Son bir neçə aydır ki, separatçılar, Ermənistan, Fransa, onların beynəlxalq qurumlardakı və müxtəlif dövlətlərdəki uzantıları Azərbaycana qarşı çirkin kampaniya aparırlar.
Xankəndidə şoular yaradıldığı, ermənipərəst beynəlxalq Qərb təşkilatlarının əl-ələ verib Azərbaycana qarşı qərəzli çağırışlar etdiyi günlərdə ən çox gözlənilən məsələ islam və türk təşkilatlarının Azərbaycanla həmrəylik nümayiş etdirməsidir. Amma Türkiyədən başqa, təəssüf ki, başqa türk və islam dövlətlərinin səsi gəlmədi.
Onlar indiki şəraitdə Azərbaycanın ədalətli mövqeyini dəstəkləyən addımlar niyə atmırlar?
Ən azından, erməni - fransız cütlüyünün anti-Azərbaycan addımlarına reaksiya verə, onların haqsız olduğunu, Xankəndidə heç bir genosid, blokada olmadığını ifadə edən bəyanat qəbul edə bilərlər.
"Ümid edirik ki, Türkiyə və Azərbaycanın da təmsil olunduğu türk, islam adı daşıyan təşkilatlar da Türkiyə kimi öz fəallığını artıracaq"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli "Bakı-Xəbər"ə şərhində bildirdi ki, türk və islam dövlətlərinin, beynəlxalq statuslu təşkilatlarının Azərbaycanın haqlı mövqeyini müdafiə etməsi çox vacibdir.
"Azərbaycan öz ərazi bütövlüyünü həm de-fakto, həm de-yure həll etmək üzrədir. Təxminən 30 il ərzində Azərbaycan öz ərazi bütövlüyü məsələsində çox ciddi problemlər yaşadı, ancaq son iki-üç ildir ki, bu problemin həllində böyük irəliləyişlər var. Azərbaycan həm beynəlxalq hüquq çərçivəsində, həm öz qanunlarına uyğun olaraq mövcud problemi həll edəcək. Son günlərdə Azərbaycan bu prosesi sürətləndirib, Xankəndi və ətrafında da Azərbaycanın nəzarəti güclənməkdədir. Xankəndidə yaşayan erməni əsilli şəxslər Azərbaycan qanunları çərçivəsində yaşamağa məcburdurlar, yaşamaq istəməyənlər də, təbii ki, köçüb gedirlər və başqa yolları da yoxdur".
F. Ələkbərlinin sözlərinə görə, Azərbaycan Xankəndidə qalıb yaşamaq istəyən ermənilərin problemlərini özü həll etmək istəyir, bu da çox doğru addımdır. "Yəni Azərbaycan hökuməti onun torpağında yaşayan istənilən xalqa, topluma həm maddi, həm mənəvi cəhətdən yardım etməlidir.
Ancaq gördüyümüz kimi, bir çox Qərb dövlətləri və Qərb təşkilatları bunu tamamilə Azərbaycanın əleyhinə çevirmək istəyirlər. Xüsusilə də burada Fransa, müəyyən qədər Almaniya və digərləri fəallıq göstərir. Amma Azərbaycanın bu haqq işində yalnız Türkiyənin mövqeyi ortadadır, təəssüflər olsun ki, o biri türk və islam dövlətlərinin çoxu hələ mövqe bildirməyib. Türkiyənin bu məsələdə də fəallığı bir örnəkdir. Əlbəttə, Türkiyə və Azərbaycanın əməkdaşlığı bütün sahələri əhatə edir və edəcək də. Bu anlamda Türkiyə bu məsələdə də Azərbaycanın yanındadır, Xankəndidə yaradılan şouya münasibəti ortadadır. Ümid edirik ki, Türkiyə və Azərbaycanın da təmsil olunduğu türk, islam adı daşıyan təşkilatlar da Türkiyə kimi öz fəallığını artıracaq. Məsələn, Türk Dövlətləri Təşkilatı, onun baş katibi, türk təşkilatlarının təmsil olunduğu digər təşkilatlar da bu məsələdə Azərbaycanın haqlı mövqeyini müdafiə edəcək. Bu fikri islam təşkilatlarına da aid edə bilərik. İslam çərçivəsində də Azərbaycanın təmsil olunduğu bir sıra təşkilatlar var və onların da məhz Azərbaycanın haqq səsini müdafiə edəcəyinə və Azərbaycanın yanında olacağına ümid edirik. Bu məsələdə gecikmək olmaz. Necə deyərlər, dost dar gündə tanınar. Əlbəttə, ümid edirik ki, Türkiyənin ortaya qoyduğu bu qətiyyətli mövqeyi, atdığı addımı digər türk və islam dövlətləri də, İslam və türk təşkilatları da atacaq. Onlar ermənilərin düzəltdiyi yalançı "blokada," genosid" şousunu ifşa etmək istiqamətində fəaliyyətə keçməlidirlər. Gün sözün əsl mənasında türk-İslam birliyinin ortaya qoyulması günüdür. O gün bu gündür. Ancaq biz görürük ki, bəzi islam adını daşıyan dövlətlər Ermənistana dəstək verməkdə, yardım göstərməkdə heç də Fransadan, Almaniyadan və başqa Qərb ölkələrindən geri qalmır. Bunun bariz nümunəsi İran İslam Respublikası adlanan ölkədir".
F.Ələkbərli ümid edir ki, bütün türk və islam ölkələri Azərbaycanın haqlı mövqeyini müdafiə edəcək.
İradə SARIYEVA
