Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi ənənəvi brifinqdə bir sıra məsələlərə toxunub. Bununla yanaşı, Zaxarova brifinqdə qəribə məntiqlə çıxış edib.
Onun fikrincə, Laçın dəhlizində hazırda yaranmış vəziyyət Ermənistanın Azərbaycanın ərazi bütövlüyünü tanımasının nəticəsidir: “Laçın dəhlizindəki vəziyyət Ermənistanın Azərbaycanın ərazi bütövlüyünü tanıması nəticəsində yaranıb. Bu, iki ölkə liderinin iştirakı ilə Avropa İttifaqının egidası altında 2022-ci ildə və 2023-cü ilin mayında keçirilmiş sammitdə təsbit olunub”.
Bu nə ziddiyətli yanaşmadır? Zaxarova sanki demək istəyir ki, Ermənistan Azərbaycanın ərazi bütövlüyünü tanımasaydı, Rusiya Laçın yolunun başlanğıcında nəzarət-buraxılış məntəqəsinə imkan verməzdi.
“Zaxarovanın açıqlaması o anlama gəlir ki, Praqa görüşündə Paşinyanın ortaya qoyduğu mövqe Moskvanı qane etmir”
Sözügedən məsələ ilə bağlı fikirlərini “Bakı-Xəbər”lə bölüşən İdarəçilik Akademiyasının müəllimi, sosioloq Hüseyn İbrahimov Zaxarovanın ziddiyətli açıqlamasına bir neçə prizmadan yanaşdı: “Proseslər artıq elə bir hüquqi mərhələyə qədəm qoyur ki, Azərbaycanın öz suverenliyini tam təmin etməsi qaçılmaz reallığa çevrilir. Günbəgün bu proseslər müsbətə doğru inkişaf edir. Bütün bunlar, təbii ki, Azərbaycanın Konstitusiya və suveren hüququdur və Azərbaycanın əldə etdiyi qələbənin məntiqi nəticəsidir. İkincisi, aparılan diplomatik danışıqların nəticəsidir. Məhz diplomatik proseslərin nəticəsi idi ki, Paşinyan ötən ilin oktyarbrında Praqada Qarabağı Azərbaycanın bir hissəsi kimi tanıdığını bəyan etdi. Düzdür, o bunu şifahi şəkildə bəyan etdi, amma hər halda bunu rəsmən bəyan etdi. Təbii ki, onun bu açıqlaması Rusiyada və Ermənistanda Moskvaya bağlı revanşist qüvvələr tərəfindən birmənalı qarşılanmadı. Çünki bu, Rusiyaya sərf etmirdi. Rusiya Qarabağ məsələsindən hər iki dövlətə qarşı bir təzyiq vasitəsi kimi istifadə edir. Zaxarovanın açıqlaması o anlama gəlir ki, Praqa görüşündə Paşinyanın ortaya qoyduğu mövqe Moskvanı qane etmir. Çünki Ermənistanın Qarabağ daxil Azərbaycanın ərazi bütövlüyünü tanıması separatçıların Rusiya tərəfindən himayə olunması faktını ortaya qoyur. Görünən odur ki, Rusiya rəsmiləri bundan narahatdılar. Rusiya hər zaman olduğu kimi ikili oyun oynayır. Bir tərəfdən Paşinyan hakimiyyətinin siyasətini tənqid edirlər, o biri tərəfdən Ermənistanda revanşist qüvvələri dirçəltməyə çalışırlar. Məsələnin digər tərəfi ondan ibarətdir ki, sülhməramlıların müddəti daralır. Yəni 2025-ci ilin noyabrında bu başa çatacaq. Rusiya çalışır ki, daha beş il Qarabağda qalsın. Kremlin apardığı siyasət həm də buna hesablanıb. Ancaq hesab edirəm ki, Azərbaycanın uğurlu siyasəti nəticəsində Rusiya buna nail ola bilməyəcək”.
Vidadi ORDAHALLI
