Müdafiə Nazirliyinin Maliyyə İdarəsinin sabiq rəisi, general-mayor Nizami Məmmədovun da ittiham olunduğu cinayət işi üzrə istintaqın ona aid hissəsi yekunlaşdırılıb. İşin N.Məmmədova aid hissəsi ayrılaraq baxılması üçün Bakı Hərbi Məhkəməsinə göndərilib.
Bu barədə generalın vəkili Rəşad Mirmehdizadə bildirib.
Vəkil qeyd edib ki, Dövlət Təhlükəsizliyi Xidmətində aparılan cinayət işi üzrə istintaq müddətində müvəkkili və digər təqsirləndirilən şəxslər tərəfindən ümumilikdə 40 milyon manata yaxın vəsait dövlət bübcəsinə ödənilib və bu proses davam edir.
"Barəsində məhkəməyə göndərilən 128 cild cinayət işi ilə Nizami Məmmədov ağır sağlamlıq durumu ilə əlaqədar çox çətinliklə tanış ola bilib və bəzi vəsatətlər verib. Hazırda Bakı Hərbi Məhkəməsində məhkəmə baxışının başlanması gözlənilir"
Qeyd edək ki, bir müddət əvvəl Dövlət Təhlükəsizliyi Xidmətində başlamış silsilə araşdırmalar üzrə Müdafiə Nazirliyinin maliyyə strukturlarında mənimsəmə faktları müəyyən edilib.
Yüksək çinli maliyyə xidmət rəisləri ilə yanaşı Müdafiə Nazirliyinin Maliyyə İdarəsinin rəisi, general-mayor Nizami Məmmədov da xüsusilə külli miqdarda mənimsəmə cinayətlərində ittiham edilərək həbs edilib.
Çox maraqlıdır, vəkilin açıqlamasından hiss edilir ki, nazirliyin bir məmuru həcmi 10 milyonlarla ölçülən məbləği mənimsəyib. Dəymiş ziyandan 40 milyon manatın ödənilməsi bunu açıq sübut edir.
Nazirliyin bir məmurunun bu qədər vəsaiti tək mənimsəməsi nəzarətsizliyin nəticəsidir, yoxsa bu cinayət kimlərləsə əlbir olaraq törədilib?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Müdafiə Nazirliyində baş verən, xüsusilə külli miqdarda dövlət əmlakının talanması ilə nəticələn bu yeyinti halı mütəşəkil dəstə tərəfindən törədilən cinayət əməlidir: “Çünki 40 milyon həcmində vəsaiti tək mənimsəmək qeyri-mümkündür. Bu, zəncirvari şəkildə bir-birinə bağlı olan dəstənin törətdiyi əməldir və onlara havadarlıq edənlər olub. Burada vəzifə xəyanəti də çox yer tutur. Çünki bu tip məmurlar öz əməllərinin nəticəsini əvvəlcədən bilir və ona hazırlaşırlar. Öz şəxsi maraqlarını təmin etmək üçün belə addımlara yol verirlər. Belə adamlara qanunvericilikdə nəzərdə tutulan heç bir yüngülləşdirici hal nəzərə alına bilməz. Mən düşünürəm ki, burada Prezidentin etimadına da xəyanət var. Bu, kök salmış bir mütəşəkkil dəstənin törətdiyi əməldir. Qısa müddət ərzində onu bacarmaq mümkün deyil. Düşünürəm ki, korrupsiya haqqında qanunvericilikdə də yeniliklərin edilməsinin zamanı gəlib çatıb. Mövcud qanunvericilikdə göstərilir ki, dövlət qulluğunda olan adamlar il ərzində 55 manat dəyərində hədiyyə ala bilər. Əgər bu hal il ərzində yenidən təkrar olunarsa, mütləq mənada bununla bağlı rəhbərliyə mərüzə edilməlidir. Mənə elə gəlir ki, bu müddəa da qanundan yığışdırılmalıdır. Sanki belə təəssürat yaranır ki, qanunvericilik bəxşiş almağı məqbul sayır. Ancaq müəllim tələbəyə yaxşı qiymət verməyin müqabilində 50 manat pul alarsa, bu cinayət təqibi sayılır. Burada tam təzad var. Hesab edirəm ki, külli miqdarda korrupsiyanın qarşısını almaq üçün əyləc rolunu həmin əməllərlə bağlı cəzaların sərtləşməsi oynaya bilər. Cəzaların yumşaqlığı onlara bu qədər vəsaiti mənimsəməyə şərait yaradır. Hətta hesab edirəm ki, bu cür hallarla bağlı ölüm hökmünün tətbiqi də mümkündür. Xəstənin sağalmasında dərman preparatlarının hansı rolu varsa, korrupsiya ilə mübarizədə də ölüm hökmünün bərpasının elə əhəmiyyəti olacaq”.
Məhəmmədəli QƏRİBLİ
