Fransanın paytaxtı Paris şəhərində aylardır zibil zibilə qarışıb, antisanitariya baş alıb gedir. Xarici rəyçilərə görə, paytaxt Parisin zibil problemi günü-gündən dərinləşir. Biz hər gün yeni məlumatlar oxuyuruq ki, gözəlliklər şəhəri Parisi üfunət bürüyüb, antisanitariya başına götürüb.
İşin öhdəsindən nə bələdiyyələr, nə özəl şirkətlər, nə emal müəssisələri, nə də hökumət gələ bilir, çünki Parisin meri yerində olmayan, bir para separatçının əlində oyuncağa çevirilən muzdlu Ann İdalqodur. O öz işini görmək, Parisi zibildən təmizləmək əvəzinə ona və ölkəsinə dəxli olmayan işlərlə məşğul olur. Öz zibili üst-üstə qalaqlanıb, onu təmizləmir, gəlib separatçıların “zibilinə” şərik olur.
Bu yerdə aşıq Ələsgər yaxşı deyib:
Zibilin çıxıbdır dizə,
Külündən xəbərin varmı?
Söhbət ondan gedir ki, rəhbərlik etdiyi şəhərin əhalisinin rifahını, rahatlığını düşünmək əvəzinə Paris şəhərinin meri Ann İdalqo Qarabağa yardım gətirib, amma məlum olduğu kimi, onun yardım maşınları bizim ərazimizə buraxılmayıb. Bundan sinirlənən İdalqo, hətta Azərbaycanın əleyhinə mətbuat konfransı da keçirərək qərəzli fikirlər işlədib. O elə canfəşanlıq edir ki, sanki Fransanı xaricilər işğal edib, bu da öz torpaqlarını müdafiə edir.
İdalqo Parisi başlı-başına buraxıb burada yalandan hay-küy salır və bununla da kimlərinsə əlində oyuncaq olduğunu göstərir. Parisin zibil içində olması məsələsinə bir-iki kəlmə ilə aydınlıq gətirək. Paris kimi şəhər neçə aylardır ki, piketçilərin, etirazçıların ayaqları altında qalmışdı və nəticədə ciddi antisanitariya vəziyyəti yaranmışdı, indi də o vəziyyət mövcuddur. Məlum, Paris bərbad bir günə qalıb. Bu halda, İdalqo gedib öz rəhbərlik etdiyi şəhərlə məşğul olmaq əvəzinə, gəlib Azərbaycanda separatçıların “zibilini” təmizləmək istəyir. Parisin antisanitariya vəziyyətində qalması, Paris ictimaiyyətinin narazılığı göz qabağındadır. Parisi bu günə qoyan adamın nə haqqı var ki, Parisdən min kilometrlərlə uzaq olan yerə gəlib burada başqasının hüquqlarının müdafiəsi ilə məşğul olsun?
İdalqo niyə gedib zibil içində qalan Parisin dərdi ilə məşğul olmur? Burada nə marağı var?
“Onu təxribat törətmək üçün bura birbaşa Makron özü göndərib”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində bildirdi ki, hazırda Cənubi Qafqazda maraqlı olan dünya güclərinin savaşı gedir və savaşda tərəflərdən biri də Fransadır. “Paris şəhərinin meri özbaşına gəlib burada təxribat törətmir, o burada Fransanın maraqları baxımından çıxış edir. Yəqin ki, Fransa hökuməti iclas keçirib və müzakirə aparıb, ölkə rəhbərliyinin açıq şəkildə bu işə qoşulması məsləhət olmayıb, merləri irəli veriblər. Bilirsiz ki, adətən yerli hökumət qlobal siyasətə qarışmır. Paris merinin gəlməsini ona görə “məsləhət” biliblər ki, guya o siyasətdən kənar adamdır, onun işi erməni icmasının “humanitar fəlakət”dən xilas olmasına yardım etməkdir. Onu təxribat törətmək üçün bura birbaşa Makron özü göndərib, o, Fransa prezidentinin təlimatı və tapşırığı ilə gəlib. Guya Qarabağda erməni əsilli insanlar “blokadadadır”, guya bunlar “acından ölür”, Paris meri də bunlara yardım gətirib, Azərbaycan hökuməti də guya heç bir humanist dəyərlərə məhəl qoymur və bu “humanitar yardım”ın Qarabağa keçməsinə imkan vermir. Sözdə siyasətdən kənar İdalqonu Qarabağa göndərməklə bu siyasəti maskalayırlar. Paris meri əslində heç bir siyasi məsələlərə qarışmamalıdır, yerli hökumətdir, şəhərin problemləri ilə məşğul olmalı olan şəxsdir, onun siyasətə heç bir aidiyyəti yoxdur. Ona görə də Fransa öz mənfur siyasətini qeyri-siyasi personaların əli ilə həyata keçirir ki, rəsmi Parisin Qafqaz uğrundakı mübarizəsini həm davam etdirsin, həm də bu mübarizəni maskalasın”-deyə A.Nəsirli qeyd etdi.
A.Nəsirli qeyd etdi ki, hazırda rəsmi Parisin diqqətini daha çox Parisin zibili yox, Qafqaz bölgəsi cəlb edir, bu səbəbdən də şəhəri başlı-başına qoyub meri bu tərəfə göndəriblər. “Ermənipərəst Fransa Parisin hazırkı durumunu, antisanitariya vəziyyətini bir ovuc erməniyə qurban verir. İdalqo üçün rəsmi Parisin siyasi maraqlarını təmin etmək Parisi zibildən təmizləməkdən daha önəmlidir, çünki ona təlimat verilib ki, necə olursa olsun, Qarabağa gedib orada daha güclü şou yaradıb təxribat həyata keçirməlisən. Fransa Parisi unudub erməniləri tutub”-deyə A.Nəsirli qeyd etdi.
Leyla QARAXANLI
