Dünyanın ən demokratik dövlətlərindən biri kimi qələmə verilən Fransa Emmanuel Makronun prezidentliyi dövründə əbədi saydığı şöhrətini birdəfəlik itirdi və aydın oldu ki, bu ölkə heç də deyildiyi kimi demokratik deyilmiş, onun mədəniyyət beşiyi olması əfsanə imiş.
Son illər bu ölkədə baş alıb gedən islamofobiya, ksenofobiya minlərlə insana ziyan vurur. Təbii, ən böyük zərər çəkən isə müsəlman dünyası olur. Fransada uzun illərdir ki, hicaba qarşı müharibə elan edilib, lakin Makrona qədər heç bir prezident onun tamamilə qadağan edilməsində israrlı olmayıb.
Söhbət təhsil müəssisələrindəki anti-hicab olayından və qərarından gedir.
Məlum olduğu kimi, BMT Fransanın məktəblərdə əbayə (müsəlman qadınların geyimi) geyinilməsinə qadağa qoymasını tənqid edərək, beynəlxalq insan haqları hüququna əsasən, dini etiqadın məhdudlaşdırılmasına yalnız çox məhdud şəraitdə icazə verildiyini xatırladıb. Bu barədə BMT-nin İnsan Haqları üzrə Ali Komissarlığının nümayəndəsi Marta Urtado Cenevrədə keçirdiyi brifinqdə bildirib. “Beynəlxalq insan hüquqları standartlarına uyğun olaraq, dinin və ya inancın təzahürünə, o cümlədən geyim seçiminə məhdudiyyətlərə yalnız çox məhdud hallarda - ictimai təhlükəsizlik, ictimai asayiş, sağlamlıq və ya əhalinin mənəviyyatı ilə bağlı hallarda icazə verilir. Bundan başqa, insan hüquqları sahəsində beynəlxalq hüquqa əsasən ictimai asayiş naminə görülən tədbirlər uyğun, zəruri və mütənasib olmalıdır”, - o, jurnalistlərin suallarını cavablandırarkən deyib.
BMT-nin İnsan Haqları üzrə Ali Komissarlığının nümayəndəsi vurğulayıb ki, digər məqam gender bərabərliyinə nail olmağın qadınların və qızların azad seçim etmələrinə mane olan əngəlləri başa düşməyi və geyim seçimləri də daxil olmaqla onların özlərinin qərar qəbul etmələrini dəstəkləyən mühitin yaradılmasını tələb etməsidir.
Daha əvvəl iyul ayında Fransanın təhsil naziri təyin olunmuş Qabriel Attal məktəblərdə əbayə geyinməyi qadağan etmək qərarına gəldiyini bildirərək, bu tədbiri təhsil müəssisələrinin rəhbərləri ilə müzakirə edəcəyini söyləmişdi.
“Makron da müsəlman dininə qarşı antipatiyasını kənara qoymalı və hicab, niqab geyinən xanımlara hörmətlə yanaşmalıdır”
“SƏS” Media Qrupunun rəhbəri, politoloq Bəhruz Quliyev “Bakı-Xəbər”ə şərhində
“Din azaddır, hər kəsin öz din seçimi var. Dünya da, beynəlxalq qanunlar da insanların azad şəkildə öz dinini və ya dinsizliyini seçə biləcəklərini özündə ehtiva edir. Bu baxımdan da şəxsin dininin nə olmasından asılı olmayaraq, hər kəs qarşı tərəfin seçimlərinə hörmətlə yanaşmalıdır. Lakin təəssüflər olsun ki, özünü demokratiyanın beşiyi hesab edən dövlətlərdə belə dini azadlıq görə bilmirik. Hətta dini seçimlərinə görə insanlara təzyiq göstərilməsinin belə şahidi oluruq. Fransa da dini zəmində qarşıdurmaların çox olduğu ölkələrdəndir. Ümumiyyətlə, Avropa dini azadlıq məsələsində olduqca dözümsüzdür. Ötən illərdə Məhəmməd Peyğəmbərə, Qurani-kərimə qarşı dəfələrlə təhqiredici addımlar nümayiş etdirilib. Lakin günümüzdə həqiqətən də BMT bu cür məsələlərə qarışıb və insan hüquqlarının pozulmamasına görə Fransaya “barmaq silkələyib”sə, bu, təbii ki, müsbət haldır”-deyə bildirdi.
B.Quliyevin sözlərinə görə, hazırda bir çox təşkilatlar insan hüquqlarının qorunması adı ilə yalnız dövlətlərə təsir etmək fəaliyyəti ilə məşğuldurlar. O vurğuladı ki, amma bu gün Avropada, Fransada dini ayrıseçkiliyə, müxtəlif dinlərə qarşı baş verən hadisələrə BMT-nin reaksiya verməsi yaxşı hal kimi qiymətləndirilməli və özünü hüquq müdafiəçisi adlandıran təşkilatlara da örnək olmalıdır. “Yalnız bu formada Avropada dini ayrıseçkiliyə son qoyula bilər. Bu gün Makron da müsəlman dininə qarşı antipatiyasını kənara qoymalı və hicab, niqab geyinən xanımlara hörmətlə yanaşmalıdır. Əks halda bu cür təpkilərlə qarşılaşacaq
Azərbaycan isə tolerant ölkə olaraq göstərilə biləcək ən gözəl nümunədir. Çünki multikultural ölkə olaraq müxtəlif millətlərin, etniklərin mədəniyyətlərinə və adət-ənənələrinə hörmətlə yanaşır. Düşünürəm ki, özünü demokratik və multikultural hesab edən bir çox Avropa dövləti arada Azərbaycana dönüb baxmalı və nümunə götürməlidir”-deyə B.Quliyev qeyd etdi.
İradə SARIYEVA
