxalq münasibətlər sistemini ayaqlar altına atır, dünya düzəninə qarşı çıxır, Afrikada itirdiyi nüfuzunu azacıq da olsa Cənubi Qafqazda hələ də başa çatmayan müharibənin hesabına bərpa etmək istəyir. Baş verən son proseslərdə rəsmi Parisin bu özünə əsassız əminliyi qabarıq şəkildə müşahidə olunur. Belə ki, prezident Emmanuel Makron açıq şəkildə Ermənistanı himayə edəcəyini və Azərbaycana təzyiq göstərməyə çalışacağını bildirmişdi. Eyni zamanda, Parisin və digər Fransa şəhərlərinin merləri Laçın postunun açılması missiyasını öz üzərlərinə götürmüşdülər. Yəqin hesab edirdilər ki, onların müşayiət etdiyi "humanitar yük" heç bir əngəllə üzləşmədən birbaşa Azərbaycanın Xankəndi şəhərinə qədər irəliləyə biləcək.
Amma burada da cəhdləri alınmayıb. Parisin meri İdalqo Azərbaycanla sərhədə 10 TIR-ı ilə birgə elə sürətlə gəlmişdi ki, ermənilər xanım merin artıq Xankəndidə olduğunu bir anlığa fərz etmişdilər.
Avqustun 31-də Fransanın Azərbaycandakı səfiri Ann Buayon Xarici İşlər Nazirliyinə (XİN) çağırılıb. Nazirliyin Mətbuat xidməti idarəsindən bildirilib ki, görüş zamanı Paris şəhərinin meri Ann İdalqo daxil olmaqla Fransanın bir neçə şəhərinin rəhbər şəxslərinin müşayiəti ilə "humanitar yük" adı altında "Laçın" dövlət sərhədindən buraxılış məntəqəsi istiqamətinə nəqliyyat vasitələrinin göndərilməsi və həmin şəxslər tərəfindən Azərbaycana qarşı təxribatçı bəyanatlar səsləndirilməsi ilə bağlı XİN-in etiraz notası Fransa səfirinə təqdim edilib.
Fransa tərəfinin bu addımlarının Azərbaycanın daxili işlərinə birbaşa müdaxilə olmaqla yanaşı, ölkəmizin beynəlxalq hüquqla qorunan suverenliyi və ərazi bütövlüyünə qarşı qəsd olduğu vurğulanıb. Qeyd olunub ki, Ermənistanın yalan və manipulyasiya kampaniyasına alət olan bu təxribatçı əməllər bölgədə vəziyyətin gərginləşməsinə yönələn və Fransa tərəfindən Ermənistanı revanşist mövqeyini davam etdirməyə həvəsləndirən və son günlər daha da intensivləşən addımların növbəti nümunəsidir. Azərbaycan tərəfi beynəlxalq humanitar yardımın göndərilməsi ilə bağlı beynəlxalq hüquqi çərçivəyə zidd olaraq nümayişkaranə şəkildə Azərbaycan tərəfi ilə razılaşdırmadan, onun iradəsinin əksinə Azərbaycanın beynəlxalq hwquqla tanınmış ərazisinə hər hansı bir ad altında yüklərin göndərilməsi cəhdini təxribatçı əməl kimi qiymətləndirib və buna qəti etirazı qarşı tərəfin diqqətinə çatdırılıb. Maraqlıdır ki, Fransa bölgədə ciddi maraqlarının olduğunu gizlətməyən Rusiyanın başının Ukraynada müharibəyə qarışmasından istifadə etməklə, hətta Ermənistana Avropa Birliyinin hərbiləşdirilmiş missiyasının göndərilməsinə də nail oldu. Bununla Makron öz mövqeyini gücləndirməklə yanaşı, həm də Azərbaycanla Ermənistan arasındakı sülh prosesinə bacardığı zərbəni vura bildi. Məlumatlara görə, Ermənistanda olan Avropa Mülki Missiyası Ermənistanda 8-ə qədər mərkəz yaratmaq istəyir. Hətta bunlardan bir neçəsini artıq yaratdıqları da bildirilir. Təbiidir ki, belə mərkəzlər Fransanın Ermənistandakı hərbi bazalarının ilkin rüşeymləri rolunu oynamaqdadır. Əslində, Fransa Ermənistanın birbaşa dəstəyi ilə bölgədə özünün mini hərbi bazalarını yaratmağa nail olub. Təbiidir ki, belə addımlar bölgədə sülhün və təhlükəsizliyin təmin olunmasında ciddi maneə rolunu oynayır.
Əlbəttə ki, Azərbaycan hələ o vaxtdan bu missiyanın heç də xoşməramlı olmadığını bəyan etmiş və bununla bağlı narahatlığını bildirmişdi. Sonrakı dönəmdə baş verən proseslər, xüsusən də yaşanan təxribatlar Azərbaycanın nə qədər haqlı olduğunu göstərmiş oldu.
Beləliklə, Avropa İttifaqının Ermənistandakı missiyası öncə iddia etdiyi mandatından kənara çıxır və regionda jandarmeriya və mini hərbi baza funksiyasını yerinə yetirməyə cəhd edir. Lakin onların fəaliyyətləri, səsləndirdiyi bəyanatlar Azərbaycan üçün heç nə ifadə etmir. Çünki Azərbaycan öz təhlükəsizlik fəaliyyətini Aİ missiyasının bəyanatlarına görə yox, öz milli dövlət maraqları çərçivəsində həyata keçirir.
Məhəmmədəli QƏRİBLİ
