Ermənistana növbəti siyasi zərbə. Avropa Məhkəməsi sülh və insanlıq əleyhinə cinayətlər törətməkdə təqsirləndirilən Vaqif Xaçatryanla bağlı Ermənistanın müraciətini rədd edib. Bunu Azərbaycan Republikasının İnsan Hüquqları üzrə Avropa Məhkəməsi yanında səlahiyyətli nümayəndəsi, Ali Məhkəmənin sədr müavini Çingiz Əsgərov deyib. O da məlum olub ki, bu, bir ayda Ermənistanın rədd edilmiş artıq dördüncü müraciətidir.
Qeyd edək ki, Vaqif Xaçatryan erməni hərbi birləşmələrinin tərkibində 1991-ci ilin 22 dekabr tarixində Xocalı rayonunun Meşəli kəndində azərbaycanlılara qarşı kütləvi qırğın törədib. Qırğın zamanı 25 azərbaycanlı öldürülüb, 14 nəfər yaralanıb, 358 nəfər azərbaycanlı isə didərgin salınıb. Qeyd edilən kütləvi qırğınla əlaqədar aparılan cinayət işi üzrə Vaqif Çerkezoviç Xaçatryanın Azərbaycan Respublikası Cinayət Məcəlləsinin 103 (Soyqırımı) və 107-ci (Əhalini deportasiya etmə və ya məcburi köçürmə) maddələrilə təqsirləndirilən şəxs qismində məsuliyyətə cəlb olunması barədə qərar qəbul edilib.
“Qarşı tərəf beynəlxalq təşkilatlarla, Avropa Məhkəməsi ilə, necə deyərlər, oyun oynayır”
Məsələ ilə bağlı “Bakı-Xəbər”ə açıqlama verən sabiq millət vəkili, hüquqşünas Qulamhüseyn Əlibəylinin fikrincə, erməni tərəfi beynəlxalq hüquq müstəvisində məğlubiyyətə məhkumdur: “Vaqif Xaçatryanla bağlı Avropa Məhkəməsinin qərarı tamamilə doğru addımdır. Çünki Avropa Məhkəməsi bu tipli məsələlərə baxmır. Sülh və insanlıq əleyhinə cinayətlərdə ittiham olunan şəxslərin həbs olunması məsələlərinə baxmır. Məsələ ondadır ki, sülh və insanlıq əleyhinə olan cinayətlər müddətsiz cinayətlərdir. Harda olmasından asılı olmayaraq, həmin cinayətdə təqsirli bilinən şəxslər məsuliyyətə cəlb olunmalıdır. Təbii ki, Azərbaycan tərəfi də lazımı sübutları Avropa Məhkəməsinə təqdim edib. Avropa Məhkəməsi Azərbaycan tərəfinin topladığı sübutlarla razılaşmış olur. Qaldı digər məsələlərə və bundan əvvəlki müraciətlərin rədd edilməsinə, bu, Ermənistanın haqsız tərəf olmasının göstəricisidir. Bu həm də o deməkdir ki, Ermənistan bütövlükdə beynəlxalq təşkilatlarla, Avropa Məhkəməsi ilə, necə deyərlər, oyun oynayır. Həmin məhkəmələrə əsassız müraciət etməklə bir tərəfdən sülh prosesinin uzadılmasına çalışır, digər tərəfdən də haqsız olaraq beynəlxalq təşkilatlarla manipulyasiya etmək istəyir. O cümlədən, Avropa Məhkəməsi ilə manipulyasiya etmək istəyir. Bu mənada Avropa Məhkəməsi də artıq başa düşür ki, onların müraciətləri əsaslı deyil. Sadəcə olaraq, Ermənistan haqsız tərəf olaraq çalışır ki, Azərbaycanın beynəlxalq imicinə kölgə salsın. Gələcəkdə müraciət olunarsa, konkret müraciətdən asılı olaraq onlar barədə qərarlar qəbul olunmalıdır. Ancaq ümumilikdə siyasi cəhətdən hesab etmək olar ki, Ermənistan artıq beynəlxalq təşkilatları da yorub. Təhlükəsizlik Şurasında müzakirələrdən sonra qərarın qəbul olunmaması, Avropa Məhkəməsinin, Beynəlxalq Ədalət Məhkəməsinin qərarları onu göstərir ki, Ermənistan beynəlxalq müstəvidə haqsız tərəfdir. O cümlədən, Azərbaycana qarşı aqressiv mövqe tutan tərəf kimi tanınır”.
Vidadi ORDAHALLI
