44 günlük Vətən müharibəsi dövründə separatçılar bir sıra qondarma məsələlər düzüb-qoşmağa başladılar. O dövrdə birdən - birə ortaya saxta "rus icması" çıxarıldı. Bu "rus icmasının adı arxasından daha məkrli niyyətlər ortaya qoydular.
Daim bu saxta “icma"nın adını hallandırmağa başladılar.
İndi də məlumat yayıblar ki, Qarabağda "rus icması" nümayəndələri ilə erməni apostol kilsəsi nümayəndələrinin görüşü keçirilib. Guya Qarabağda "rus icması" da var və “acından ölənlər”in siyahısında onlara da rast gəlinir. Guya yerli rusların da etnik təmizlənməyə məruz qalmasından narahat olan “rus icması”nın “rəhbəri” rusların bu ərazidən köçəcəyindən narahatdır, Qarabağdakı qondarma “rus icması” Azərbaycanın tərkibində yaşamaq istəmədiklərini açıqlayıb.
Onların "Azərbaycanın tərkibində yaşamaq istəməməsinə" Azərbaycandakı Rus İcmasının münasibət bildirməsinə ehtiyac varmı?
Bildirək ki, doğrudan da Rus İcması Azərbaycanda neçə yüz ildir mövcuddur, onlar göz üstündə saxlanılır, heç bir problemləri yoxdur. Ən azı, bunların məsələyə reaksiya verməsinə çox ciddi bir ehtiyac var ki, ay nankorlar, necə olur biz burada yaşaya bilirik, siz yaşa bilmirsiz?
"Artıq Azərbaycanda fəaliyyət göstərən Rus İcması bəyanat yayıb, öz mövqeyini ortaya qoyub"
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində "Birincisi, "Dağlıq Qarabağ" adlı ərazi vahidi yoxdur, ora Qarabağ İqtisadi zonasıdır, dünya da bu yeni reallığı qəbul edib. Ola bilsin ki, hansısa qüvvələr artıq olmayan qondarma bir ifadədən istifadə etsin, bu termini işlətsin, amma bu ərazi Azərbaycanın suveren ərazisidir. İkincisi, Qarabağ İqtisadi zonasında marağı olan müəyyən qüvvələr var ki, onlar hansısa dairələrin istəklərini yerinə yetirirlər. Orada süni şəkildə yaradılan "rus icması"na gəlincə, ola bilsin, onlar ikili "vətəndaş", Rusiya vətəndaşı, yaxud erməni-rus qarışığı olan ailələrdir. Təbii ki, təxribat məqsədilə belə bir addım atıla bilər. Azərbaycan ərazisində bir Rus İcması var, o da 1993-cü ildə yaradılıb. Onun da sədri Azərbaycan Milli Məclisinin deputatı Mixail Zabelindir. Azərbaycan ərazisində ikinci bir rus icması mövcud deyil. Azərbaycanda çox sərbəst şəkildə fəaliyyət göstərən bu Rus İcmasının da Azərbaycanın müxtəlif bölgələrində, rayonlarında, o cümlədən Bakıda şöbələri fəaliyyət göstərir. Hamısı da Rus İcmasına tabedir. Xankəndidən saxta "rus icması" nın adından yayılan informasiya bir təxribatdır, bunun başqa adı yoxdur, bu qeyri-ciddi bir məsələdir. Hesab etmirəm ki, Rusiya dövləti, Rusiya hökuməti belə bir qondarma "icmanın" adından yaradılan təxribata reaksiya versin, yaxud onların müdafiəsi ilə məşğul olsun"-deyə bildirdi.
Ş.Ağayevin sözlərinə görə, təbii ki, bu, Rusiyanın diqqətini cəlb etmək üçündür. "Amma Rusiya dövləti çox gözəl bilir ki, Azərbaycan rus icması kimdir, harada fəaliyyət göstərir, rəhbəri kimdir. O ki qaldı Azərbaycandakı Rus İcmasının bu təxribata reaksiyasına, artıq Azərbaycanda fəaliyyət göstərən Rus İcması bəyanat yayıb, öz mövqeyini ortaya qoyub. İcma öz bəyanatında da göstərib ki, Azərbaycanda bir Rus İcması var o da bizik, ikinci bir Rus İcması yoxdur. Mövcud Rus İcması da Azərbaycan konstitusiyası və ərazi bütövlüyü çərçivəsində fəaliyyət göstərir. Onların hüquqlarının da Azərbaycan qanunları ilə qorunduğunu elan ediblər. Belə təxribatları ermənilər edir, onlardan həmişə belə təxtibatlar gözlənilir. Demək istədiyim odur ki, bu təxribatların heç bir təsir gücü yoxdur.
Bu təxribatla Rusiyanın reaksiya verməsinə nail olmaq istəyirlər, amma tam əminliklə deyirəm ki, Rusiya onlara dəstək verməyəcək. Çünki Azərbaycan-Rusiya əlaqələri o qədər yüksək səviyyədədir ki, inanmıram ki, Rusiya beş-üç separatçıya görə hansısa addım ata"-deyə müsahibimiz qeyd etdi.
"Azərbaycan hökuməti Rusiya sülhməramlılarının müvəqqəti yerləşdiyi Xankəndi şəhərində yaşayan erməniəsilli vətəndaşları ilə dinc dialoqun aparılması üçün böyük səylər göstərdiyi halda, bir qrup separatçı əsassız bəyanatlar və dünya ictimaiyyətinə yanlış məlumatlar verməklə buna mane olmaqda davam edir". Bu fikirlər isə Azərbaycanın Rus İcması Respublika Şurasının Qarabağ bölgəsinin "saxta rus icması"nın siyasi kart oynamaq cəhdinə münasibət bildirdiyi bəyanatda bildirilir.
Sənəddə deyilir ki, özlərini “rus icması” kimi təqdim edənlərin bəyanatları Azərbaycan Konstitusiyasının normalarına tamamilə ziddir: "Azərbaycanda “Dağlıq Qarabağ” adlı ərazi vahidi yoxdur. Azərbaycan Prezidenti İlham Əliyevin sərəncamına əsasən, ölkənin Qarabağ və Şərqi Zəngəzur iqtisadi rayonları yaradılıb. Bu, ancaq suveren Azərbaycan dövlətinin ərazisində məskunlaşan ayrıca separatçılar qrupunun xəyallarında mövcuddur".
“Qarabağ iqtisadi rayonunun erməniəsilli sakinləri Azərbaycan Respublikasının vətəndaşlarıdır və ölkəmizin rəsmi qanunlarına uyğun yaşamalıdırlar. Azərbaycanda 1993-cü ildə Ədliyyə Nazirliyi tərəfindən qeydiyyata alınmış və bu gün bir rus icması var. Sayı 120 min nəfərdən çoxdur. Təşkilatımız bütün beynəlxalq strukturlar tərəfindən tanınır və 30 ildir fəaliyyət göstərir. Əgər Qarabağ sakinləri arasında Azərbaycanın rus icmasına qoşulmaq istəyən etnik ruslar varsa, o zaman təşkilata üzv olmaq üçün bizə müraciət etsinlər. Biz onların müraciətlərinə cavab verməyə və bunun üçün bütün lazımi məlumatları təqdim etməyə hazırıq”, - bəyanatda qeyd olunur.
“Rus icması” öz bəyanatında Qarabağdan öz əcdadlarının tarixi torpağı kimi danışır. Qarabağ həmişə Azərbaycanın bir parçası olub və belə də qalacaq.
“Ölkəmizin ərazi bütövlüyü bütün dövlətlər, o cümlədən Rusiya Federasiyası və hətta Ermənistanın özü tərəfindən tanınır. Əcdadlarının ağır taleyini bəyan edən "saxta icma" unudur ki, Ermənistanın Azərbaycana təcavüzünə qədər bütün etnik qrupların nümayəndələri bir yerdə dinc və mehriban yaşayıblar. Azərbaycanlılar, o cümlədən milli azlıqların nümayəndələri öz doğma yurdlarından zorla didərgin salınıblar. Ermənistanın özündən də milli azlıqlar zorla qovulub. Bu gün monoetnik dövlətdir ki, burada ermənilərin özündən başqa heç kim yaşamır, Azərbaycanda isə onlarla etnik qrupların nümayəndələri yaşayır”, - məlumatda vurğulanır.
Sonda Azərbaycanın Rus İcması bu cür bəyanatları regionda sabitliyi pozmaq, dünya ictimaiyyətinə yanlış məlumat vermək və Qarabağ ermənilərinin çoxmillətli, multikultural Azərbaycan cəmiyyətinə inteqrasiya prosesini ləngitmək cəhdi hesab edir.
İradə SARIYEVA
