Kollektiv Təhlükəsizlik Müqaviləsi Təşkilatı (KTMT) İranı təşkilatın “Döyüş Qardaşlığı - 2023" təlimlərinə müşahidəçi qismində dəvət edib. Bunu KTMT-nin Birgə Qərargahının rəisi general-polkovnik Anatoli Sidorov avqustun 28-də keçirdiyi mətbuat konfransında deyib. O bildirib ki, təlimlərə həmçinin Çin, Səudiyyə Ərəbistanı və Monqolustan hərbi müşahidəçiləri də qatılacaq.
Rusiyanın əsas söz sahibi olduğu KTMT ilə əməkdaşlığa xüsusilə İranın cəlb edilməsi və Azərbaycan ətrafında hərbi blokun gücləndirilməsi niyyəti Bakını narahat etməlidirmi?
Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki, Rusiya ilə İran bir çox sahələrdə, xüsusən də hərbi sahədə dərin əməkdaşlıq edir: “Son illərin bir neçə müharibəsində də onlar birgə addımladılar. Suriya müharibəsində, oradakı rejimin qorunmasında iki dövlətin rolu var. Rusiya da, İran da davamlı olaraq dəstək göstəriblər. İkinci tərəfdən Ukrayna ilə müharibədə İran bütün gücü ilə Rusiyanın yanında oldu. Pilotsuz uçuş aparatları verir, hətta bu yöndə olan zavodların Rusiya və Belarusda tikilməsini planlaşdırır. Demək olar ki, İran bütün gücü ilə Rusiyanı dəstəkləyir. 44 günlük Vətən müharibəsində də Rusiya silahları İran vasitəsi ilə Ermənistana köçürüldü. Ümumiyyətlə, hərbi və iqtisadi cəhətdən Rusiya ilə İran Ermənistanı daima dəstəkləyiblər. Düzdür, Fransanın da, Amerikanın da, Qərbin də böyük dəstəyi var. Amma Rusiyanın və İranın dəstəyi xüsusilə seçilir. Kollektiv Təhlükəsizlik Müdaviləsi təşkilatında keçirilən təlimlərdə İranın iştirakı, Rusiyanın Azərbaycanla bağlı məsələlərdə Amerika ilə yaxınlaşması diqqət çəkir. Azərbaycan regionda və dünyada gedən prosesləri çox yaxından izləyir. Xüsusən də qonşuluğunda baş verənləri diqqətində saxlayır. Azərbaycan özü də tez - tez Türkiyə ilə təlimlər keçirir. Hər il fərqli təlimlər olur. Bilirsiz ki, Türkiyə NATO - nun ən önəmli dövlətlərindən biridir. Quru qoşunlar sahəsində ən güclü döyüş keçirən Türkiyə ordusudur. Ona görə ki, son zamanlar Türkiyə qədər müharibələrdə iştirak edən ikinci bir NATO dövləti yoxdur. Həm öz daxilində terrorla mübarizəsi, həm də Suriyada, Liviyada, Qətərdə və bir çox ölkələrdə hərbi mövcudluğu onu deməyə əsas verir ki, Türkiyənin çox böyük döyüş hazırlığı və vətənpərvər, güclü ordusu var. Azərbaycan ordusu da müharibələrdə sınaqlardan üzü ağ, alnı açıq çıxıb. Ordunun sayı önəmli deyil. Ordunun döyüş ruhu, keyfiyyəti, vətənpərvərliyi önəmlidir. Rusiya və Ukrayna müharibəsində biz bu amilləri gördük. Döyüş aparan ordunun xüsusi təyinatlıları, uçuş aparatları, hava qüvvələri arasında əlaqə, təminat, əsgərlərin ruh yüksəkliyi, səfərbərlik və digər sahələrdə Rusiya və Ukraynada boşluqlar gördük. Azərbaycanın apardığı müharibədə Prezident-xalq-ordu vəhdəti, yüksək səfərbərlik hazırlıqları, gənclərin könüllü döyüşə getməsi, xalqın müharibədə çıxış etməsi, ictimai - siyasi qüvvələrin eyni mövqedən çıxış etməsi bütün dövlətlərə bir mesajdır. Rusiya ilə İran Suriyada, ardınca da Ukraynada gedən müharibələrdə ard - arda çoxlu itkilər verib. Bu itki 250 minə qədərdir hətta. Bütün bunları hesablayanda və nəzər yetirəndə də görürük ki, Suriyada da əməliyatlar tam yekunlaşmayıb. Rusiya ilə İran üçün hansı sürprizlərin olacağını da zaman göstərəcək. Ona görə də, hesab etmirəm ki, Azərbaycan üçün hər hansı bir təhlükə gözlənilsin. Əksinə, Azərbaycan regionun ən öndə dövlətlərindən biri hesab olunur. Yaxın günlərdə Türkiyə ilə Azərbaycanın xeyrinə regionda çox böyük proseslərin getdiyinin şahidi olacağıq”.
Məhəmmədəli QƏRİBLİ
